បន្ទាប់ពីមានបាតុកម្មតវ៉ាជាបន្តបន្ទាប់ កាលពីថ្ងៃអង្គារ ទី ៩ ខែកុម្ភៈ មានការប៉ះទង្គិចគ្នារវាងក្រុមបាតុករ និងប៉ូលិស ដែលបង្កឱ្យមានការរងរបួសស្នាមទាំង ២ ភាគី។ នេះបើតាមការរាយការណ៍របស់ទូរទស្សន៍រដ្ឋមីយ៉ាន់ម៉ា។
ស្ថានីយទូរទស្សន៍ និងវិទ្យុមីយ៉ាន់ម៉ា (Myanmar Radio and Television) បានរាយការណ៍ថា រថយន្តប៉ូលិស ១ គ្រឿង ត្រូវបានបំផ្លាញនៅឯបាតុកម្មនៅទីក្រុង Mandalay។ ការរាយការណ៍នោះបានបន្តថា ការតវ៉ានេះ ជាការរៀបចំឡើងដោយប្រជាជនដែលចង់ធ្វើឱ្យប៉ះពាល់ដល់ស្ថិរភាពរបស់ប្រទេសជាតិ។
ទាក់ទងនឹងប្រតិកម្មនៅប្រទេសមីយ៉ាន់ម៉ា អង្គការសហប្រជាជាតិមានការព្រួយបារម្ភក្រោយពីមានការរាយការណ៍ថា មានការប៉ះទង្គិចរវាងក្រុមបាតុករ និងប៉ូលិស។ អង្គការសហប្រជាជាតិបាននិយាយថា៖ «យោងតាមការរាយការណ៍ពីក្រុង Nay Pyi Taw, Mandalay និងទីក្រុងដទៃទៀតបាតុករជាច្រើននាក់បានរងរបួសខ្លះស្ថិតក្នុងស្ថានភាពធ្ងន់ធ្ងរ ដោយសារការប៉ះទង្គិចជាមួយកម្លាំងសន្តិសុខ»។
ប៉ូលិសបានបាញ់ទឹក ដើម្បីបង្ក្រាបក្រុមបាតុករនៅរដ្ឋធានី Nay Pyi Taw រយៈពេល ២ ថ្ងៃរួចមកហើយ។ មានការរាយការណ៍ថា ក្រុមប៉ូលិសបានបាញ់គ្រាប់កាំភ្លើងជ័រទៅលើក្រុមមនុស្សនៅក្នុងទីក្រុង Nay Pyi Taw បង្កឱ្យមានអ្នករបួសផងដែរ។ រីឯនៅទីក្រុង Mandalay វិញក្រុមប៉ូលិសបានបង្ក្រាបបាតុកម្មដោយការបាញ់ទឹក ដើម្បីបំបែកក្រុមបាតុករ។ យ៉ាងណាមិញក្រុមបាតុករក៏បានប្រមូលផ្តុំគ្នានៅទីក្រុង Yangon ដែលមានមនុស្សជាច្រើនបានធ្វើបាតុកម្មចាប់តាំងពីថ្ងៃទី ៦ កុម្ភៈ ប៉ុន្តែមិនមានសេចក្តីរាយការណ៍ថា មានអំពីអំពើហិង្សាកើតឡើងទេ។
ក្រុមអ្នកតវ៉ាកំពុងទាមទារឱ្យមានអំណាចត្រឡប់ទៅរដ្ឋាភិបាលស៊ីវិល និងកំពុងស្វែងរកសេរីភាពសម្រាប់លោកស្រី Aung San Suu Kyi និងសមាជិកគណបក្សរបស់លោកស្រីផ្សេងៗទៀត។ គួរបញ្ជាក់ផងដែរថា ប្រធានគណបក្សសម្ព័ន្ធជាតិ ដើម្បីប្រជាធិបតេយ្យលោកស្រី Aung San Suu Kyi និងសមាជិកគណបក្សផ្សេងទៀតត្រូវបានឃុំខ្លួនកាលពីថ្ងៃទី ១ ខែកុម្ភៈ ដោយមានការចោទប្រកាន់ថា មានការបន្លំសន្លឹកឆ្នោតដែលប្រព្រឹត្តឡើងកាលពីខែវិច្ឆិកា ឆ្នាំ ២០២០ កន្លងទៅ។
