.jpg)
ក្រុមអ្នកតវ៉ាអុីរ៉ាក់ សែងអ្នករបួសចេញពីកន្លែងប៉ះទង្គិចជាមួយសន្តិសុខ។ AFP
ក្រុងណាស៊ីរីយ៉ាហ៍៖ ប្រជាជនអ៊ីរ៉ាក់ បន្តធ្វើការតវ៉ាហិង្សាប្រឆាំងនឹងរដ្ឋាភិបាលនៅក្នុងទីក្រុងបាកដាដ និងនៅតាមទីក្រុងផ្សេងទៀតនៅភាគខាងត្បូងកាលពីថ្ងៃសៅរ៍ ដើម្បីទាមទារឲ្យរុះរើប្រព័ន្ធគ្រប់គ្រងរដ្ឋាភិបាលទ្រង់ទ្រាយធំមួយដែលត្រូវបានគេមើលឃើញថា ជាអំពើពុករលួយ និងស្ថិតនៅក្រោមឥទ្ធិពលរបស់ក្រុមមហាអំណាចបរទេស ១ ថ្ងៃក្រោយពីនាយករដ្ឋមន្ត្រី បានប្តេជ្ញាលាលែងចេញពីតំណែង។
ក្រុមអ្នកតវ៉ា បានចេញតាមដងផ្លូវនានា ចាប់តាំងពីដើមខែតុលានៅក្នុងចលនាទ្រង់ទ្រាយធំបំផុតនៅក្នុងប្រទេស អ៊ីរ៉ាក់ ដែលត្រូវបានគេមើលឃើញថា មានការតវ៉ាអស់ជាច្រើនទសវត្សរ៍ ដែលបានបង្កឡើងដោយអំពើហិង្សាយ៉ាងឃោរឃៅទៅលើក្រុមបុគ្គលិកសាធារណៈក្រីក្រ ភាពគ្មានការងារធ្វើ និងការប្រព្រឹត្តអំពើពុករលួយរបស់រដ្ឋាភិបាលនៅក្នុងទូទាំងប្រទេសទាំងមូល។
យោងតាមអ្នកសារព័ត៌មាន AFP ម្នាក់ដែលបានទទួលបញ្ជីឈ្មោះសរុបពីក្រុមគ្រូពេទ្យ និងគណៈកម្មការសិទ្ធិមនុស្សអ៊ីរ៉ាក់បានឲ្យដឹងថា ក្រុមកងកម្លាំងសន្តិសុខ និងប្រដាប់អាវុធ បានឆ្លើយតបជាមួយអំពើហិង្សាទៅលើក្រុមបាតុករ ដោយបានបង្កឲ្យមនុស្សជាង ៤២០ នាក់ស្លាប់ និង ១៥ ០០០ នាក់ផ្សេងទៀតបានរងរបួស។
ចំនួនអ្នកស្លាប់បានកើនឡើងគួរឲ្យតក់ស្លុតបំផុតនៅក្នុងសប្តាហ៍នេះ ខណៈការបង្ក្រាបមួយបានបណ្តាលឲ្យមនុស្សរាប់សិបនាក់ស្លាប់នៅទីក្រុងបាកដាដ៕ AFP/SK
