.jpg)
លោកប្រធានាធិបតី Emmanuel Macronថ្លែងក្នុងជំនួបតាមវីដេអូខន់ហ្វើរិជាមួយក្រុមមេដឹកនៃតំបន់Sahel។ AFP
កាលពីថ្ងៃអង្គារ ទី ១៦ កុម្ភៈ ប្រទេសបារាំង បានច្រានចោលចំពោះការលើកឡើងទាក់ទងនឹងការកាត់បន្ថយកងទ័ពនៅតំបន់ Sahel នៃអាហ្វ្រិកខាងលិច។ ប្រធានាធិបតីបារាំងលោក Emmanuel Macron បានបដិសេធការកាត់បន្ថយកងទ័ពបារាំងនៅអាហ្វ្រិកខាងលិចដោយនិយាយថា ការដកកងទ័ពចេញពីតំបន់នោះអាចជាកំហុសមួយ។
ការសម្រេចចិត្តមិនដកកងទ័ពចេញពីតំបន់នោះ គឺធ្វើឡើងបន្ទាប់ពីមានការប្រជុំរវាងប្រទេសចំនួនប្រាំ និងសម្ព័ន្ធមិត្តនៅតំបន់ Sahel ។ បញ្ហានៃតំបន់ Sahel បានរីករាលដាលដល់តំបន់ឆ្នេរអាហ្រ្វិកខាងលិចដែលក្រុមសកម្មប្រយុទ្ធមានទំនាក់ទំនងជាមួយអាល់កៃដានិងរដ្ឋអ៊ិស្លាម។
តំបន់ភាគខាងលិច Sahel ត្រូវបានយកចិត្តទុកដាក់ដោយអន្តរជាតិដោយសារតែជម្លោះអាវុធដែលមានការចូលរួមពីក្រុមប្រដាប់អាវុធជាច្រើន។ ក្រុមប្រដាប់អាវុធទាំងនោះមានដូចជាយុទ្ធនាការរបស់កងទ័ពជាតិដៃគូអន្តរជាតិក៏ដូចជាកងជីវពលក្នុងតំបន់។
លោក Macron បាននិយាយថា វត្តមានរបស់បារាំងនឹងពឹងផ្អែកទៅលើការចូលរួមរបស់បណ្តាប្រទេសដទៃទៀតនៅក្នុងក្រុម Takuba Task Force ដែលកំពុងប្រយុទ្ធជាមួយក្រុមសកម្មប្រយុទ្ធនៅក្នុងតំបន់ Sahel។
ប្រទេសហុងគ្រីក្រិក និងស៊ែប៊ី មានឆន្ទៈចូលរួមជាមួយកម្លាំងអន្តរជាតិក្នុងការដាក់កងទ័ពនៅតំបន់ Sahel។ រីឯប្រទេសអាល្លឺម៉ង់ នឹងមិនផ្គត់ផ្គង់កងទ័ពសម្រាប់បេសកកម្មប្រយុទ្ធនៅតំបន់ Sahel ទេ ព្រោះខ្លួនចង់ផ្តោតលើគម្រោងអភិវឌ្ឍន៍ក្នុងប្រទេស៕
