កាលពីថ្ងៃអាទិត្យ ទី ២៥ ប្រទេសបារាំង បានកោះហៅឯកអគ្គរដ្ឋទូតខ្លួនប្រចាំប្រទេសតួកគីត្រឡប់មកវិញ ក្រោយពីប្រធានាធិបតីតួកគី លោក Racep Tayyip Erdogan បាននិយាយថា ប្រធានាធិបតីបារាំងលោក Emmanuel Macron ត្រូវការព្យាបាលសុខភាពផ្លូវចិត្ត។ សម្តីរបស់ប្រធានាធិបតីតួកគីទៅលើប្រធានាធិបតីបារាំងបែបនេះ គឺដើម្បីរិះគន់ឥរិយាបថរបស់លោក Macron ចំពោះជនមូស្លីមក្នុងប្រទេសបារាំង។
«តើបុគ្គលឈ្មោះ Macron នេះ មានបញ្ហាអ្វីជាមួយសាសនាអ៊ិស្លាម និងជនមូស្លីម?» លោក Erdogan បានចោទសួរបែបនេះនៅកិច្ចប្រជុំគណបក្សយុត្តិធម៌ និងអភិវឌ្ឍន៍ (AKP) របស់លោក។ លោក Erdogan បាននិយាយបន្ថែមទៀតថា៖ «លោក Macron ត្រូវការព្យាបាលសុខភាពផ្លូវចិត្ត! តើមានអ្វីផ្សេងទៀតដែលគួរនិយាយទៅកាន់ប្រមុខរដ្ឋម្នាក់ដែលជាបុគ្គលមិនយល់ពីសេរីភាពនៃជំនឿសាសនា ហើយបានប្រព្រឹត្តទង្វើរបៀបនេះចំពោះមនុស្សរាប់លាននាក់ដែលរស់នៅក្នុងប្រទេសខ្លួនដែលមានជំនឿសាសនាខុសៗគ្នា?»
វិមាន Elyse ដែលជាការិយាល័យរបស់ប្រធានាធិបតីបារាំងបាននិយាយថា សម្តីរបស់លោក Erdogan គឺជាការប្រមាថហើយបានកោះហៅឯកអគ្គរដ្ឋទូតខ្លួនប្រចាំក្រុងអង់ការ៉ាលោក Herve Magro មកពិគ្រោះយោបល់។
ជាការឆ្លើយតបនឹងសម្តីលោក Erdogan អ្នកនាំពាក្យវិមាន Elyse បាននិយាយថា៖ «ការអត្ថាធិប្បាយរបស់ប្រធានាធិបតី Erdogan គឺមិនអាចទទួលយកបានទេ។ ភាពជ្រុលលើសលប់ និងភាពជម្លើយ គឺមិនមែនជាវិធីសាស្ត្រទេ។
យើងទាមទារឱ្យលោក Erdogan ផ្លាស់ប្ដូរទិសដៅនៃគោលនយោបាយរបស់គាត់ ពីព្រោះវាមានគ្រោះថ្នាក់គ្រប់បែបយ៉ាង។ យើងនឹងមិនចូលរួមក្នុងការវាយប្រហារពាក្យសម្តី ដែលមិនចាំបាច់ ហើយក៏មិនទទួលយកការប្រមាថនោះដែរ។»
គួរកត់សម្គាល់ថា ការថ្លែងសុន្ទរកថារបស់លោក Erdogan ជាសញ្ញាមួយនៃប្រតិកម្មកំពុងកើនឡើងក្នុងបណ្ដាប្រទេសកាន់សាសនាអ៊ិស្លាមបង្កឡើងដោយសារតែការអះអាងរបស់លោក Macron ថា សាសនាអ៊ិស្លាមថាជាសាសនាមួយដែលកំពុងមានវិបត្តិនៅទូទាំងពិភពលោក ដោយសារតែប្រកាន់ជំហរតឹងតែងខ្លាំង។ ប្រទេសក្នុងតំបន់អារ៉ាប់មួយចំនួនបានធ្វើពហិការមិនទិញផលិតផលបារាំង។
