The Phnom Penh Post Search

Search form




Logo of Phnom Penh Post newspaper Phnom Penh Post - បង់ក្លាដែស​ដាក់​ពង្រាយ​ឆ្មាំ​តាម​ព្រំដែន ​ទប់ស្កាត់​ការ​តវ៉ា​ប្រឆាំង​នឹង​លោក​នាយក​រដ្ឋមន្ត្រី​ឥណ្ឌា

បង់ក្លាដែស​ដាក់​ពង្រាយ​ឆ្មាំ​តាម​ព្រំដែន ​ទប់ស្កាត់​ការ​តវ៉ា​ប្រឆាំង​នឹង​លោក​នាយក​រដ្ឋមន្ត្រី​ឥណ្ឌា

Content image - Phnom Penh Post
លោក​នាយក​រដ្ឋមន្ត្រី ណារិនដ្រា ម៉ូឌី (ឆ្វេង) សមភាគី​បង់ក្លាដែស លោកស្រី Shiekh Hasina ក្នុង​អំឡុង​ជំនួប​របស់​ពួក​គេ។ AFP

បង់ក្លាដែស​ដាក់​ពង្រាយ​ឆ្មាំ​តាម​ព្រំដែន ​ទប់ស្កាត់​ការ​តវ៉ា​ប្រឆាំង​នឹង​លោក​នាយក​រដ្ឋមន្ត្រី​ឥណ្ឌា

ប្រទេស​បង់ក្លាដែស​ថា ស្ថានភាព​ហាក់​នៅ​ប្រក្រតី​នៅ​ឡើយ ក្រោយ​ពេល​មាន​ការ​ដាក់​ពង្រាយ​ឆ្មាំ​នៅ​តាម​ព្រំដែន ដើម្បី​ជួយ​រក្សា​សណ្តាប់​ធ្នាប់ បន្ទាប់​ពី​មាន​ការ​តវ៉ា ដែល​បណ្ដាល​ឱ្យ​មាន​មនុស្ស​ស្លាប់​ធ្វើ​ឡើង​ដោយ​ក្រុម​អ៊ិស្លាម​ជ្រុល​និយម​ប្រឆាំង​នឹង​ដំណើរ​ទស្សនកិច្ច​របស់​នាយករដ្ឋមន្ត្រី​ឥណ្ឌា លោក Narendra Modi កន្លងមក។

អ្នក​នាំពាក្យ​ក្រុម​ឆ្មាំ​ព្រំដែន​បង់ក្លាដែស​នឹង​មាន​តួនាទី​ជា​កម្លាំង​យោធា​បម្រុង​ផង​នោះ បាន​និយាយ​ថា ដើម្បី​ធានា​រក្សា​ច្បាប់ និង​សណ្តាប់​ធ្នាប់​សង្គម ក្រុម​កម្លាំង​យោធា​បម្រុង​ទាំង​នេះ បាន​ដាក់​ពង្រាយ​កងទ័ព​តាំង​ពី​យប់​ថ្ងៃ​សុក្រ​មក​ម្ល៉េះ។

លោក​វរសេនីយ៍ទោ Fayzur Rahman បាន​មាន​ប្រសាសន៍​ថា៖ «ដោយ​មាន​ការ​ណែនាំ​ពី​ក្រសួង​មហាផ្ទៃ និង​ជំនួយ​រដ្ឋបាល​ស៊ីវិល​ក្រុម​យោធា​បម្រុង​បាន​ពង្រាយ​ខ្លួន​នៅ​តាម​ព្រំ​ប្រទល់​ស្រុក​ផ្សេងៗ​គ្នា​​ក្នុង​ប្រទេស»។ លោក Rahman បាន​បន្ថែម​ថា មិន​មាន​របាយការណ៍​ស្ដី​អំពី​អំពើ​ហិង្សា​ណាមួយ​ឡើយ ​ក្រោយ​ការ​ដាក់​ពង្រាយ​កងកម្លាំង​ទាំង​នេះ ពោល «ស្ថានភាព​នៅ​ធម្មតា»។

ការ​តវ៉ា​ប្រឆាំង​នេះ បាន​ចាប់​ផ្តើម​កាល​ពី​ថ្ងៃ​សុក្រ​នៅ​វិហារ​អ៊ិស្លាម​មួយ​នៅ​ក្នុង​រដ្ឋធានី​ដាកា រួច​ក៏​រីក​រាលដាល​ដល់​ស្រុក​សំខាន់ៗ​ជាច្រើន​នៅ​ក្នុង​ប្រទេស​អាស៊ី​ខាងត្បូង (មាន​ប្រជាជន​ចំនួន ១៦៨ លាន​នាក់) ក្នុង​នោះ​បណ្តាល​ឱ្យ​មនុស្ស ៥ នាក់​ស្លាប់ និង​ជាច្រើន​នាក់​រងរបួស។

មូលហេតុ​ដែល​បង្ក​ឱ្យ​មាន​ការ​តវ៉ា​ប្រឆាំង​នេះ ​គឺ​ដោយសារ​ក្រុម​សាសនិកជន​អ៊ិស្លាម​ជាច្រើន​នៅ​បង់ក្លាដែស​បាន​ចោទ​ប្រកាន់​នាយករដ្ឋមន្ត្រី ​Modi ពី​បទ​រើសអើង ស្អប់ខ្ពើម​ប្រជាជន​មូស្លីម​ភាគ​តិច​នៅ​ឥណ្ឌា ដែល​ជា​ប្រទេស​កាន់​សាសនា​ហិណ្ឌូ​ភាគ​ច្រើន។ ប្រទេស​ទាំង ២ បាន​ចេញ​សេចក្តី​ថ្លែងការណ៍​រួម​មួយ អបអរ​កិច្ច​សហ​ប្រតិបត្តិការ និង​ភាព​ជា​ដៃគូ​របស់​ពួក​គេ។ យ៉ាង​ណាមិញ​រដ្ឋាភិបាល​បង់ក្លាដែស​មិន​បាន​ធ្វើ​អត្ថាធិប្បាយ​ស្ដីអំពី​ការ​តវ៉ា​នេះ​ទេ។

