កាលពីថ្ងៃពុធ ទី ១០ ខែកុម្ភៈ ក្រុមបាតុករថៃបានប្រមូលផ្តុំគ្នានៅទីក្រុងបាងកក ដើម្បីទាមទារឱ្យមានការដោះលែងសកម្មជនចំនួន ៤ នាក់ ដែលត្រូវបានចាប់ឃុំខ្លួន ហើយពួកគេត្រូវចោទប្រកាន់ពីបទប្រមាថព្រះមហាក្សត្រ។
ក្រុមអ្នកតវ៉ាប្រមាណ ១ ០០០ នាក់ បានប្រមូលផ្តុំគ្នា និងអំពាវនាវឱ្យមានការដោះលែងមេដឹកនាំបាតុកម្មទាំង ៤ នាក់ រួមមានលោក ParitChiwarak លោក Arnon Nampa កញ្ញា Patiwat Saraiyaem និងលោក Somyot Prueksakasemsukk។ អ្នកទាំង ៤ អាចជាប់ពន្ធនាគាររហូតដល់ ១៥ ឆ្នាំ ក្រោមការចោទប្រកាន់ពីបទប្រមាថព្រះមហាក្សត្រ។
កញ្ញា Panusaya "Rung" Sithijirawattanakul ដែលជាមេដឹកនាំតវ៉ាម្នាក់បានប្រកាសពីការតវ៉ានេះ បន្ទាប់ពីតុលាការបានបញ្ជូនមេដឹកនាំ ៤ នាក់ទៅឃុំខ្លួនបណ្តោះអាសន្នក្រោមការចោទប្រកាន់ពីបទបរិហារកេរ្តិ៍។ អ្នកទាំង ៤ មិនត្រូវបានដោះលែង និងមិនអនុញ្ញាតឱ្យនៅក្រៅឃុំនៅឡើយទេ។
ការធ្វើបាតុកម្មនៅទីក្រុងបាងកក ពីដំបូងត្រូវបានធ្វើឡើង ដើម្បីបង្ហាញការគាំទ្រក្រុមអ្នកតវ៉ានៅប្រទេសមីយ៉ាន់ម៉ា។ ប៉ុន្តែបាតុកម្មនេះ ត្រូវបានក្លាយជាការអំពាវនាវឱ្យមានការផ្លាស់ប្តូរ ឬបញ្ឈប់ការអនុ-វត្តច្បាប់ «ប្រមាថព្រះរាជា» បន្ទាប់ពីសកម្មជនទាំង ៤ នាក់ ត្រូវបានឃុំខ្លួនកាលពីថ្ងៃទី ៨ កុម្ភៈ ថ្មីៗនេះ។
មេដឹកនាំបាតុកម្ម កញ្ញា Panusaya“ Rung” Sithijirawattanakul បាននិយាយថា៖ «ប្រសិនបើយើងជាច្រើននាក់នាំគ្នាដើរតាមផ្លូវ យើងអាចធ្វើកំណែទម្រង់រាជានិយមបាន»។ ការតវ៉ាដែលដឹកនាំដោយយុវជននៅក្នុងប្រទេសថៃ កាលពីឆ្នាំមុនបានអំពាវនាវឱ្យមានការកែទម្រង់ច្បាប់រាជាធិបតេយ្យ។ ការតវ៉ានោះ គឺទាមទារឱ្យមានការធ្វើកំណែទម្រង់សិទ្ធិរាជាធិបតេយ្យ និងបដិសេធការចាប់ឃុំខ្លួនមេដឹកនាំបាតុករទាំង ៤ នាក់ ដែលត្រូវបានកាត់ទោសពីបទប្រមាថព្រះមហាក្សត្រ។
អ្នកដឹកនាំបាតុកម្មម្នាក់លោក Panupong Jadnok ថ្លែងថា៖ «ថ្ងៃនេះ គឺជាការជួបជុំដំបូងការបើកដំបូង និងការប្រយុទ្ធគ្នា បន្ទាប់ពីច្បាប់ដែលអយុត្តិធម៌បានធ្វើឱ្យមិត្តរបស់យើងជាប់ឃុំឃាំងក្នុងពន្ធនាគារ»។
ក្រុមបាតុករបានទាមទារសំណើចំនួន ៣ ដូចកាលពីឆ្នាំមុនដែរគឺ ការទម្លាក់លោកនាយករដ្ឋមន្ត្រី Prayut Chan-o-cha ចេញពីតំណែង សរសេរឡើងវិញនូវរដ្ឋធម្មនុញ្ញដែលគាំទ្រដោយយោធា និងធ្វើកំណែទម្រង់របបរាជានិយម។
ចំណែកឯលោក Prayut Chan-o-cha វិញបាននិយាយថា ការត្រឡប់មកវិញនៃការតវ៉ានេះនឹងធ្វើឱ្យមានការបង្កគ្រោះថ្នាក់ដល់ប្រទេសថៃ។
កាលពីថ្ងៃទី ១០ ខែកុម្ភៈ សមាជិកសភាគណបក្សប្រឆាំងថៃ ប្រហែល ៤៤ នាក់ បានដាក់សំណើធ្វើវិសោធនកម្មច្បាប់ប្រមាថព្រះមហាក្សត្រ។ សមាជិកសភាគណបក្សប្រឆាំងថៃបាននិយាយថា ការធ្វើវិសោធនកម្មច្បាប់នេះ អាចបន្ធូរបន្ថយភាពតានតឹងផ្នែកនយោបាយ និងបង្កើនសេរីភាពនៃការបញ្ចេញមតិអំឡុងពេលមានការប្រឆាំងនឹងរដ្ឋាភិបាល។
នៅក្នុងសំណើនោះ អ្នកដែលបរិហារកេរ្តិ៍ ឬគំរាមព្រះមហាក្សត្រនៅតែប្រឈមនឹងការជាប់ពន្ធនាគារ។ ប៉ុន្តែអាចជាប់ពន្ធនាគាររយៈពេល ១ ឆ្នាំ ឬពិន័យជាប្រាក់ ៣០ ម៉ឺនបាត។ ការធ្វើវិសោធនកម្មនេះ ត្រូវការសំឡេងគាំទ្រច្រើនពីព្រឹទ្ធសភា ដែលមានយោធា និងសភាជាន់ទាប។
កាលពីថ្ងៃទី ១០ កុម្ភៈគណបក្សរាជានិយមថៃ Pakdee បានដាក់សំណើមួយដែលមានហត្ថលេខាជាង ១០០ ០០០ នាក់ ដើម្បីបញ្ឈប់រាល់ការធ្វើវិសោធនកម្មច្បាប់ណាមួយទាក់ទងនឹងព្រះមហាក្សត្រ៕