.jpg)
លទ្ធផលបឋមនៃការបោះឆ្នោតព្រឹទ្ធសភាជុំទី២ នៅរដ្ឋ Georgia បានបង្ហាញថា បេក្ខជនបក្សប្រជាធិបតេយ្យទាំង ២ រូប ទទួលជ័យជម្នះលើសមាជិកព្រឹទ្ធសភាកាន់តំណែងពីបក្សសាធារណរដ្ឋប្រគល់ការគ្រប់គ្រងព្រឹទ្ធសភាឱ្យគណបក្សប្រជាធិបតេយ្យ។
ជ័យជម្នះរបស់លោក Jon Ossoff និង Raphael Warnock បានធានាឱ្យបក្សប្រជាធិបតេយ្យមានសំឡេង ៥០-៥០ ក្នុងព្រឹទ្ធសភានៅអាណត្តិក្រោយ ដោយមានអនុប្រធានាធិបតី Kamala Harris ដើរតួជាអ្នកបំបែកការជាប់គាំងដោយសារសំឡេងស្មើគ្នា។
ការគ្រប់គ្រងអង្គសភាទាំង ២ ដោយបក្សប្រជាធិបតេយ្យធ្វើឱ្យមានភាពងាយស្រួលសម្រាប់ប្រធានាធិបតីជាប់ឆ្នោតលោក Joe Biden ធ្វើការអនុវត្តគោលដៅច្បាប់ ហើយងាយស្រួលក្នុងការធ្វើការតែងតាំងគណៈរដ្ឋមន្ត្រី និងចៅក្រម។
លោក Biden នឹងថ្នាក់ដឹកនាំបក្សប្រជាធិបតេយ្យបានយល់ព្រមថា ពេលដែលលោកចូលកាន់តំណែងសភានឹងអនុម័តកញ្ចប់ថវិកាជួយសង្គ្រោះវិបត្តិកូវីដ ១៩ ដែលរួមមានការផ្ដល់សែក ២ ០០០ ដុល្លារ ទៅកាន់ពលរដ្ឋអាមេរិកនីមួយៗ។
គួរកត់សម្គាល់ថា មានពាក្យចចាមអារ៉ាមថា ចៅក្រមតុលាការកំពូលលោក Stephen Breyer ដែលមានអាយុ ៨២ ឆ្នាំ បានរង់ចាំដល់ពេលវេលាដល់ពេលដែលអាសនៈលោកអាចបំពេញដោយចៅក្រមសេរីនិយមតែងតាំងដោយបក្សប្រជាធិបតេយ្យ ទើបលោកចូលនិវត្តន៍។
សភាគ្រប់គ្រងដោយបក្សប្រជាធិបតេយ្យក៏ធានាឱ្យនឹងអាចអនុម័តថវិកាជាតិដោយគ្មានការគំរាមកំហែងបិទទ្វាររដ្ឋាភិបាល និងមិនបាច់ប៉ះទង្គិចជាមួយសភាទាក់ទងនឹងការកំណត់បំណុលជាតិផងដែរ។
លោក Ossoff នឹងមានអាណត្តិពេញ ៦ ឆ្នាំ រីឯលោក Warnock វិញដែលឈ្នះការបោះឆ្នោតពិសេស នឹងបំពេញនៃអាណត្តិនៅសល់របស់អតីតសមាជិកព្រឹទ្ធសភាបក្សសាធារណរដ្ឋ Johnny Isakson ហើយត្រូវឈរឈ្មោះការបោះឆ្នោតធម្មតានៅឆ្នាំ ២០២២៕
