.jpg)
វិស្វករពិនិត្យមើលកោសិកាក្រលៀនសត្វស្វាខណៈលោកធ្វើតេស្តវ៉ាក់សាំងកូវីដ១៩របស់រោងចក្រSinovac Biotech។ AFP
អ្នកវិភាគអាមេរិកបានដកស្រង់ប្រភពស៊ើបការណ៍សម្ងាត់របស់ជប៉ុន ដែលមិនបានបញ្ជាក់អត្តសញ្ញាណកាលពីថ្ងៃទី ១ ខែធ្នូ ថា ប្រទេសចិន បានផ្តល់វ៉ាក់សាំងកូវីដ ១៩ ទៅដល់មេដឹកនាំកូរ៉េខាងជើង លោក គីម ជុងអ៊ុន និងក្រុមគ្រួសាររបស់លោក។
លោក Harry Kazianis អ្នកជំនាញកូរ៉េខាងជើងប្រចាំនៅមជ្ឈមណ្ឌលសម្រាប់ក្រុមអ្នកគិតគូរផលប្រយោជន៍ជាតិ (Center for the National Interest think tank) នៅទីក្រុងវ៉ាស៊ីនតោនបាននិយាយថា លោក គីម និងមន្ត្រីជាន់ខ្ពស់កូរ៉េខាងជើងមួយចំនួន ត្រូវបានចាក់វ៉ាក់សាំងកូវីដ ១៩ ដែលបានពីប្រទេសចិន។
លោកបាននិយាយបន្ថែមថា មិនមានព័ត៌មានច្បាស់ទេថា ក្រុមហ៊ុនណាដែលបានផ្គត់ផ្គង់វ៉ាក់សាំងរបស់ខ្លួនទៅឱ្យ លោក គីម ហើយថាក៏មិនដឹងពីសុវត្ថិភាពរបស់វ៉ាក់សាំងនោះថាយ៉ាងណាដែរ។
អ្នកវិទ្យាសាស្ត្រវេជ្ជសាស្រ្តសហរដ្ឋអាមេរិកលោក Peter J. Hotez បាននិយាយថា យ៉ាងហោចណាស់មានក្រុមហ៊ុនចិនចំនួន ៣ កំពុងបង្កើតវ៉ាក់សាំងការពារការឆ្លងវីរុសកូរ៉ូណារួមមាន Sinovac Biotech Ltd, CanSinoBio និង Sinophram Group។
ក្រុមហ៊ុន Sinophram និយាយថា វ៉ាក់សាំងរបស់ក្រុមហ៊ុនខ្លួនត្រូវបានប្រើប្រាស់ដោយប្រជាជនជិត ១ លាននាក់នៅក្នុងប្រទេសចិន ទោះបីជាមិនមានក្រុមហ៊ុនណាត្រូវបានគេដឹងថា បានបើកដំណើរការការសាកល្បងវ៉ាក់សាំងដំណាក់កាលទី៣ ជាសាធារណៈរបស់ពួកគេនៅឡើយ។
ប្រទេសកូរ៉េខាងជើង មិនបានបញ្ជាក់ពីការឆ្លងជំងឺនេះទេ ប៉ុន្តែភ្នាក់ងារស៊ើបការណ៍សម្ងាត់ជាតិរបស់ប្រទេសកូរ៉េខាងត្បូង បាននិយាយថា ការផ្ទុះឡើងនៅទីនោះប្រាកដជាមាន ព្រោះប្រទេសនេះមានការធ្វើពាណិជ្ជកម្មជាមួយចិន ដែលជាប្រភពនៃជំងឺរាតត្បាតនេះ មុនពេលបិទព្រំដែននៅចុងខែមករា ដើមឆ្នាំ ២០២០។
ក្រុមហ៊ុន Microsoft បាននិយាយកាលពីខែវិច្ឆិកា ថា ក្រុម hacking របស់កូរ៉េខាងជើងចំនួន ២ ក្រុម បានព្យាយាមបំបែកបណ្តាញក្រុមហ៊ុនផលិតវ៉ាក់សាំងនៅតាមបណ្តាប្រទេសជាច្រើន។
ក្រុមហ៊ុន AstraZeneca របស់ចក្រភពអង់គ្លេសក៏ត្រូវបានគេព្យាយាមលួចចូលក្នុងបណ្តាញផងដែរ។
