.jpg)
លោក Win Myat Aye ធ្វើសន្និសីទកាសែតនៅក្រុងយុាំងហ្គោន។ AFP
ក្រុងយ៉ាំងហ្គោនៈ រដ្ឋាភិបាលមីយ៉ាន់ម៉ា កាលពីថ្ងៃអាទិត្យ បានបញ្ជាក់ថា ការពន្យារពេលណាមួយដល់ការបញ្ជូនជនភៀសខ្លួនរ៉ូហ៊ីងយ៉ា វិលត្រឡប់ទៅវិញនោះ គឺជាកំហុសរបស់បង់ក្លាដែស ត្រឹមតែរយៈពេល ៤ ថ្ងៃ នៅមុនកាលបរិច្ឆេទចាប់ផ្តើមដែលត្រូវបានគ្រោងទុកប្រកបដោយភាពចម្រូងចម្រាសនោះ។
ក្រោយពីមានឧបសគ្គជាច្រើននោះ ក្រុមប្រទេសនៅក្បែរខាង បានប្រកាសថា ក្រុមទី ១ មានជនមូស្លីមរ៉ូហ៊ីងយ៉ា ២២០០ នាក់ នឹងត្រូវបញ្ជូនត្រឡប់ទៅវិញនៅថ្ងៃទី ១៥ ខែវិច្ឆិកានេះ ទោះបីជាអង្គការ NGOs អន្តរជាតិ និងអង្គការសហប្រជាជាតិ បាននិយាយថា លក្ខខណ្ឌមិនទាន់ចូលជាធរមានសម្រាប់ការវិលត្រឡប់ប្រកបដោយសុវត្ថិភាពក្តី។
ជនមូស្លីមរ៉ូហ៊ីងយ៉ាជាង ៧២ ម៉ឺននាក់ បានភៀសខ្លួនពីរដ្ឋរ៉ាក់ឃីនភាគខាងលិចមីយ៉ាន់ម៉ានៅក្នុងការបង្ក្រាបដោយយោធានៅក្នុងខែសីហាកាលពីឆ្នាំ ២០១៧។
ក្រុមអ្នកនៅរស់រានមានជីវិតផ្តល់ឲ្យពួកគេនូវភ័ស្តុតាងនៃឃាតកម្ម ការចាប់រំលោភ ការធ្វើទារុណកម្ម និងការដុតបំផ្លាញផ្ទះសំបែង និងខ្លាចការវិលត្រឡប់ទៅរដ្ឋរ៉ាក់ឃីនវិញដោយគ្មាការធានាសុវត្ថិភាពសេរីភាពក្នុងការដើរហើរ និងការទទួលសញ្ជាតិ។
មីយ៉ាន់ម៉ា និងបង់ក្លាដែសបានចុះហត្ថលេខាលើកិច្ចព្រមព្រៀងនៅខែវិច្ឆិកា ឆ្នាំ ២០១៧ ប៉ុន្តែអង្គការសហប្រជាជាតិ បាននិយាយថា ការធ្វើមាតុនិវត្តន៍នោះ ត្រូវមានសុវត្ថិភាព មានសេចក្តីថ្លៃថ្នូរនិងដោយស្ម័គ្រចិត្ត។
រដ្ឋមន្ត្រីសុខុមាលភាពសង្គមលោក Win Myat Aye បានថ្លែងទៅកាន់ក្រុមអ្នកកាសែតនៅក្រុងយ៉ាំងហ្គោនកាលពីថ្ងៃអាទិត្យថា៖ «យើងបានត្រៀមខ្លួនរួចជាស្រេច»៕
