ប្រជាជនក្វាតេម៉ាឡា កាលពីថ្ងៃសៅរ៍បានធ្វើការតវ៉ានៅក្នុងរដ្ឋធានីនេះ ដើម្បីទាមទារឱ្យលោកប្រធានាធិបតី Alejandro Giammattei ដោយបានឱ្យលោកទទួលខុសត្រូវចំពោះការខ្វះវ៉ាក់សាំងកូវីដ ១៩។
Karla Perez ស្ត្រីមានវ័យ ៤៨ ឆ្នាំ ដែលបានលើកបដានៅកន្លែងតវ៉ានោះ បានប្រាប់សារព័ត៌មាន AFP ថា៖ «យើងធ្វើការតវ៉ាឱ្យគាត់ (លោក Giammattei) ចុះចេញពីតំណែង ហើយប្រាប់ពួកយើងពីកន្លែងប្រាក់សម្រាប់ទិញវ៉ាក់សាំង»។
បដាដែលបានលើកបង្ហាញនៅក្នុងអំឡុងការតវ៉ានៅមុខ National Palace អតីតវិមានរដ្ឋាភិបាលដែលត្រូវបានការពារដោយប៉ូលិសយ៉ាងច្រើននោះបានឱ្យដឹងថា៖ «វ៉ាក់សាំងចូលទៅក្នុងដៃ មិនមែនចូលទៅក្នុងហោប៉ៅទេ»។
ចាប់តាំងពីខែកុម្ភៈមក វ៉ាក់សាំង ៦៥៨ ២០០ ដូស បានមកដល់ប្រទេសក្វាតេម៉ាឡា វ៉ាក់សាំងខ្លះត្រូវទិញហើយខ្លះទៀត ត្រូវបានគេផ្តល់ជាជំនួយ។ ប្រទេសនេះ មានប្រជាជនសរុបជាង ១៦ លាននាក់។
ចំពោះក្រុមអ្នកតវ៉ាចំនួនទាំងនេះ បង្ហាញពីការគ្រប់គ្រងមិនបានល្អ និងបង្កឱ្យមានការសង្ស័យពីអំពើពុករលួយ។
លោក Jorge Bucaro មេដឹកនាំសមាគមនិស្សិតសាកលវិទ្យាល័យ (AEU) នៃសាកលវិទ្យាល័យ San Carlos ជាសាកលវិទ្យាល័យរដ្ឋរបស់ប្រទេសនេះ បាននិយាយថា៖ «រដ្ឋាភិបាលមានភាពមិនច្បាស់លាស់ក្នុងការប្រើប្រាស់ប្រាក់ទាំងនោះ»។
លោក Giammattei ជាគ្រូពេទ្យមានវ័យ ៦៥ ឆ្នាំ បានបញ្ជាក់ថា ការខ្វះវ៉ាក់សាំងនេះ ដោយសារតម្រូវការជាសកលខ្ពស់ពេក ហើយបានរិះគន់កម្មវិធីចែករំលែកវ៉ាក់សាំងសកលរបស់ Covax ចំពោះការពន្យារពេលការប្រគល់វ៉ាក់សាំង។
ចាប់តាំងពីខែមីនា ឆ្នាំ ២០២០ ប្រទេសអាមេរិកកណ្តាលនេះ មានករណីឆ្លងជំងឺកូវីដ ១៩ ចំនួន ២៣៣ ៦៩៦ នាក់ និងស្លាប់ ៧ ៦៩៥ នាក់។
ប្រាក់ចំនួន ១២,៩ ពាន់លានដុល្លារ ជាថវិកាបង្កើនបំណុលសាធារណៈ ខណៈដែលការបន្ថយមូលនិធិសម្រាប់ការថែទាំសុខភាពការអប់រំសិទ្ធិមនុស្ស និងប្រព័ន្ធយុត្តិធម៌ ដោយបានបង្កឱ្យប្រជាជនខឹងសម្បាចាប់ពីនិស្សិតរហូតដល់ក្រុមមេដឹកនាំជំនួញក្នុងរយៈពេល ១ ឆ្នាំបណ្តាលមកពីវិបត្តិសេដ្ឋកិច្ចការឆ្លងរាលជំងឺកូវីដ ១៩។
Diego Herrera ជានិស្សិតម្នាក់មានវ័យ ២៥ ឆ្នាំ បាននិយាយថា៖ «សភាបានលៃលកថវិកាបន្ថែមទៀតសម្រាប់ថ្លៃអាហាររបស់ពួកគេ ហើយមិនបានបែងចែកថវិកាទាំងនោះ ទៅដល់ប្រជាជនក្រីក្រទេ»។
រូបភាពបណ្តាញសង្គម និងសារព័ត៌មាន Reuters បានបង្ហាញឱ្យឃើញថា ខណៈដែលអ្នកតវ៉ាភាគច្រើនបានជួបជុំនៅទីលានដ៏ធំនោះដោយសន្តិវិធីអ្នកដទៃ បានវាយបំបែកបង្អួចអគារសភា និងដុតខាងក្នុងដោយបានបង្កឱ្យផ្សែងហុយទ្រលោមឡើងទៅលើអាកាស។
អ្នកនាំពាក្យមន្ទីរពេទ្យ San Juan de Dios General Hospital ជាមន្ទីរពេទ្យ ១ ក្នុងចំណោមមន្ទីរពេទ្យធំៗរបស់រដ្ឋធានីនេះ បាននិយាយថា មន្ទីរពេទ្យនេះបានព្យាបាលមនុស្ស ១៤ នាក់ ដែលបានរងរបួស និងពុលឧស្ម័នបង្ហូរទឹកភ្នែក ក្រោយពីប៉ះទង្គិចគ្នាជាមួយប៉ូលិសប្រឆាំងកុបកម្ម ដែលបានប្រើឧស្ម័នបង្ហូរទឹកភ្នែក ដើម្បីបំបែកហ្វូងអ្នកតវ៉ា។
អ្នកនាំពាក្យតុលាការបាននិយាយថា មនុស្ស ២២ នាក់ ត្រូវចាប់ខ្លួន។
លោកស្រី Erika Guevara Rosas ប្រធានអង្គការលើកលែងទោសអន្តរជាតិ (Amnesty International) បានជំរុញឱ្យបើកការស៊ើបអង្កេតទៅលើការចាប់ខ្លួនមនុស្សទាំងនោះ ដែលវីដេអូនៅលើបណ្តាញសង្គមបានបង្ហាញថាជាអំពើហិង្សា៕