ក្នុងខែនេះ លោក Macron បានប្ដេជ្ញាថា នឹងបង្ក្រាបក្រុម «អ៊ិស្លាមបំបែកខ្លួននិយម» បន្ទាប់ពីប្រទេសបារាំង ត្រូវបានរង្គោះរង្គើដោយការសម្លាប់កាត់ក្បាលលោក Samuel Paty កាលពីថ្ងៃទី ១៦ ខែតុលា។ លោក Paty គឺជាសាស្ត្រាចារ្យប្រវត្តិវិទ្យា និងភូមិវិទ្យាម្នាក់ ដែលបានបង្រៀនសិស្សអំពីសេរីភាពនៃការបញ្ចេញមតិដោយលោកបានប្រើប្រាស់រូបត្លុកអំពីព្យាការី Muhammad គូរដោយកាសែតកំប្លែង Charlie Hebdo បង្ហាញដល់សិស្ស ដែលនេះជាការប្រមាថសាសនាអ៊ិស្លាម បើទោះជាការបង្ហាញនោះជាផ្នែកមួយនៃសេរីភាពនៃការបញ្ចេញមតិក៏ដោយ។
មនុស្ស ៧ នាក់ ក្នុងនោះមាននិស្សិត ២ នាក់ ត្រូវបានចាប់ខ្លួនទាក់ទងនឹងការធ្វើឃាត លោក Paty ហើយឃាតករជាជនជាតិឆេឆីន អាយុ ១៨ ឆ្នាំ ត្រូវបានប៉ូលិសបាញ់ស្លាប់នៅជិតកន្លែងកើតហេតុ។
ហេតុការណ៍សម្លាប់កាត់ក្បាលលោក Samuel Paty កើតឡើងចំពេលមានការជំនុំជម្រះលើរឿងក្តីប្រវត្តិសាស្រ្តទៅលើអ្នកសមគំនិត ១៤ នាក់ នៅក្នុងការវាយប្រហារមួយកាលពីខែមករា ឆ្នាំ ២០១៥ ទៅលើកាសែត Charlie Hebdo ដែលបានចុះផ្សាយគំនូរត្លុកអំពីព្យការី Muhammad ដែលអំពើបែបនេះ ត្រូវហាមឃាត់យ៉ាងតឹងរ៉ឹងដោយអ្នកគោរពសាសនាអ៊ិស្លាម។
នៅក្នុងការបាញ់ប្រហារកាលពីឆ្នាំ ២០១៥ ជនល្មើស ២ នាក់ បានបើកការវាយប្រហារបណ្តាលឱ្យបុគ្គលិកកាសែត Charlie Hebdo ចំនួន ១២ រូបស្លាប់។
គួរបញ្ជាក់ថា រូបគំនូរនៃព្យាការីមូហាម៉ាត់ អាចបង្កការប្រមាថយ៉ាងធ្ងន់ធ្ងរក្នុងសហគមន៍មូស្លីម ព្រោះសាសនាអ៊ិស្លាមហាមឃាត់ការប្រីប្រាស់រូបព្រះអាល់ឡោះ និងព្យាការីមូហាម៉ាត់។
យ៉ាងណាមិញ ជម្លោះការទូតនេះ គឺជាបញ្ហាចុងក្រោយបង្អស់ដែលធ្វើឱ្យភាពតានតឹងរវាងបារាំង និងតួកគីកើនឡើង។ បើទោះបីជាប្រទេសទាំង ២ គឺជាសម្ព័ន្ធមិត្តក្នុងអង្គការណាតូក៏ដោយ ក៏ពួកគេមានគោលនយោបាយផ្ទុយគ្នាលើបញ្ហាភូមិសាស្ត្រនយោបាយមួយចំនួនដែលរួមមានសង្គ្រាមស៊ីវិលនៅស៊ីរី និងលីប៊ីជម្លោះនៅមេឌីទែរ៉ាណេខាងកើត និងជម្លោះរវាងអាមេនី និងអាហ្ស៊ែបៃហ្សង់ក្នុងតំបន់ Nagorno Karabakh ដែរ៕