នៅរយៈពេល ២ ថ្ងៃជាប់គ្នា បុគ្គលិកសុខាភិបាលអាមេរិក ២ រូប ដែលធ្វើការនៅមន្ទីរពេទ្យតែមួយនៅរដ្ឋ Alaska បានចេញរោគសញ្ញាប្រតិកម្មអាល្លែកហ្ស៊ីធ្ងន់ធ្ងរប៉ុន្មាននាទី ក្រោយពីពួកគេបានទទួលវ៉ាក់សាំង Covid-19 ផលិតដោយក្រុមហ៊ុន Pfizer/BioNTech។
ករណីទី១ គឺបានកើតឡើងនៅថ្ងៃអង្គារ ទី ១៥ ដោយបុគ្គលិកសុខាភិបាលទី១ គឺជាស្ត្រីវ័យកណ្ដាលដែលមិនមានប្រវត្តិអាល្លែកហ្ស៊ី។ ក្នុងរយៈពេល ១០ នាទី បន្ទាប់ពីទទួលវ៉ាក់សាំង ស្ត្រីម្នាក់នេះមានប្រតិកម្មអាណាហ្វីឡាក់ទិច ដោយមានរោគសញ្ញាកន្ទួលលើមុខ និងដងខ្លួន ការពិបាកដកដង្ហើម និងចង្វាក់បេះដូងកើនឡើង។
បុគ្គលិកទី១ ដំបូងត្រូវចាក់ថ្នាំ Epinephrine (Adrenaline) ដែលជាថ្នាំស្តង់ដាសម្រាប់ព្យាបាលប្រតិកម្មអាល្លែកហ្ស៊ីធ្ងន់ធ្ងរ។ រោគសញ្ញារបស់ស្ត្រីម្នាក់ត្រូវបានធូរស្បើយ ប៉ុន្តែក្រោយមកលេចចេញជាថ្មី ហើយត្រូវបានបន្តព្យាបាលដោយប្រើថ្នាំ Steroid និងដាក់ព្យួរថ្នាំ Epinephrine បន្ថែម។ នៅថ្ងៃពុធ លោកស្រីបានធូរស្បើយរោគសញ្ញាហើយបានផ្ដាច់ថ្នាំតែវេជ្ជបណ្ឌិតបញ្ជាឱ្យសម្រាកនៅមន្ទីរពេទ្យ ដើម្បីធ្វើការតាមដាន។
រីឯករណីទី២ គឺបានកើតឡើងនៅថ្ងៃពុធ ទី ១៦ ដោយបុគ្គលិកសុខាភិបាលទី២ បានចេញរោគសញ្ញា ហើមភ្នែកវិលមុខ និងរមាស់បំពង់ក ១០ នាទី ក្រោយពីបានទទួលវ៉ាក់សាំង។ លោកត្រូវបានគេនាំទៅបន្ទប់សង្គ្រោះបន្ទាន់ ហើយព្យាបាលជាមួយ EpinephrinePepcid និង Benadryl។
មន្ទីរពេទ្យមិនបានសន្និដ្ឋានថា ប្រតិកម្មនេះ គឺជាប្រតិកម្មអាណាហ្វីឡាក់ទិចទេ ហើយលោកបានសះស្បើយប៉ុន្មានម៉ោងក្រោយមកហើយបានអនុញ្ញាតឱ្យចេញវិញ។
កាលពីយប់ថ្ងៃពុធ មន្ទីរពេទ្យ Bartlett នៅទីក្រុង Juneau រដ្ឋ Alaska បានផ្ដល់វ៉ាក់សាំងជូនបុគ្គលិកសុខាភិបាលចំនួន ១៤៤ រូប ហើយបានបង្ហាញថា ពួកគេនឹងបន្តផែនការចាក់វ៉ាក់សាំង ដោយមិនប៉ះពាល់ដោយករណីអាល្លែកហ្ស៊ីទាំង ២ នេះទេ។
