ប៉ូលិសមីយ៉ាន់ម៉ាបានដាក់ពាក្យបណ្ដឹងលើមេដឹកនាំដែលត្រូវបានបណ្ដេញចេញពីតំណែងលោកស្រី អ៊ុងសាន ស៊ូជី ពីបទការនាំចូលឧបករណ៍សារគមនាគមន៍ខុសច្បាប់ធ្វើឱ្យមានមូលដ្ឋានឃុំខ្លួនលោកស្រីរហូតដល់ថ្ងៃទី ១៥ កុម្ភៈ សម្រាប់ធ្វើការស៊ើបអង្កេត។ នេះបើតាមឯកសារប៉ូលិសបញ្ជូនទៅតុលាការកាលពីថ្ងៃពុធ ទី ៣ កុម្ភៈ។
ឯកសារនោះ សរសេរថា ប៉ូលិសបានរកឃើញវិទ្យុទាក់ទងចំនួន ៦ ក្នុងការឆែកឆេរគេហដ្ឋានរបស់លោកស្រីនៅរដ្ឋធានី Naypyidaw កាលពីថ្ងៃចន្ទ ទី ១ កុម្ភៈ ដែលអះអាងថា ឧបករណ៍ទាំងនោះ គឺត្រូវបាននាំចូលដោយខុសច្បាប់ ហើយប្រើប្រាស់ដោយមិនមានការអនុញ្ញាត។
ប៉ូលិសបានស្នើសុំការឃុំខ្លួនលោកស្រី អ៊ុងសាន ស៊ូជី គឺ «ដើម្បីសាកសួរសាក្សីស្នើសុំភ័ស្តុតាង និងស្វែងរកការប្រឹក្សាផ្នែកច្បាប់បន្ទាប់ពីសាកសួរចុងចោទ»។
ប្រសិនបើលោកស្រីត្រូវបានតុលាការរកឃើញថា មានពិរុទ្ធភាពលោកស្រីអាចប្រឈមមុខការជាប់ពន្ធនាគារជាអតិបរមា ៣ ឆ្នាំ។
ឯកសារមួយផ្សេងទៀត បានបង្ហាញថា ប៉ូលិសបានដាក់ពាក្យបណ្ដឹងទៅលើលោកប្រធានាធិបតី Win Myint ក្រោមការចោទប្រកាន់ថា លោកបានរំលោភគោលការណ៍ប្រយុទ្ធប្រឆាំងការឆ្លងជំងឺកូវីដ ១៩ កាលពីលោកធ្វើយុទ្ធនាការបោះឆ្នោត។
ការដាក់ពាក្យបណ្ដឹងធ្វើឡើងបន្ទាប់ពីកងយោធាមីយ៉ាន់ម៉ាបានធ្វើរដ្ឋប្រហារ និងចាប់ខ្លួនលោកស្រី អ៊ុងសាន ស៊ូជី និងមន្ត្រីរដ្ឋាភិបាលស៊ីវិលផ្សេងទៀត។ កងយោធាបានអះអាងថា រដ្ឋាភិបាលស៊ីវិលមិនបានធ្វើការស៊ើបអង្កេតលើការក្លែងបន្លំការបោះឆ្នោតប្រព្រឹត្តកាលពីខែវិច្ឆិកា ២០២០ ដែលគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អ៊ុងសាន ស៊ូជី បានឈ្នះអាសនៈរដ្ឋសភាចំនួន ៣៩៦ ក្នុងចំណោម ៤៧។ កាលពីថ្ងៃចន្ទ ទី ១ កុម្ភៈ កងយោធាបានប្រកាសថា អំណាចទាំងអស់ត្រូវបានផ្ទេរពីរដ្ឋាភិបាលស៊ីវិលទៅលោកឧត្ដមសេនីយ៍ Min Aung Hlaing អគ្គមេបញ្ជាការកងយោធាក្នុងគ្រាអាសន្នរយៈពេល ១ ឆ្នាំ។
សេវាកម្មទូរស័ព្ទ និងអ៊ីនធឺណិតត្រូវបានបិទនៅទីក្រុងធំៗ ហើយកាលពីថ្ងៃព្រហស្បតិ៍ ទី ៤ កុម្ភៈ រដ្ឋាភិបាលយោធាបានបញ្ជាឱ្យក្រុមសេវាកម្មអ៊ីនធឺណិតទាំងអស់ឱ្យបិទមិនឱ្យប្រើប្រាស់បណ្ដាញសង្គម Facebook រហូតដល់ថ្ងៃទី ៧ ដើម្បីរក្សាស្ថិរភាពប្រទេស។
