កាលពីថ្ងៃអង្គារ ទី ៦ មេសា ប្រទេសកូរ៉េខាងជើង ប្រកាសថានឹងមិនចូលរួមក្នុងព្រឹត្តិការណ៍កីឡាអូឡាំពិកទីក្រុងតូក្យូនៅឆ្នាំនេះទេ ដោយសារតែការព្រួយបារម្ភអំពីការរីករាលដាលកូវីដ ១៩។
ការដែលប្រទេសកូរ៉េខាងជើង មិនចូលរួមព្រឹត្តិការណ៍អូឡាំពិកឆ្នាំនេះធ្វើឱ្យផែនការដែលបានព្រមព្រៀងគ្នានៅក្នុងកិច្ចប្រជុំកំពូលឆ្នាំ ២០១៨ ថយក្រោយមួយជំហាន។ កិច្ចព្រមព្រៀងគ្នានៅក្នុងកិច្ចប្រជុំកំពូលឆ្នាំ ២០១៨ រវាងប្រទេសកូរ៉េខាងត្បូង និងកូរ៉េខាងជើង គឺធ្វើឡើងក្នុងការសន្យារួមដៃគ្នារវាងប្រទេសទាំង ២ ធ្វើជាម្ចាស់ផ្ទះព្រឹត្តិការណ៍កីឡាអូឡាំពិកឆ្នាំ ២០៣២ ។
ក្រសួងបង្រួបបង្រួមជាតិកូរ៉េខាងត្បូងទទួលបន្ទុកកិច្ចការអន្តរកូរ៉េបាននិយាយថា ក្រុងសេអ៊ូលសង្ឃឹមថា កីឡាអូឡាំពិកនៅទីក្រុងតូក្យូនឹងជាឱកាសមួយ ដើម្បីជំរុញឱ្យមានសន្តិភាព និងការបង្រួបបង្រួមរវាងកូរ៉េទាំង ២។
អ្នករៀបចំព្រឹត្តិការណ៍អូឡាំពិកទីក្រុងតូក្យូបាននិយាយថា ពួកគេបានដឹងអំពីដំណឹងរបស់កូរ៉េខាងជើងក្នុងការមិនចូលរួមព្រឹត្តិការណ៍នេះ ហើយនឹងធ្វើការជាមួយប្រទេសដទៃទៀតដើម្បីឱ្យ ព្រឹត្តិការណ៍កីឡានេះទទួលបានជោគជ័យ៕