យ៉ាង​ហោច​ណាស់​មាន​អ្នកគាំទ្រ​ក្រុម Hefazat-e-Islam ឬ​ប្រែ​ថា​ក្រុម​ការពារ​អ៊ិស្លាម​ចំនួន ៤ នាក់ ​បាន​ស្លាប់​កាល​ពី​ថ្ងៃ​សុក្រ​សប្ដាហ៍​មុន​បន្ទាប់​ពី​ប៉ូលិស​បាន​បើក​ការ​បាញ់ប្រហារ ក្រោយ​មាន​ការ​ចោទ​ប្រកាន់​ថា ក្រុម​បាតុករ​នេះ​បាន​វាយប្រហារ​ស្ថានីយ​ប៉ូលិស​មួយ​នៅ​ភាគ​អាគ្នេយ៍​នៃ​ទីក្រុង ​Chittagong។ ដោយ​ឡែក​មនុស្ស​រាប់សិប​នាក់​ទៀត​បាន​រងរបួស​នៅ​ក្នុង​ទីក្រុង​ដាក្កា កាល​ពី​ថ្ងៃ​សុក្រ ក្រោយ​ពេល​ប៉ូលិស​ប្រើ​គ្រាប់​កាំភ្លើង​កៅស៊ូ និង​ឧស្ម័ន​បង្ហូរ​ទឹកភ្នែក ដើម្បី​ទប់ទល់​នឹង​ក្រុម​បាតុករ។

១ ថ្ងៃ ក្រោយ​មក កាល​ពី​ថ្ងៃ​សៅរ៍ សមាជិក​ក្រុម​ការពារ​អ៊ីស្លាម​រាប់រយ​នាក់ និង​ក្រុម​ដទៃទៀត​បាន​បើក​ក្បួន​ធ្វើ​ដំណើរ​ឆ្លង​កាត់​ក្រុង ​Chittagong និង Dhaka ដើម្បី​ធ្វើ​ការ​តវ៉ា​ប្រឆាំង​នឹង​ការ​ស្លាប់​របស់​អ្នក​គាំទ្រ​ពួក​គេ។

លេខាធិការ​រៀបចំ​ក្រុម​លោក AzizulHaque បាន​ប្រាប់​បាតុករ​នៅ​ក្រុង Chittagong ថា៖ «ប៉ូលិស​បាន​បើក​ការ​បាញ់​ប្រហារ​ទៅ​លើ​ក្រុម​អ្នក​គាំទ្រ​សន្តិភាព​របស់​ពួក​យើង។ យើង​នឹង​មិន​ធ្វើ​ឱ្យ​ឈាម​របស់​បងប្អូន​យើង​បាត់បង់​ដោយ​ទទេៗ​ឡើយ»។

ទោះជា​យ៉ាងណា​ក្ដី ក្រុម​ការពារ​អ៊ិស្លាម​បាន​អំពាវនាវ​ឱ្យមាន​កូដកម្ម​ទូទាំង​ប្រទេស​បន្ថែម​ទៀត កាល​ពី​ថ្ងៃអាទិត្យ​ដើម្បី​ប្រឆាំង​នឹង​ការ​បង្ក​ឱ្យ​មាន​មនុស្ស​ស្លាប់​នេះ។ ជាមួយ​គ្នា​នេះ​ដែរ អង្គការ​លើកលែង​ទោស​អន្តរជាតិ​ក៏​បាន​រិះគន់​ចំពោះ​សកម្មភាព​របស់​ប៉ូលិស​នៅ Chittagong ដែល​បង្ក​ឱ្យ​មាន​មនុស្ស​ស្លាប់​នេះ​ផង​ដែរ។

អ្នក​ស្រាវជ្រាវ​នៅ​អាស៊ី​ខាង​ត្បូង​នៃ​ប្រទេស​ស៊ុលតង់ ​លោក Mohammed Zakaria បាន​និយាយ​ថា៖ «សិទ្ធិ​ក្នុង​ការ​តវ៉ា ដោយ​សន្តិវិធី​ស្ថិត​ក្រោម​ការ​គំរាមកំហែង ជាពិសេស​ក្នុង​អំឡុង​ពេល​មាន​ជំងឺ​រាតត្បាត ដែល​ជា​ហេតុ​បង្ក​ឱ្យ​មាន​ការ​បង្ក្រាប​ដ៏​សាហាវ​បែប​នេះ»។

គួរ​បញ្ជាក់​ផង​ដែរ​ថា លោក Modi បាន​មក​ដល់​ទីក្រុង​ដាក្កា​ កាល​ពី​ថ្ងៃ​សុក្រ​កន្លង​ទៅ ដែល​ជា​ដំណើរ​ទស្សនកិច្ច​អន្តរជាតិ​លើក​ដំបូង​របស់​លោក​ចាប់​តាំង​ពី​មាន​ការ​ផ្ទុះ​ឡើង​នៃ​ជំងឺ​រាតត្បាត​មក ដែល​ការ​ធ្វើ​ទស្សនកិច្ច​នេះ គឺ​ដើម្បី​អបអរ​ខួប​លើក​ទី៥០ នៃ​ឯករាជភាព​របស់​បង់ក្លាដែស៕

អត្ថបទគួរចាប់អារម្មណ៍