ការចាប់ខ្លួនមន្ត្រីស៊ីវិលបានធ្វើឱ្យមានការតវ៉ាជាច្រើន។ បុគ្គលិកនៅមន្ទីរពេទ្យរដ្ឋនៅទូទាំងប្រទេសបានឈប់ធ្វើការ ឬពាក់ខ្សែបូពណ៌ក្រហមដែលជាផ្នែកមួយនៃយុទ្ធនាការតវ៉ា។ ពួកគេបានចោទប្រកាន់កងទ័ពថា បានដាក់ផលប្រយោជន៍របស់ខ្លួនពីមុខការប្រយុទ្ធប្រឆាំងនឹងការរាលដាលជំងឺកូវីដ ១៩ ដែលបានសម្លាប់មនុស្សជាង ៣ ១០០ នាក់មកហើយ ជាតួលេខមួយខ្ពស់បំផុតនៅអាស៊ីអាគ្នេយ៍។
ការចាប់ខ្លួនមេដឹកនាំនៅក្នុងប្រទេសមីយ៉ាន់ម៉ា គឺគ្រាន់តែជាព្រឹត្តិការណ៍ចុងក្រោយបង្អស់នៅក្នុងប្រវត្តិសាស្ត្រដ៏ស្មុគស្មាញរបស់ប្រទេសមួយនេះ ដែលពោរពេញទៅដោយការតស៊ូដណ្ដើមការគ្រប់គ្រងរវាងស៊ីវិល និងយោធា។
ប្រទេសមីយ៉ាន់ម៉ា ដែលកាលពីមុនមានឈ្មោះថា ភូមា បានទទួលឯករាជ្យពីចក្រភពអង់គ្លេសនៅឆ្នាំ ១៩៤៨ តែរដ្ឋាភិបាលស៊ីវិលត្រូវបានផ្ដួលរលំដោយកងយោធានៅឆ្នាំ ១៩៦២ ដែលកាន់អំណាចផ្ដាច់ការរហូតដល់ឆ្នាំ ២០១០។
ការបះបោរមួយនៅឆ្នាំ ១៩៨៨ បានជំរុញឱ្យរដ្ឋាភិបាលយោធារៀបចំការបោះឆ្នោតជាលើកដំបូងនៅឆ្នាំ ១៩៩០ ដែលការបោះឆ្នោតនេះត្រូវបានឈ្នះដោយគណបក្ស NLD ប៉ុន្តែសមាជិកសភាជាប់ឆ្នោតដែលរួមមាន អ៊ុងសាន ស៊ូជី ត្រូវបានចាប់ខ្លួនទាំងអស់មុនពួកគេចូលកាន់អំណាច។ នៅឆ្នាំបន្ទាប់លោកស្រី អ៊ុងសាន ស៊ូជី បានឈ្នះពានរង្វាន់ណូបែលសន្តិភាព ខណៈពេលដែលលោកស្រីជាប់ឃុំនៅគេហដ្ឋាន។
នៅឆ្នាំ ២០១០ នាយឧត្ដមសេនីយ៍ Than Shwe បានប្រកាសថា ប្រទេសនេះ នឹងត្រូវប្រគល់ទៅឱ្យមេដឹកនាំស៊ីវិល តែបានធានាថា យោធានឹងរក្សាអំណាចជាច្រើន ដូចជាការគ្រប់គ្រងក្រសួងសំខាន់ៗជាដើម។ ពួកគេបានដោះលែងអ្នកទោសនយោបាយ ដែលរួមទាំងសមាជិកសភាគណបក្ស NLD។
លោកស្រី អ៊ុងសាន ស៊ូជី ត្រូវបានគេបោះឆ្នោតជ្រើសរើសកាលពីឆ្នាំ ២០១២ ឱ្យក្លាយជាទីប្រឹក្សារដ្ឋមីយ៉ាន់ម៉ា។ នៅឆ្នាំ ២០១៥ គណបក្ស NLD បានទទួលជ័យជម្នះក្នុងការបោះឆ្នោតសភាដែលកាលនោះ កងយោធាបានគោរពលទ្ធផលនៃការបោះឆ្នោត។
លោកស្រី អ៊ុងសាន ស៊ូជី ខណៈដែលមានប្រជាប្រិយក្នុងចំណោមពុទ្ធសាសនិកភាគច្រើននៅមីយ៉ាន់ម៉ាបានមើលឃើញកេរ្តិ៍ឈ្មោះអន្តរជាតិរបស់លោកស្រីធ្លាក់ចុះ ដោយសារការប្រព្រឹត្តរបស់រដ្ឋាភិបាលលោកស្រីទៅលើជនជាតិភាគតិចរ៉ូហ៊ីងយ៉ាដែលកាន់សាសនាអ៊ិស្លាម។ នៅឆ្នាំ ២០១៧ កងទ័ពមីយ៉ាន់ម៉ាបានបង្កើនការបង្ក្រាបជនជាតិរ៉ូហ៊ីងយ៉ា ដែលឈានដល់ការសម្លាប់រង្គាល។
លោកស្រី អ៊ុងសាន ស៊ូជី មិនបានថ្កោលទោសសកម្មភាពនេះទេ ហើយរួមទាំងចូលរួមក្នុងការការពារកងទ័ពថែមទៀត៕