ក្រុងបាហ្គោសៈ ប្រជាជនជាច្រើននាក់បានភៀសខ្លួនចេញពីទីតាំងឈរជើងចុងក្រោយរបស់ក្រុមរដ្ឋអ៊ិស្លាម IS នៅស៊ីរីភាគខាងកើតកាលពីថ្ងៃអង្គារ ខណៈដែលកងកម្លាំងឃើដគាំទ្រដោយអាមេរិកបានបង្កើនការវាយប្រហារប្រឆាំងនឹងក្រុមជីហាដនិយមនៅទីនោះ។
ប្រជាជនរាប់រយនាក់បានភៀសខ្លួនទាំងយប់ ប៉ុន្តែខ្លះទៀតបានរត់គេចខ្លួននៅពេលថ្ងៃ ខណៈដុំផ្សែងខ្មៅងងឹតបានហុយទ្រលោមទៅលើអាកាសនៅពីលើក្រុងបាហ្គោសជាទីដែលក្រុមយុទ្ធជន IS កំពុងវាយប្រយុទ្ធការពារទីតាំងឈរជើងចុងក្រោយរបស់ពួកគេ។
ក្រុមជ្រុលនិយម IS បានប្រកាសរដ្ឋ «កាលិហ្វ» ឆ្លងព្រំដែននៅក្នុងប្រទេសស៊ីរី និងអ៊ីរ៉ាក់នៅក្នុងឆ្នាំ ២០១៤ ប៉ុន្តែយុទ្ធនាការយោធាជាច្រើនត្រូវបានគេធ្វើឡើងនៅព្រំដែនអ៊ីរ៉ាក់។
ក្រោយពីការពន្យារពេលជាង ១ សប្តាហ៍ដើម្បីអនុញ្ញាតឲ្យក្រុមជនស៊ីវិលចាកចេញពីទីនោះ កងកម្លាំងប្រជាធិបតេយ្យស៊ីរី (SDF) បានប្រកាសវាយប្រហារដណ្តើមទីតាំងក្រុងនេះពីក្រុម IS យកមកកាន់កាប់វិញកាលពីថ្ងៃសៅរ៍។
ដោយមានជំនួយពីកងយន្តហោះចម្បាំង និងកងកាំភ្លើងធំរបស់ក្រុមចម្រុះដឹកនាំដោយអាមេរិកនោះ ក្រុមសម្ព័ន្ធមិត្តដឹកនាំដោយឃើដបានរុលចូលកាន់កាប់ជិត ៤ គីឡូម៉ែត្រក្រឡា។
អ្នកនាំពាក្យ SDF លោក Musefa Bali បាននិយាយថាជនស៊ីវិល ៦០០ នាក់បានរត់ភៀសខ្លួនចេញពីតំបន់ប្រយុទ្ធគ្នានោះនៅពេលយប់ ហើយក្រុមឃ្លាំមើលសិទ្ធិមនុស្សនិយាយថា មនុស្ស ៣៥០ នាក់ផ្សេងទៀតភៀសខ្លួននៅពេលថ្ងៃ៕ PSA