.jpg)
កម្មករធ្វើផ្លូវអង្គុយអាំងភ្លើងនៅជិតការដ្ឋានរបស់ពួកគេក្បែរភូមិ Tangtse ក្នុងតំបន់ដាឡាក់ហ៍នៃឥណ្ឌាភាគខាងជើង។ AFP
ក្រុងប៉េកាំង៖ ប្រទេសចិន បានថ្លែងកាលពីថ្ងៃពុធថា ខ្លួនបានឈានដល់ «ការឯកភាពជាវិជ្ជមាន» ជាមួយនឹងឥណ្ឌា ជុំវិញការដោះស្រាយភាពតានតឹងនៅតាមព្រំដែនរវាងប្រទេសទាំង ២ ជាទីដែលកងកម្លាំងភាគីទាំង ២ បានប្រឈមមុខដាក់គ្នាកាលពីប៉ុន្មានសប្តាហ៍ថ្មីៗនេះ។
ភាពតានតឹងបានផ្ទុះឡើងជាប្រចាំ រវាងប្រទេសមហាអំណាចក្នុងតំបន់ទាំង ២ នៅតាមព្រំដែនរបស់ពួកគេមានប្រវែង ៣ ៥០០ គីឡូម៉ែត្រ ដែលមិនបានកំណត់ព្រំដែនឲ្យបានត្រឹមត្រូវនោះទេ។
ទាហានជាច្រើនពាន់នាក់ មកពីប្រទេសជិតខាងគ្នាប្រដាប់ដោយអាវុធនុយក្លេអ៊ែរទាំង ២ នេះបានជាប់ពាក់ព័ន្ធនៅក្នុងការប្រឈមមុខដាក់គ្នាចុងក្រោយបំផុតចាប់តាំងពីខែឧសភា នៅតំបន់ឡាដាក់ហ៍របស់ប្រទេសឥណ្ឌា នៅទល់មុខតំបន់ទីបេនៅមុនចុះកិច្ចព្រមព្រៀងក្នុងរយៈពេលប៉ុន្មានថ្ងៃថ្មីៗនេះ ដែលជិតឈានដល់ដំណោះស្រាយមួយរវាងប្រទេសទាំង ២ នៅអាស៊ី។
អ្នកនាំពាក្យក្រសួងការបរទេស លោកស្រី ហ៊ួ ឈុនយីង បានថ្លែងនៅឯសន្និសីទសារព័ត៌មានមួយថា៖ «ការឯកភាពវិជ្ជមាន» មួយស្តីពីការដោះស្រាយបញ្ហាព្រំដែនចុងក្រោយបំផុត គឺទទួលបានលទ្ធផលផ្លែផ្កាបន្ទាប់ពី «ការទំនាក់ទំនងយ៉ាងមានប្រសិទ្ធភាព» តាមរយៈការទូត និងយោធា។
លោកស្រី ហ៊ួ ឈុនយីង បានថ្លែងថា៖ «បច្ចុប្បន្នភាគីប្រទេសទាំង ២ កំពុងចាត់វិធានការយ៉ាងត្រឹមត្រូវ ដើម្បីបន្ធូរបន្ថយស្ថានការណ៍នៅតាមព្រំដែន ដែលពឹងផ្អែកទៅលើការឯកភាពគ្នានេះ»។
ក្រុងញូវដែលីបានថ្លែងកាលពីថ្ងៃអាទិត្យថា ប្រទេសទាំង ២ បានយល់ព្រម «ដោះស្រាយភាពតានតឹងផ្ទុះឡើងនៅតាមព្រំដែនដោយសន្តិវិធី» ក្រោយពីកិច្ចប្រជុំកម្រិតខ្ពស់មួយរវាងមេបញ្ជាការយោធានៃប្រទេសទាំង ២ នេះ។
ប្រទេសឥណ្ឌា បានថ្លែងថា មេបញ្ជាការនៃប្រទេសទាំង ២ បានឯកភាពគ្នាទៅលើ «ដំណោះស្រាយបឋម» មួយ គឺមាន «សារៈសំខាន់» ចំពោះការទំនាក់ទំនងរវាងប្រទេស ដែលមានប្រជាជនច្រើនជាងគេបំផុត ២ នៅពិភពលោក។
នៅក្នុងសេចក្តីថ្លែងការណ៍មួយ ក្រសួងការបរទេសឥណ្ឌាបានថ្លែងថា ភាគីប្រទេសទាំង ២ នឹង «បន្តទំនាក់ទំនងការទូត និងយោធា ដើម្បីដោះស្រាយស្ថានការណ៍ និងធានាសន្តិភាព និងភាពសុខសាន្តនៅតាមតំបន់ព្រំដែន»។
ប្រភពជាច្រើន និងសារព័ត៌មានឥណ្ឌាបានរាយការណ៍ថា ប្រទេសឥណ្ឌា ទំនងជាបានធ្វើសម្បទានតំបន់ខ្លះទៅឲ្យប្រទេសចិន ដែលយោធារំដោះប្រជាជនចិនបានកាន់កាប់ក្នុងរយៈពេលប៉ុន្មានសប្តាហ៍ថ្មីៗនេះ ជាពិសេសនៅតាមផ្នែកខ្លះនៃបឹង Pangong Tso និងផ្នែកនៃជ្រលងទន្លេហ្គាល់វ៉ាន់ដ៏សំខាន់នោះ៕ AFP/SK