ទីភ្នាក់ងារស៊ើបការណ៍សម្ងាត់របស់កូរ៉េខាងត្បូងបាននិយាយកាលពីសប្តាហ៍មុនថា ខ្លួនបានទប់ការប៉ុនប៉ងរបស់កូរ៉េខាងជើងក្នុងការលួចចូលទៅក្នុងក្រុមហ៊ុនផលិតវ៉ាក់សាំងកូវីដ ១៩ អ្នកតំណាងរាស្ត្រ Ha Tae-keung និង Kim Byung-kee ដែលមិនបានរាយការណ៍បញ្ជាក់ថា តើក្រុមហ៊ុនណាជាគោលដៅនៃការប៉ុនប៉ងលួចចូលបណ្តាញពីសំណាក់កូរ៉េខាងជើងនោះទេ។
វាកើតឡើងបន្ទាប់ពីក្រុម Hacker ធ្វើការឱ្យរដ្ឋាភិបាលរុស្ស៊ី និងកូរ៉េខាងជើង ផ្តោតលើក្រុមហ៊ុនឱសថចំនួន ៧ និងអ្នកស្រាវជ្រាវវ៉ាក់សាំងនៅកាណាដា បារាំង ឥណ្ឌា កូរ៉េខាងត្បូង និងសហរដ្ឋអាមេរិក ដូចដែលបានបង្ហាញដោយក្រុមហ៊ុន Microsoft។
ក្រុមអ្នកតាក់តែងច្បាប់បាននិយាយថា ការប៉ុនប៉ងលួចនេះ គឺជាផ្នែកមួយនៃសកម្មភាពមិនសមហេតុផលដែលត្រូវបានធ្វើឡើងដោយប្រទេសកូរ៉េខាងជើង ដោយសារតែការប៉ះពាល់ដែលបណ្តាលមកពីកូវីដ ១៩។
ក្រុមរុស្ស៊ីដែលមានឈ្មោះហៅក្រៅថា «Fancy Bear» និងក្រុមកូរ៉េខាងជើងដែលមានឈ្មោះថា «Zinc» និង «Cerium» ជាប់ទាក់ទងនឹងការវាយប្រហារតាមអ៊ីនធឺណិតថ្មីៗនេះ។
មជ្ឈមណ្ឌលសន្តិសុខតាមអ៊ីនធឺណិតជាតិអង់គ្លេស (National Cyber Security Centre) ធ្លាប់បាននិយាយថា ក្រុម hacker រុស្ស៊ីកំពុងកំណត់គោលដៅស្រាវជ្រាវវ៉ាក់សាំង ប៉ុន្តែរុស្ស៊ីបានបដិសេធ។
ក្រុមហ៊ុន Microsoft ដែលបង្កើតកម្មវិធីសុវត្ថិភាពតាមអ៊ីនធឺណិតបាននិយាយថាខ្លួនបានរកឃើញការប៉ុនប៉ងបំបែកប្រព័ន្ធកុំព្យូទ័ររបស់ក្រុមហ៊ុនឱសថចំនួន ៧។
អ្នកស្រាវជ្រាវវ៉ាក់សាំងនៅក្នុងប្រទេសកាណាដា បារាំង ឥណ្ឌា កូរ៉េខាងត្បូង និងសហរដ្ឋអាមេរិកក៏ត្រូវបានកំណត់គោលដៅក្នុងការលួចចូលបណ្តាញពីសំណាក់ក្រុម hacker ផងដែរ។
ទាំងអស់នេះ គឺជាផ្នែកមួយនៃការប្រណាំងជាសកលសម្រាប់ស្វែងរកវ៉ាក់សាំងកូវីដ ១៩ ខណៈដែលប្រទេសនានាស្វែងរកផលប្រយោជន៍ពីគ្នាទៅវិញទៅមក។
ការរកឃើញវ៉ាក់សាំងនេះមានអត្ថប្រយោជន៍ផ្នែកសេដ្ឋកិច្ចសង្គម និងសុខភាពក៏ដូចជាកិត្យានុភាពនៅក្នុងការអភិវឌ្ឍការព្យាបាល និងវ៉ាក់សាំងឱ្យបានឆាប់រហ័ស។ ភាគច្រើននៃការវាយប្រហារតាមអ៊ីនធឺណិតនេះ ទាក់ទងនឹងការធ្វើចារកម្មលួចព័ត៌មាន៕
