.jpg)
ដបវ៉ាក់សាំងកូវីដ ១៩ AstraZeneca នៅក្នុងឱសថស្ថានមួយនៅក្រុងប៉ារីស។ AFP
វ៉ាក់សាំងកូវីដ ១៩ ដែលបានបង្កើតឡើងដោយក្រុមហ៊ុនអង់គ្លេស និងស៊ុយអែតឈ្មោះថា AstraZeneca និងសាកលវិទ្យាល័យ Oxford ឥឡូវនេះត្រូវបានផ្អាកនៅក្នុងប្រទេសមួយចំនួននៅទូទាំងទ្វីបអឺរ៉ុប និងអាស៊ី បន្ទាប់ពីមានរបាយការណ៍ស្ដីអំពីផលប៉ះពាល់នៃវ៉ាក់សាំងដែលធ្វើឱ្យមានឈាមកកនៅក្នុងសរសៃឈាម។
កាលពីថ្ងៃសុក្រកន្លងទៅប្រទេសថៃ បានក្លាយជាប្រទេសអាស៊ីដំបូងគេ ដែលបញ្ឈប់ការប្រើប្រាស់វ៉ាក់សាំងនេះ ដោយសម្ដែងក្ដីបារម្ភពីផលប៉ះពាល់នៃវ៉ាក់សាំងនេះ។ ចំណាត់ការនេះធ្វើឡើងបន្ទាប់ពីប្រទេសដាណឺម៉ាក ប្រកាសផ្អាកចាក់វ៉ាក់សាំងនេះ រយៈពេល ២ សប្តាហ៍ ក្រោយមានរបាយការណ៍អំពីករណីកកឈាមនៅសរសៃ និងករណីស្លាប់ចំនួន ១ ករណីផងដែរ។
ក្រោយមកទៀត នៅក្នុងយុទ្ធនាការចាក់វ៉ាក់សាំងរបស់អឺរ៉ុបប្រទេសចំនួន ៧ ផ្សេងទៀត ក៏បានបញ្ឈប់ការប្រើប្រាស់វ៉ាក់សាំង AstraZeneca ចេញពី Oxford រួមមានដូចជាប្រទេសន័រវែស អាយឡែន ប៊ុលហ្គារី លុចសំបួ អេស្តូនៀ លីទុយអានី និងឡាតវីជាដើម។
ទន្ទឹមនឹងនេះដែរ ប្រទេសអូទ្រីស និងអ៊ីតាលី ប្រកាសឈប់ប្រើវ៉ាក់សាំងជាច្រើនដូស ជាវិធានការបង្ការជាមុន។
ដោយឡែក រដ្ឋាភិបាលហូឡង់កាលពីថ្ងៃអាទិត្យ កន្លងទៅក៏បានប្រកាសថា ប្រទេសនេះនឹងពន្យារពេលប្រើប្រាស់វ៉ាក់សាំង AstraZeneca រហូតដល់យ៉ាងហោចណាស់ក៏ថ្ងៃទី ២៩ ខែមីនា ដែរដើម្បីជាការប្រុងប្រយ័ត្ន។
ទោះជាយ៉ាងណាក្ដី ប្រទេសមួយចំនួនផ្សេងទៀត បានអះអាងថា មិនមានផលប៉ះពាល់ពីវ៉ាក់សាំងនេះទេ ហើយក៏បន្តយុទ្ធនាការវ៉ាក់សាំងខ្លួនតាមធម្មតា។
ភ្នាក់ងារថ្នាំពេទ្យអឺរ៉ុបបានសង្កត់ធ្ងន់កាលពីថ្ងៃព្រហស្បតិ៍ថា គ្មានការបង្ហាញណាមួយដែលថា វ៉ាក់សាំងនេះបង្កឱ្យមានការកកឈាមនោះទេ។ ប្រភពដដែលបានបន្ថែមថា បើទោះជាប្រទេសមួយចំនួនពន្យារពេលនៃការប្រើប្រាស់វ៉ាកសាំងនេះក្ដី តែយុទ្ធនាការចាក់វ៉ាក់សាំងនៅតែបន្តដដែល ហើយការស៊ើបអង្កេតទាក់ទិននឹងករណីនេះ នៅតែបន្តដូចធម្មតា។
គួរបញ្ជាក់ផងដែរថា បើគិតត្រឹមថ្ងៃពុធសប្ដាហ៍មុន ប្រជាជនប្រមាណ ៥ លាននាក់នៅអឺរ៉ុប ដែលទទួលបានវ៉ាក់សាំង AstraZeneca របស់ Oxford ដោយក្នុងនោះមានគេរកឃើញថា ប្រមាណ ៣០ ករណី «ព្រឹត្តិការណ៍កកឈាមនៅសរសៃ» សំដៅលើគ្រាប់ឈាមតូចៗ ដែលផ្គុំគ្នានៅក្នុងសរសៃឈាម និងរារាំងមិនឱ្យឈាមហូរនៅតាមសរសៃ។
