ការឃុំខ្លួនថ្នាក់ដឹកនាំដែលនៅគណបក្សដឹកនាំប្រជាធិបតេយ្យបានធ្វើឱ្យមានប្រតិកម្មពីបណ្តាមេដឹកនាំធំៗទាមទារការដោះលែងលោកស្រី Aung San Suu Kyi។
ប្រទេសមីយ៉ាន់ម៉ាត្រូវបានប្រកាសដាក់ប្រទេសក្នុងគ្រាមានអាសន្នប៉ុន្មានម៉ោងបន្ទាប់ពីប្រធានគណបក្សត្រូវបានចាប់ឃុំខ្លួន។ ប្រទេសមីយ៉ាន់ម៉ានឹងត្រូវគ្រប់គ្រងដោយកម្លាំងយោធារយៈពេល ១ ឆ្នាំ។
លោកស្រី Aung San Suu Kyi និងថ្នាក់ដឹកនាំមួយចំនួនត្រូវបានឃុំខ្លួនដោយកម្លាំងយោធាកាលពីព្រឹកថ្ងៃទី ១ កុម្ភៈក្រោយពីត្រូវបានចោទថាមានការក្លែងបន្លំសន្លឹកឆ្នោតនៅក្នុងការបោះឆ្នោតកាលពីខែវិច្ឆិកា ឆ្នាំ ២០២០។
ក្រោយពីមានការឃុំខ្លួនមេដឹកនាំគណបក្សនោះបាន ១ ថ្ងៃគណបក្សសម្ព័ន្ធជាតិដើម្បីប្រជាធិបតេយ្យបានចេញសេចក្តីថ្លែងការណ៍ទាមទារឱ្យមានការទទួលស្គាល់លទ្ធផលការបោះឆ្នោតកាលពីឆ្នាំមុន។ បន្ទាប់ពីមានការប្រកាសឱ្យទទួលស្គាល់លទ្ធផលការបោះឆ្នោតនោះហើយក៏មានការជំរុញឱ្យប្រជាជនបដិសេធការគ្រប់គ្រងប្រទេសដោយកងកម្លាំងយោធាដែរ។
ក្រៅពីមានការទាមទារពីគណបក្សកាន់អំណាចរួចមកក៏មានការចេញសេចក្តីថ្លែងការណ៍ពីបណ្តាថ្នាក់ដឹកនាំសំខាន់ៗមួយចំនួនផងដែរ។
ប្រធានាធិបតីអាមេរិក Joe Biden បាននិយាយថា ការគ្រប់គ្រងប្រទេសដោយកងយោធា និងការឃុំខ្លួនមន្ត្រីស៊ីវិលគឺជាការវាយលុកផ្ទាល់ទៅលើការផ្លាស់ប្តូរលទ្ធិប្រជាធិបតេយ្យ និងនីតិរដ្ឋរបស់ប្រទេស។
នៅក្នុងសេចក្តីថ្លែងការណ៍មួយលោក Biden បាននិយាយថា៖ «យើងនឹងធ្វើការជាមួយដៃគូរបស់យើងនៅទូទាំងតំបន់ និងពិភពលោកដើម្បីគាំទ្រដល់ការស្តារលទ្ធិប្រជាធិបតេយ្យ និងនីតិរដ្ឋក៏ដូចជាទទួលខុសត្រូវចំពោះអ្នកដែលទទួលខុសត្រូវចំពោះការផ្លាស់ប្តូរប្រជាធិបតេយ្យរបស់ប្រទេសមីយ៉ាន់ម៉ាផងដែរ»។
រដ្ឋមន្ត្រីការបរទេសអាមេរិកលោក Antony J Blinken ក៏បានសម្តែងនូវការព្រួយបារម្ភយ៉ាងខ្លាំង និងបានជំរុញឱ្យយោធាផ្លាស់ប្តូរសកម្មភាពរបស់ខ្លួនជាបន្ទាន់។ លោកបាននិយាយថា៖ «យើងសូមអំពាវនាវដល់មេដឹកនាំយោធាមីយ៉ាន់ម៉ាឱ្យដោះលែងមន្ត្រីរដ្ឋាភិបាល និងមេដឹកនាំសង្គមស៊ីវិលទាំងអស់ហើយគោរពឆន្ទៈរបស់ប្រជាជនមីយ៉ាន់ម៉ា»។
