.jpg)
លោក បេនចាមីន នេតានីយ៉ាហ៊ូ ថ្លែងនៅក្នុងពិធីផ្លូវការមួយនៅក្នុងតំបន់ Golan Heights ដែលជាឧបសម្ព័ន្ធរបស់អ៊ីស្រាអែល។ AFP
ក្រុងហ៊្សេរុយសាឡិមៈ ការិយាល័យរបស់លោកបានឲ្យដឹងថា ដោយមានភាពតានតឹងកាន់តែខ្លាំងឡើងរវាងអាមេរិកសម្ព័ន្ធមិត្តអ៊ីស្រាអែល និងគូសត្រូវអ៊ីរ៉ង់របស់ខ្លួន កាលពីថ្ងៃពុធ លោក បេនចាមីន នេតានីយ៉ាហ៊ូ បានព្រមានថា សត្រូវរបស់រដ្ឋជី្វហ្វកុំចង់លលេងឲ្យសោះ។
លោក នេតានីយ៉ាហ៊ូ បានថ្លែងនៅក្នុងសេចក្តីថ្លែងការណ៍ដែលត្រូវបានចេញផ្សាយដោយការិយាល័យរបស់លោក ក្រោយពីលោក បានទៅត្រួត-ពិនិត្យមើលសមយុទ្ធយោធាទ្រង់ទ្រាយធំមួយ នៅភាគខាងជើងប្រទេសថា៖ «ខ្ញុំបានឮដំណឹងពីក្រុមប្រទេសជិតខាងរបស់យើងនៅភាគខាងជើង ខាងត្បូង និងខាងកើត ដែលបានគំរាមកំហែងចង់កម្ទេចយើង»។
«ខ្ញុំចង់និយាយទៅកាន់សត្រូវរបស់យើងថា កងទ័ពអ៊ីស្រាអែលមានកម្លាំងយ៉ាងខ្លាំងក្លាអាចបំផ្លាញអ្នកឲ្យខ្ទេចបាន។ អ្នកកុំចង់សាកល្បងជាមួយយើងអី»។
ក្រុមឧទ្ទាមហេបូឡាហ៍នៅតាមព្រំដែនភាគខាងជើងអ៊ីស្រាអែល ដែលបានគាំទ្រដោយអ៊ីរ៉ង់ មានមូលដ្ឋានយោធារបស់ខ្លួននៅប្រទេស លីបង់ និងមានវត្តមាននៅស៊ីរី ជាទីដែលអ៊ីរ៉ង់មានវត្តមានផងនោះ។
ឆ្ពោះទៅទិសខាងត្បូង គឺក្រុងហ្គាហ្សា ដែលក្រុមមេដឹកនាំអ៊ិស្លាមហាម៉ាសមានការគាំទ្រពីសាធារណរដ្ឋអ៊ិស្លាមនោះ។
វិទ្យុរដ្ឋរបស់អ៊ីស្រាអែល បានផ្សព្វផ្សាយថា លោក នេតានីយ៉ាហ៊ូ បានកោះហៅរដ្ឋមន្ត្រីសន្តិសុខរបស់លោកដើម្បីប្រជុំសម្ងាត់រយៈពេល ៤ ម៉ោង «នៅក្នុងស្រមោលនៃភាពតានតឹងនៅតំបន់ឈូងសមុទ្រពែក្ស»។
វិទ្យុនោះបានផ្សាយថា អ៊ីស្រាអែលជាលើកទី២ ហើយនៅក្នុងរយៈពេល១ សប្តាហ៍មកនេះ ដែលក្រុមរដ្ឋមន្ត្រីជាន់ខ្ពស់បានជួបជុំគ្នា ក្រោយពីមានកិច្ចប្រជុំកាលពីថ្ងៃអាទិត្យ។
សារព័ត៌មាន Walla របស់អ៊ីស្រាអែល បាននិយាយថា ក្រុមរដ្ឋមន្ត្រីទាំងនោះ បានពិភាក្សាគ្នាអំពីការប្រកាសរបស់អ៊ីរ៉ង់កាលពីថ្ងៃចន្ទថា ចាប់ពីថ្ងៃទី ២៧ ខែ មិថុនា អ៊ីរ៉ង់នឹងដាក់កម្រិតទៅលើទំហំនៃការចម្រាញ់អ៊ុយរ៉ានីញ៉ូមរបស់ខ្លួនឡើងវិញ ដែលមាននៅក្នុងកិច្ចព្រមព្រៀងនុយក្លេអ៊ែរកាលពីឆ្នាំ ២០១៥ ជាមួយនឹងក្រុមប្រទេសមហាអំណាចពិភពលោក ចំណែកការិយាល័យរបស់ លោក នេតានីយ៉ាហ៊ូ មិនបានបញ្ជាក់ពីជំនួបនោះទេ៕ AFP/SK
