.jpg)
លោក ម៉ៃក៍ ប៉ុមប៉េអូ (ឆ្វេង) និយាយជាមួួយលោក Anastasiades។ AFP
ក្រុងកូវ៉ែតៈ អ្នកការទូត កំពូលអាមេរិក លោក ម៉ៃក៍ ប៉ុមប៉េអូ កាលពីថ្ងៃពុធ បានស្វះស្វែងជំរុញឲ្យរណសិរ្សរួបរួមមួយប្រឆាំងអ៊ីរ៉ង់នៅអំឡុងពេលដំណើរទស្សនកិច្ចនៅមជ្ឈិមបូព៌ា ដែលនៅក្នុងនោះនឹងរួមមានកិច្ចចរចាមួយចំនួន ជាមួយសម្ព័ន្ធមិត្តសំខាន់របស់ក្រុងវ៉ាស៊ីនតោនគឺ លោក នាយករដ្ឋមន្ត្រី បេនចាមីន នេតានីយ៉ាហ៊ូ ឲ្យបានមុនការបោះឆ្នោតនៅអ៊ីស្រាអែល។
រដ្ឋមន្ត្រីក្រសួងការបរទេសអាមេរិករូបនេះបានចាប់ផ្តើមធ្វើដំណើរទស្សនកិច្ចរបស់លោកនៅក្រុងកូវ៉ែត ជាទីដែលលោក បានជួបជាមួយ លោក Emir Sheikh Sabahal-Ahmad Al-Sabah មុននឹងលោកបន្តដំណើរទៅអ៊ីស្រាអែល និងលីបង់។
លោក ប៉ុមប៉េអូ បានថ្លែងប្រាប់ក្រុមអ្នកកាសែតនៅលើយន្តហោះចេញពីអាមេរិកថា លោកនឹងពិភាក្សា «អំពីកិច្ចសន្ទនាយុទ្ធសាស្ត្រ» និងត្រូវការប្រយុទ្ធប្រឆាំង «ទៅនឹងការគំរាមកំហែង ដែលបានបង្កឡើងដោយសាធារណរដ្ឋអ៊ិស្លាម គឺ អ៊ីរ៉ង់» ជាមួយក្រុមមេដឹកនាំនៅក្នុងតំបន់នោះ។
លោក បានជំរុញឲ្យដើរតួនាទីឲ្យបានច្រើនបន្ថែមទៀត សម្រាប់សម្ព័ន្ធមិត្តយុទ្ធសាស្ត្រមជ្ឈិមបូព៌ា គឺ អង្គការណាតូអារ៉ាប់គាំទ្រដោយអាមេរិក ដែលមានគោលបំណងរួបរួមជាមួយសម្ព័ន្ធមិត្តអារ៉ាប់របស់ក្រុងវ៉ាស៊ីនតោនប្រឆាំងក្រុងតេអេរ៉ង់។
បន្ទាប់ពីកូវ៉ែត លោក ប៉ុមប៉េអូ នឹងហោះទៅកាន់ប្រទេស អ៊ីស្រាអែល ជាទីដែលយុទ្ធនាការបោះឆ្នោតមួយ គឺនៅក្នុងប៉ុន្មានសប្តាហ៍ចុងក្រោយរបស់អ៊ីស្រាអែល ដោយលោក នេតានីយ៉ាហ៊ូ កំពុងធ្វើការប្រជែងជាមួយគូបដិបក្ខអ្នកកណ្តាលនិយមរបស់លោក។
ចំណែកក្រុងវ៉ាស៊ីនតោនបានបញ្ជាក់ថា ខ្លួន មិនជ្រៀតជ្រែកក្នុងកិច្ចការនយោបាយ របស់អ៊ីស្រាអែលនោះទេ។
ដំណើរទស្សនកិច្ចរបស់លោកត្រូវបានគេមើលឃើញថា ជាសញ្ញាមួយនៃការគាំទ្រ លោក នេតានីយ៉ាហ៊ូ ដែលកំពុងតស៊ូ ដើម្បីរក្សាអំណាចយ៉ាងណែននៅក្នុងដៃរបស់លោក ខណៈលោកកំពុងប្រឈមនឹងការចោទប្រកាន់ពីបទពុករលួយ និងការកិបកេងប្រាក់របស់រដ្ឋ៕ AFP/SK
