កាលពីថ្ងៃអង្គារ ទី ៦ មេសា ប្រទេសតួកគី បានកោះហៅឯកអគ្គរដ្ឋទូតចិនបន្ទាប់ពីស្ថានទូតចិនបាននិយាយថា ខ្លួនមានសិទ្ធិក្នុងការឆ្លើយតបចំពោះមេដឹកនាំប្រឆាំងតួកគី ដែលបានរិះគន់សកម្មភាពរបស់ចិនទៅលើមូស្លីមអ៊ុយហ្គ័រ។
មេដឹកនាំគណបក្ស IYI លោកស្រី MeralAksener និងអភិបាលក្រុងអង់ការ៉ា Mansur Yavas នៃបក្សប្រឆាំងបានរិះគន់ចំពោះសកម្មភាពចិនទៅលើជនជាតិ មូស្លីមអ៊ុយហ្គ័រដែលសំដៅទៅលើអំពើហឹង្សាកាលពី ៣ ទសវត្សរ៍។
ស្ថានទូតចិនបាននិយាយថា៖ «ភាគីចិនប្រឆាំងដាច់ខាតចំពោះបុគ្គលដែលមានអំណាចណាមួយដែលប្រឆាំងនឹងអធិបតេយ្យភាព និងបូរណភាពទឹកដីរបស់ចិន។ ភាគីចិនសូមរក្សាសិទ្ធិស្របច្បាប់របស់ខ្លួនក្នុងការឆ្លើយតប»។
កាលពីថ្ងៃទី ៧ មេសា អ្នកនាំពាក្យក្រសួងការបរទេសចិន លោក Liu Shaobin បាននិយាយថា មនុស្សមួយចំនួននៅក្នុងប្រទេសតួកគី កំពុងលើកទឹកចិត្តដល់ក្រុមភេរវករនិងជំរុញឱ្យមានការបែងចែកនៅក្នុងប្រទេសចិន នៅលើបណ្តាញសង្គមរបស់ពួកគេ៕