ក្រុងអ៊ីស្លាម៉ាបាដៈ លោកនាយករដ្ឋមន្ត្រីប៉ាគីស្ថាន អ៊ីមរ៉ាន ខាន់ កាលពីថ្ងៃសៅរ៍ បានស្វាគមន៍ការសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ ធ្វើការពិភាក្សាអំពីភាពតានតឹងនៅក្នុងតំបន់កាស្មៀរដែលមានជម្លោះ ១ ថ្ងៃ ក្រោយពីឥណ្ឌារិះគន់ជំនួបដ៏កម្រនេះ។
ភាពតានតឹងបានកើនឡើងយ៉ាងខ្លាំង ចាប់តាំងពីប្រទេស ឥណ្ឌា កាលពីដើមខែនេះ បានកាត់យកផ្នែកនៃតំបន់កាស្មៀរ ដែលខ្លួនបានគ្រប់គ្រងស្វ័យភាពរបស់ខ្លួន ដែលបាននាំឲ្យមានការអំពាវនាវពីប្រទេស ប៉ាគីស្ថាន សុំឲ្យសហគមន៍អន្តរជាតិ ដើម្បីអន្តរាគមន៍ទៅលើបញ្ហាមានអាយុ ២ ទសវត្សរ៍ហើយនោះ។
លោក ខាន់ បានថ្លែងនៅលើគេហទំព័រធ្វីធើរ ក្រោយពីការចរចានៅក្រុងញូវយ៉កកាលពីថ្ងៃសុក្រ ជាលើកទី១ ដែលផ្តោតទៅលើតំបន់ហិមាល័យចាប់តាំងពីឆ្នាំ ១៩៧១ ថា៖ «ខ្ញុំបានស្វាគមន៍ជំនួបរបស់ក្រុមប្រឹក្សាសន្តិសុខ ដើម្បីពិភាក្សាស្ថានភាពដ៏ធ្ងន់ធ្ងរនៅតំបន់កាស្មៀរនោះ»។
លោកបានថ្លែងថា៖ «ការដោះស្រាយការឈឺចាប់របស់ប្រជាជនកាស្មៀរ និងធានាឲ្យមានដំណោះស្រាយចំពោះជម្លោះនោះ គឺជាការទទួលខុសត្រូវរបស់អង្គការពិភពលោកមួយនេះ»។
លោករដ្ឋមន្ត្រីការបរទេស Shah Mehmood Qureshi បានថ្លែងថា ប្រទេស ប៉ាគីស្ថាន កំពុងបង្កើតការិយាល័យរបស់កាស្មៀរនៅរដ្ឋធានីនានានៅបរទេស ដើម្បីបញ្ចុះបញ្ចូលឲ្យមានការគាំទ្រដល់ពលរដ្ឋកាស្មៀរ។
លោកនាយករដ្ឋមន្ត្រីប៉ាគីស្ថាន អ៊ីមរ៉ាន ខាន់ បានថ្លែងប្រាប់សន្និសីទកាសែតមួយជាមួយអ្នកនាំពាក្យយោធាលោក Asif Ghafoorថា កងកម្លាំងប្រដាប់អាវុធរបស់ប្រទេសនេះ នឹងត្រៀមធ្វើការឆ្លើយតបទៅនឹងទង្វើបង្កគ្រោះថ្នាក់ណាមួយរបស់ឥណ្ឌាបន្ទាប់ពីជំនួបជាមួយអង្គការសហប្រជាជាតិ៕ AFP/PSA