បើទោះបីជាវ៉ាក់សាំង Pfizer/BioNTech ត្រូវបានបង្ហាញថា មានសុវត្ថិភាព និងមានប្រសិទ្ធភាពប្រហែល ៩៥ ភាគរយ ក្នុងការសាកល្បងដោយមាន ការចូលរួមពីអ្នកចូលរួមចំនួន ៤៤ ០០០ នាក់ក៏ដោយ ក៏ករណីអាល្លែកហ្ស៊ីទាំងនេះអាចប៉ះពាល់ដល់ភាពទុកចិត្តទៅលើសុវត្ថិភាពនៃវ៉ាក់សាំងនេះ។ អ្នកវិភាគមួយចំនួនគិតថា អាចនឹងមានការរឹតបន្តឹងការណែនាំលើការផ្ដល់វ៉ាក់សាំង ដើម្បីធានាសុវត្ថិភាពនៃអ្នកទទួលវ៉ាក់សាំង។
កាលពីសប្ដាហ៍មុន ចក្រភពអង់គ្លេសបានហាមឃាត់ជនដែលមានប្រវត្តិអាល្លែកហ្ស៊ីធ្ងន់ធ្ងរមិនឱ្យទទួលវ៉ាក់សាំងនេះ ក្រោយបុគ្គលិកសុខាភិបាល ២ រូប បានប្រតិកម្មអាណាហ្វីឡាក់ទិច ហើយបានកំណត់ឱ្យការផ្ដល់វ៉ាក់សាំងត្រូវប្រព្រឹត្តទៅនៅកន្លែងដែលមានឧបករណ៍ជួយសង្គ្រោះ។
ករណីទាំង ២ នេះ គឺត្រូវបានគេរំពឹងថា នឹងត្រូវពិភាក្សាដោយគណៈកម្មការប្រឹក្សាយោបល់របស់ FDA ដែលនឹងជួបប្រជុំនៅថ្ងៃព្រហស្បតិ៍ ដើម្បីពិភាក្សាថា តើគួរអនុញ្ញាតឱ្យប្រើប្រាស់វ៉ាក់សាំងក្រុមហ៊ុន Mordena ក្នុងគ្រាអាសន្នដែរ ឬទេ? បើទោះបីជាវ៉ាក់សាំង Pfizer និងវ៉ាក់សាំង Morderna គឺជាវ៉ាក់សាំងប្រភេទ mRNA ទាំង ២ ហើយមានគ្រឿងផ្សំស្រដៀងគ្នាគេមិនទាន់ដឹងថា វ៉ាក់សាំង Morderna នឹងបង្កឱ្យមានប្រតិកម្មអាល្លែកហ្ស៊ីដូចវ៉ាក់សាំង Pfizer/BioNTech ដែរ ឬទេ?
បញ្ហាមួយទៀតដែល Pfizer បានប្រឈម គឺបញ្ហាកង្វះវត្ថុធាតុដើមសម្រាប់ផលិតវ៉ាក់សាំងពួកគេ ហើយនឹងធ្វើការកាត់បន្ថយគោលដៅផលិតកម្ម។ កាលពីខែសីហា ក្រុមហ៊ុន Pfizer បាននិយាយថា ពួកគេមានគោលដៅផលិតវ៉ាក់សាំងចំនួន ១០០ លានដូស ត្រឹមដំណាច់ឆ្នាំ ២០២០។
យ៉ាងណាមិញ កាលពីថ្ងៃពុធក្រុមហ៊ុនចិន Shanghai Fosun Pharmaceutical Group បានបញ្ជាទិញវ៉ាក់សាំង Pfizer/BioNTech ចំនួន ១០០ លានដូស សម្រាប់ចែកចាយក្នុងប្រទេសចិន ខណៈពេលដែលបេក្ខជនវ៉ាក់សាំងចិនផ្សេងទៀតដូចជា Sinovac និង Sinopharm គឺកាន់តែខិតជិតការអនុញ្ញាតឱ្យប្រើប្រាស់ក្នុងប្រទេស។
បារាំងក៏បានបញ្ជាទិញយកវ៉ាក់សាំង Pfizer/BioNTech ផងដែរ ខណៈពេលដែលអាល្លឺម៉ង់ ជំរុញសហភាពអឺរ៉ុបឱ្យអនុញ្ញាតប្រើប្រាស់ក្នុងគ្រាអាសន្ន៕