បន្ថែមពីការអត្ថាធិប្បាយរបស់ថ្នាក់ដឹកនាំអាមេរិក ថ្នាក់ដឹកនាំសហភាពអឺរ៉ុបក៏មានប្រតិកម្មទៅលើព្រឹត្តការណ៍ដែលកើតឡើងនៅប្រទេសមីយ៉ាន់ម៉ាដែរ។ អគ្គលេខាធិការសហភាពអឺរ៉ុបលោក Antonio Guterres បានថ្កោលទោសយ៉ាងខ្លាំងចំពោះការឃុំខ្លួនមេដឹកនាំរបស់មីយ៉ាន់ម៉ានៅមុនថ្ងៃបើកសម័យប្រជុំសភាថ្មីរបស់ប្រទេសនេះ។
លោកស្រី Michelle Bachelet ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបាននិយាយថា លោកស្រីមានការភ្ញាក់ផ្អើលចំពោះរបាយការណ៍ដែលថាមនុស្សចំនួន ៤៥ នាក់ត្រូវបានឃុំខ្លួន និងជំរុញឱ្យមានការដោះលែងពួកគេជាបន្ទាន់។ លោកស្រី Bachelet និយាយនៅក្នុងសេចក្តីថ្លែងការណ៍មួយពីទីក្រុងហ្សឺណែវថា មានការភ័យខ្លាចយ៉ាងខ្លាំងចំពោះការឃុំខ្លួនមេដឹកនាំមីយ៉ាន់ម៉ា និងបានអំពាវនាវឱ្យយោធាបញ្ឈប់សកម្មភាព។
ប្រធានសមាគមប្រជាជាតិអាស៊ីអាគ្នេយ៍ (អាស៊ាន) បានអំពាវនាវឱ្យមានការវិលត្រឡប់ទៅរកភាពប្រក្រតីវិញនៅក្នុងប្រទេសមីយ៉ាន់ម៉ាដែលជាសមាជិកនៃប្លុកទាំង ១០ ប្រទេស។
នៅក្នុងសេចក្តីថ្លែងការណ៍របស់សមាគមប្រជាជាតិអាស៊ានបានសរសេរថា៖ «យើងសូមបញ្ជាក់ម្តងទៀតថា ស្ថិរភាពនយោបាយនៅក្នុងរដ្ឋសមាជិកអាស៊ានគឺចាំបាច់ដើម្បីសម្រេចបាននូវសហគមន៍អាស៊ានប្រកបដោយសន្តិភាព ស្ថិរភាព និងវិបុលភាព។ យើងលើកទឹកចិត្តដល់ការបន្តការសន្ទនា ការផ្សះផ្សា និងការវិលត្រឡប់មករកភាពប្រក្រតីវិញស្របតាមឆន្ទៈ និងផលប្រយោជន៍របស់ប្រជាជនមីយ៉ាន់ម៉ា»។
ក្រៅពីថ្នាក់ដឹកនាំសំខាន់ៗមួយចំនួននេះបណ្តាប្រទេសនៅសហភាពអឺរ៉ុបក៏បានចេញសេចក្តីថ្លែងការណ៍ប្រតិកម្មផងដែរ ដូចជា ប្រទេសបារាំង អ៊ីតាលី អេស្ប៉ាញ និងអាល្លឺម៉ង់។ បន្ថែមពីប្រតិកម្មពីតំបន់អឺរ៉ុបនៅតំបន់អាស៊ី មានដូចជា ជប៉ុន ឥណ្ឌា បង់ក្លាដែស ម៉ាឡេស៊ី ឥណ្ឌូនេស៊ី សិង្ហបុរី និងហ្វីលីពីន។
ចំណែកឯមហាអំណាចលោកខាងកើតដូចជាលោក Dmitry Polyanskiy អនុប្រធានអគ្គរដ្ឋទូតរបស់រុស្ស៊ីប្រចាំ អ.ស.ប បាននិយាយថាក្រុមបេសកកម្មអ.ស.ប តំណាងប្រទេសរុស្ស៊ីកំពុងតែរង់ចាំការណែនាំពីរដ្ឋាភិបាលក្រុងម៉ូស្គូ ហើយលោកបន្ថែមថា ស្ថានភាពនៅប្រទេសមីយ៉ាន់ម៉ាមានភាព «ស៊ាំញាំ និងមិនអាចទស្សន៍ទាយបាន»។
រីឯព័ត៌មានរដ្ឋចិន Xinhua ចេញផ្សាយថាប្រទេសចិនចាត់ទុកថាវាជារឿង “កិច្ចការផ្ទៃក្នុង" ហើយជានិច្ចកាលរដ្ឋាភិបាលចិនតែងតែប្រកាន់ជំហរអព្យាក្រឹតលើហេតុការណ៍ដែលបានកើតឡើងនៅប្រទេសមីយ៉ាន់ម៉ាកន្លងមកផងដែរ៕