សេចក្តីថ្លែងការណ៍របស់ក្រុមហ៊ុន AstraZeneca ដែលបានចេញផ្សាយកាលពីថ្ងៃចន្ទ សប្ដាហ៍នេះ បានឱ្យដឹងថា អត្រានៃការស្ទះសរសៃឈាមវ៉ែនជ្រៅ និងការស្ទះសរសៃឈាមនៅសួត ដែលកើតឡើងលើអ្នកទទួលបានវ៉ាក់សាំងរាប់លាននាក់នោះ «មានអត្រាទាបជាងចំនួនប្រជាជនទូទៅដែលគេព្យាករថា អាចកើតជំងឺនេះពីធម្មជាតិទៀត ដូចគ្នានេះដែរ អត្រានេះក៏មានចំនួនតិចជាងវ៉ាក់សាំងកូវីដ ដែលមានអាជ្ញាប័ណ្ណផ្សេងទៀតផងដែរ»។
ប្រធានផ្នែកវេជ្ជសាស្ត្ររបស់ AstraZeneca លោកស្រី Ann Taylor បានមានប្រសាសន៍ថា៖ «ដោយសារតែវីរុសនៃជំងឺកូវីដ ទើបធ្វើឱ្យមនុស្សម្នាដាក់សម្ពាធមកលើករណីបុគ្គលនីមួយៗ ដែលទទួលបានវ៉ាក់សាំងយើង ខណៈករណីនេះអាចកើតឡើងពីធម្មជាតិក៏មាន ប៉ុន្តែពួកយើងប្ដេជ្ញាអនុវត្តតាមស្តង់ដានៃការត្រួតពិនិត្យសុវត្ថិភាពវ៉ាក់សាំង ដែលមានអាជ្ញាប័ណ្ណ ដើម្បីធ្វើរបាយការណ៍ស្ដីអំពីករណីទាំងនេះ ដោយធានាសុវត្ថិភាពដល់សាធារណជន»។
លោកស្រីបានបន្ថែមថា ទាក់ទិននឹងគុណភាពមិនមានទិន្នន័យណាដែលបង្ហាញថា វ៉ាក់សាំងដែលបានប្រើប្រាស់រួចនៅទូទាំងអឺរ៉ុប ឬនៅលើពិភពលោកមានបញ្ហានោះឡើយ។ ការធ្វើតេស្តបន្ថែមទៀត កំពុងតែធ្វើឡើងដោយគិតត្រឹមថ្ងៃចន្ទនេះគ្មានទិន្នន័យណាមួយបង្ហាញថា វ៉ាក់សាំងនេះបង្កឱ្យមានឈាមកកនៅសរសៃឡើយ។
សាស្ត្រាចារ្យឯកទេសខាងសុខភាពសាធារណៈមកពីសាកលវិទ្យាល័យ Queensland University of Technology លោក Gerard Fitzgerald បាននិយាយថា បណ្តាប្រទេសដែលបានបញ្ឈប់ការចាក់វ៉ាក់សាំង AstraZeneca «បានអនុវត្តយ៉ាងប្រុងប្រយ័ត្ន»។ ប៉ុន្តែ វាជាការសំខាន់ដែលត្រូវចងចាំថា ការកកឈាម គឺជារឿងធម្មតាហើយក៏អាចកើតឡើងមុនពេលចាក់វ៉ាក់សាំងទៀតនោះ។
លោកបានបន្តថា៖ «បើយោងតាមមជ្ឈមណ្ឌលត្រួតពិនិត្យ និងបង្ការជំងឺនៅអាមេរិក មនុស្សប្រមាណពី ៦០ ទៅ ១០០ ០០០ នាក់ស្លាប់ ដោយសារការកកឈាមនៅសួតក្នុង ១ ឆ្នាំ។ ករណីនេះកើតឡើងច្រើនជាងគេចំពោះមនុស្សចាស់ និងអ្នកដែលមានជំងឺរ៉ាំរ៉ៃដែលជាប្រភេទគោលដៅយុទ្ធនាការចាក់វ៉ាក់សាំងដូសដំបូង។ អ៊ីចឹង យើងក៏ត្រូវពិចារណាលើករណីនេះផងដែរ»៕
