.jpg)
នាយករដ្ឋមន្ត្រីបារ៉ែនលោកKhalifa bin Salman Al-Khalifa (ស្តាំ) ចាប់ដៃជាមួយជាស្តេចអារ៉ាប៊ូ សាអ៊ូឌីត Salman bin Abdulaziz Al-Saud។ AFP
ក្រុងឌូបៃ ប្រភពផ្នែកយុត្តិធម៌បារ៉ែន បានឲ្យដឹង កាលពីថ្ងៃព្រហស្បតិ៍ថា តុលាការបារ៉ែនមួយ បានកាត់ទោសពលរដ្ឋស៊ីអ៊ីត ២៤ នាក់ឲ្យជាប់ពន្ធនាគារ និងដកហូតសញ្ជាតិពីពួកគេ ក្រោយពីរកឃើញថា ពួកគេមានទោសពីបទបង្កើត«ក្រុមភេរវកម្ម»។
ការចោទប្រកាន់ជាច្រើនទៀតរួមមានការធ្វើដំណើរទៅអ៊ីរ៉ាក់ និងអ៊ីរ៉ង់ ដើម្បីហ្វឹកហាត់ប្រើប្រាស់អាវុធ និងគ្រឿងផ្ទុះ និងប៉ុនប៉ងសម្លាប់មន្ត្រីប៉ូលិស។
តុលាការឧក្រិដ្ឋកម្មជាន់ខ្ពស់កាលពីថ្ងៃពុធ បានកាត់ទោសជនជាប់ចោទ ១០ នាក់ក្នុងចំណោមជនជាប់ចោទទាំងអស់ ឲ្យជាប់គុកមួយជីវិត និង ១០ នាក់ទៀត ជាប់គុក ១០ ឆ្នាំ និង ៤ នាក់ផ្សេងទៀតជាប់គុកពី ៣ ឆ្នាំ ទៅ ៥ ឆ្នាំ។
ព្រះរាជាណាចក្រភាគច្រើននិកាយស៊ីអ៊ីត គ្រប់គ្រងដោយនិកាយ ស៊ុននី បានដកហូតសញ្ជាតិពីពលរដ្ឋរបស់ខ្លួនរាប់រយនាក់ និង ដាក់គុកសកម្មជនល្បីៗ និងបព្វជិតសាសនារាប់សិបនាក់ ចាប់តាំងពីមានការតវ៉ាទាមទារឲ្យមានរដ្ឋាភិបាលជាប់ឆ្នោត បានផ្ទុះឡើង កាលពីដើមឆ្នាំ ២០១១។
រដ្ឋាភិបាលបារ៉ែន បានចោទប្រកាន់អ៊ីរ៉ង់ស៊ីអ៊ីត ពីបទគាំទ្រការតវ៉ាទាំងនោះ និង ប៉ុនប៉ងផ្តួលរំកលំរដ្ឋាភិបាលនេះ។ ក្រុងតេអេរ៉ង់ បដិសេធថា គ្មានការពាក់ព័ន្ធនោះ៕ PSA
