ក្រុងបាងកក៖ គណបក្សប្រឆាំងកំពុងស្វះស្វែងរកកិច្ចប្រជុំសភាពិសេសមួយនៅថ្ងៃទី ២២ ខែវិច្ឆិកា ដើម្បីពិភាក្សាញត្តិមួយ ដើម្បីបង្កើតគណៈកម្មាធិការក្នុងការសិក្សាធ្វើវិសោធនកម្មច្បាប់រដ្ឋធម្មនុញ្ញ និងញត្តិមួយដើម្បីបង្កើតគណៈកម្មាធិការមួយ ដើម្បីសិក្សាផលប៉ះពាល់ពីបទបញ្ជានិងសេចក្តីប្រកាសផ្សេងៗដែលត្រូវបានចេញឲ្យប្រើប្រាស់នៅក្រោមមាត្រា ៤៤ ដោយក្រុមប្រឹក្សាជាតិ ដើម្បីសន្តិភាព និងសណ្តាប់ធ្នាប់ ដែលបច្ចុប្បន្នបានស្លាប់បាត់ទៅហើយនោះ។
លោក ស៊ុធីន ក្លងសាង ជាប្រធានបក្សប្រឆាំងតម្រង់ទិស និងសមាជិកសភាបក្សភឿថៃប្រចាំនៅខេត្តមហាសារ៉ាខាម បានថ្លែងថា លោកនឹងស្នើឲ្យប្រធានសភាលោក ឈួន លីកផៃកោះប្រជុំសភាពិសេសមួយ ដើម្បីពិចារណាញត្តិ ២ ជាបន្ទាន់។
ដោយឆ្លើយតបទៅនឹងការរិះគន់របស់គណបក្សភឿថៃ អំពីការដោះស្រាយរបៀបវារៈក្នុងសភាដែលបានពន្យារពេលក្នុងការកែប្រែមាត្រារដ្ឋធម្មនុញ្ញ លោកឈួន លីកផៃ បានថ្លែងកាលពីថ្ងៃពុធថា លោកមិនបានព្យាយាមពន្យារញត្តិនោះទេ ហើយបានលើកឡើងថា ញត្តិស្តីពីរបៀបវារៈនៅក្នុងសភានោះ ត្រូវតែលើកឡើងយកមកជជែកដេញដោលនៅក្នុងសភាឲ្យបានច្បាស់លាស់។
លោក ឈួន លីកផៃ បានថ្លែងថាសភាបច្ចុប្បន្ន គឺមានសមត្ថភាពគ្រប់គ្រាន់នៅក្នុងការរៀបចំកិច្ចប្រជុំរបៀបវារៈរបស់ខ្លួន ដោយបានបន្ថែមថាសភាត្រូវតែពិភាក្សាអំពីញត្តិទាំងអស់នៅលើរបៀបវារៈដោយស្មើភាព។ លោកបានថ្លែងថា មានរបៀបវារៈជាច្រើនដែលតម្រូវឲ្យទទួលស្គាល់ ពីសភាដែលត្រូវតែចំណាយពេលជជែកដេញដោលនៅក្នុងសភា។
លោក ឈួន លីកផៃ បានថ្លែងថា៖ «កាលពីសប្តាហ៍មុន យើងបានចំណាយពេល ២ ថ្ងៃ ដើម្បីត្រួតពិនិត្យរបៀបវារៈទាំងនោះ»៕ BKP/SK