ការតវ៉ាត្រូវបានហាមឃាត់នៅតំបន់មួយចំនួននៃទីក្រុង Yangon និង Mandalay យោងទៅតាមបទបញ្ជាមួយដែលបានចេញកាលពីយប់ថ្ងៃទី ៨ កុម្ភៈ។ នៅតាមតំបន់ខ្លះការប្រមូលផ្តុំគ្នាដែលមានមនុស្សលើសពី ៥ នាក់រួមទាំងការធ្វើបាតុកម្មត្រួវបានហាមឃាត់រួមទាំងមានបម្រាមហាមឃាត់ការធ្វើដំណើរចាប់ពីម៉ោង ៨ យប់ដល់ម៉ោង ៤ ទៀបភ្លឺ។ អ្នកដែលបំពានអាចត្រូវផ្តន្ទាទោសដាក់ពន្ធនាគាររហូតដល់ ៦ ខែ ឬពិន័យជាប្រាក់។
ប្រព័ន្ធផ្សព្វផ្សាយរដ្ឋមីយ៉ាន់ម៉ាកាលពីថ្ងៃទី ៨ កុម្ភៈ បានផ្សព្វផ្សាយថា ក្រុមបាតុករកំពុងបង្កគ្រោះថ្នាក់ដល់ស្ថិរភាពរបស់ប្រទេស។ សេចក្តីថ្លែងការណ៍មួយពីក្រសួងព័ត៌មានដែលបានរាយការណ៍នៅស្ថានីយទូរទស្សន៍ MRTV បានប្រកាសថា៖ «ប្រជាធិបតេយ្យអាចត្រូវបានបំផ្លាញប្រសិនបើគ្មានវិន័យត្រឹមត្រូវ។ យើងនឹងត្រូវចាត់វិធានការតាមផ្លូវច្បាប់ ដើម្បីការពារសកម្មភាពដែលរំលោភលើស្ថិរភាពរបស់រដ្ឋសុវត្ថិភាពសាធារណៈ និងនីតិរដ្ឋ»។
បន្ថែមពីនេះ លោក Min Aung Hlaing បាននិយាយពីភាពចលាចលនៅក្នុងសុន្ទរកថាតាមទូរទស្សន៍នៅយប់ថ្ងៃទី ៨ កុម្ភៈថា ការលួចបន្លំសន្លឹកឆ្នោត គឺជាហេតុផលដែលយោធាត្រូវធ្វើការគ្រប់គ្រងប្រទេសមីយ៉ាន់ម៉ា នាពេលសព្វថ្ងៃនេះ។
លោកបាននិយាយបន្ថែមថា របបយោធារបស់លោកនឹងរៀបចំការបោះឆ្នោតថ្មីដូចដែលបានសន្យា ហើយប្រគល់អំណាចដល់អ្នកដែលឈ្នះឆ្នោត និងពន្យល់អំពីគោលនយោបាយដែលបានគ្រោងទុករបស់យោធាក្នុងការគ្រប់គ្រងស្ថានការណ៍កូវីដ ១៩ និងសេដ្ឋកិច្ច។
ក្រុមប្រឹក្សាសិទ្ធិមនុស្សរបស់អង្គការសហប្រជាជាតិដែលមានមូលដ្ឋាននៅទីក្រុងហ្សឺណែវ នឹងធ្វើការប្រជុំនៅថ្ងៃទី ១២ កុម្ភៈ ដើម្បីពិចារណាពីផលប៉ះពាល់នៃសិទ្ធិមនុស្ស។ ចក្រភពអង់គ្លេស និងសហភាពអឺរ៉ុបបានដឹកនាំការស្នើសុំសម័យប្រជុំពិសេសដែលនឹងមានការជជែកដេញដោលគ្នាជាសាធារណៈក្នុងចំណោមអ្នកការទូតទាក់ទងនឹងប្រទេសមីយ៉ាន់ម៉ា ហើយអាចនាំឱ្យមានដំណោះស្រាយណាមួយពីអន្តរជាតិ៕