.jpg)
ក្រុមមន្ត្រីប៉ូលិសច្បាប់អង់គ្លេស ត្រួតពិនិត្យរថយន្តមួយមានផ្ទុកសាកសព ៣៩ នាក់ នៅឧទ្យានឧស្សាហកម្ម Waterglade នៅតំបន់ Grays។ AFP
ក្រុងឡុងដ៍៖ បុរសម្នាក់ដែលមានវ័យ ២៣ ឆ្នាំ បានរងការចោទប្រកាន់ពីបទឧក្រិដ្ឋកម្មជួញដូរមនុស្ស នៅក្នុងការជាប់ពាក់ព័ន្ធជាមួយការស្លាប់របស់ជនជាតិវៀតណាម ៣៩ នាក់ ដែលសាកសពរបស់ពួកគេ ត្រូវបានគេរកឃើញនៅក្នុងទូរថយន្តក្លាស្សេ ១ គ្រឿង នៅប្រទេស អង់គ្លេស។
ប៉ូលិសអង់គ្លេសបានថ្លែងកាលពីថ្ងៃចន្ទថា លោក គ្រីស្តូហ្វឺរ កេននីឌី មកពីតំបន់ Armagh នៅប្រទេស អៀរឡង់ភាគខាងជើង គ្រោងបង្ហាញខ្លួននៅឯតុលាការ Chelmsford Magistrates នៅតំបន់អ៊ីសស៊ិកនៅ ប្រទេស អង់គ្លេស ភាគអាគ្នេយ៍។
លោក គ្រីស្តូហ្វឺរ កេននីឌី បានរងការចោទប្រកាន់ពីបទរួមគំនិតរៀបចំ ឬជួយសម្រួលការធ្វើដំណើររបស់ក្រុមជនរងគ្រោះវៀតណាម ជាមួយការត្រួតពិនិត្យ ដើម្បីយកផលប្រយោជន៍ និងការរួមគំនិតជួយសម្រួលយកកម្រៃជើងសាដែលបានបំពានច្បាប់អន្តោប្រវេសន៍អង់គ្លេស។
លោក កេននីឌី ត្រូវបានចាប់ខ្លួនកាលពីព្រឹកថ្ងៃសុក្រនៅតាមផ្លូវធំ M40។
សាកសពស្ត្រី ៨ នាក់ និងបុរស ៣១ នាក់ ត្រូវបានគេរកឃើញនៅក្នុងទូរថយន្តក្លាស្សេមួយ នៅក្នុងតំបន់ឧស្សាហកម្មមួយកន្លែងនៅទីក្រុងឡុងដ៍ភាគខាងកើត កាលពីថ្ងៃទី ២៣ ខែតុលា៕ AFP/SK
