ក្រុងប៉ារីស៖ ខណៈដែលសេវារថភ្លើង និងរថភ្លើងក្រោមដី នៅតែរងការរំខាន ដោយសារកូដកម្មប្រឆាំងនឹងកំណែទម្រង់ប្រាក់សោធននិវត្តន៍រយៈពេល ៥ ថ្ងៃជាប់គ្នា កាលពីថ្ងៃចន្ទនោះ រដ្ឋាភិបាលបារំាងកំពុងបង្កើនកិច្ចខិតខំប្រឹងប្រែងក្នុងការកែប្រែកំណែទម្រង់ប្រាក់សោធននិវត្តន៍ ដោយសុខចិត្តធ្វើការចរចាជាមួយក្រុមសហជីពការងារ ដើម្បីបញ្ចប់វិបត្តិសង្គម។
តំណាងជាន់ខ្ពស់ផ្នែកប្រាក់សោធននិវត្តន៍របស់រដ្ឋាភិបាល លោក Jean-Paul Delevoye និងរដ្ឋមន្ត្រីនៃក្រសួងសាមគ្គីភាព និងសុខភាពលោក Agnes Buzyn កាលពីរសៀលថ្ងៃចន្ទ បានកោះប្រជុំក្រុមសហជីពការងារ ដើម្បីពិភាក្សាបញ្ចប់ការពិគ្រោះយោបល់រយៈពេល ១ ខែ ដើម្បីស្វែងរកមធ្យោបាយកែប្រែរបបសោធននិវត្តន៍របស់ប្រទេសនេះ។
លោក Delevoye បានថ្លែងបន្ទាប់ពីកិច្ចប្រជុំនោះថា៖ «ខ្ញុំជឿជាក់ថាស្ថានភាពនេះ មិនអាចគ្រប់គ្រងបានតទៅទៀត ហើយគម្រោងនេះ មានការចាំបាច់ណាស់ និងថា ក្មេងជំនាន់ក្រោយៗដឹងគុណចំពោះពួកយើង»។
លោកបានបន្ថែមថា៖ «កិច្ចការអាទិភាព ដែលបានកើត (ចេញពីការចរចានោះ) គឺការទាមទារឲ្យភាពស្មើគ្នា និងសាមគី្គភាព ដោយបានបញ្ជាក់ថាការពិភាក្សានោះ នឹងបន្តរហូតដល់ឆ្នាំក្រោយ ខណៈដែលភាពខ្វែងគំនិតគ្នាខ្លះនៅតែកើតមាន»។
ដោយបានយកសំណើនានារបស់សហជីពមកពិចារណានោះ លោកនាយករដ្ឋមន្ត្រី Edouard Philippe គ្រោងនឹងបង្ហាញពីបែបបទនៃការកែទម្រង់ប្រាក់សោធននិវត្តន៍នៅថ្ងៃពុធនេះ៕ Xinhua/PSA