នាយករដ្ឋមន្រ្តីនូវែលហ្សេឡង់ លោកស្រី Jacinda Ardern បានចោទប្រកាន់អូស្រ្តាលីថា បានលះបង់ទំនួលខុសត្រូវរបស់ខ្លួនចំពេលដែលស្ត្រីម្នាក់ត្រូវបានចោទប្រកាន់ថាមានទំនាក់ទំនងជាមួយរដ្ឋអ៊ីស្លាម (IS)។
ស្ត្រីរូបនេះ កំពុងប្រឈមមុខនឹងការនិរទេសទៅកាន់ប្រទេសនូវែលហ្សេឡង់ បន្ទាប់ពីត្រូវបានចាប់ខ្លួនពីប្រទេសតួកគី ពីប្រទេសស៊ីរី ជាមួយកូនពីរនាក់។ ប៉ុន្តែលោកស្រី Ardern មានប្រសាសន៍ថាអ្នកដែលមានសញ្ជាតិពីរ គួរតែត្រូវបានបញ្ជូនទៅអូស្ត្រាលីវិញ។
គួរបញ្ជាក់ផងដែរថា ស្រ្តីរូបនោះមានសញ្ជាតិពីរគឺ អូស្ត្រលី និងនូវែលហ្សេឡង់។
ទោះយ៉ាងណាលោកស្រី Ardern បានឲ្យដឹងថា ស្ត្រីមានវ័យ ២៦ ឆ្នាំ ដែលក្រសួងការពារជាតិតួក គីបានបញ្ជាក់ថា ជាសមាជិកម្នាក់នៃក្រុមISរូបនោះមិនបានរស់នៅក្នុងប្រទេសនូវែលហ្សេឡង់ទេ ចាប់តាំងពីនាងនៅក្មេងនោះទេ។
នាយករដ្ឋមន្រ្តីអូស្រ្តាលី លោក Scott Morrison បានឆ្លើយតបដោយនិយាយថា មានច្បាប់អាចលុបចោលសញ្ជាតិរបស់ពលរដ្ឋណាដែលមានសញ្ជាតិពីរហើយជាប់ការចោទប្រកាន់ពីការចូលរួមក្នុងសកម្មភាពភេរវកម្ម៕