កាលពីថ្ងៃសុក្រ ទី ១២ កុម្ភៈ រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយថា ប្រទេសរុស្ស៊ី បានត្រៀមខ្លួនផ្តាច់ទំនាក់ទំនងជាមួយសហភាពអឺរ៉ុប ប្រសិនបើសហភាពអឺរ៉ុបបន្តមានគម្រោងដាក់ទណ្ឌកម្មទៅលើប្រទេសរុស្ស៊ី។
លោក Lavrov បាននិយាយថា ប្រទេសរុស្ស៊ី បានត្រៀមខ្លួនរួចជាស្រេចហើយដើម្បីឆ្លើយតបទៅនឹងការដាក់ទណ្ឌកម្មណាមួយនៅក្នុងតំបន់ ដែលអាចបង្កឱ្យមានហានិភ័យដល់សេដ្ឋកិច្ចរុស្ស៊ី។
ការអត្ថាធិប្បាយរបស់រុស្ស៊ីបានធ្វើឡើងបន្ទាប់ពីអ្នកការទូតជាន់ខ្ពស់របស់សហភាពអឺរ៉ុបលោក Joe Borrell បាននិយាយកាលពីថ្ងៃទី ៩ កុម្ភៈ ថា ប្រទេសរុស្ស៊ី ចង់ផ្តាច់ខ្លួនចេញពីអឺរ៉ុប និងបែងចែកលោកខាងលិច។
កាលពីថ្ងៃទី ១០ កុម្ភៈ ឯកអគ្គរដ្ឋទូតសហភាពអឺរ៉ុបបានពិភាក្សាពីវិធានការដាក់ទណ្ឌកម្មទៅលើប្រទេសរុស្ស៊ី ចំពោះករណី Alexi Nalvany។ នៅក្នុងកិច្ចពិភាក្សានោះ មិនមានរដ្ឋជាសមាជិកណាមួយជំទាស់នឹងសំណើដាក់ទណ្ឌកម្មនេះទេ។ កិច្ចពិភាក្សាស្តីពីការដាក់ទណ្ឌកម្មនេះកើតឡើងបន្ទាប់ពីលោក Borrell បានទៅទីក្រុងម៉ូស្គូ ប្រទេសរុស្ស៊ី កាលពីសប្តាហ៍មុន។ នៅពេលដែលរដ្ឋមន្ត្រីការបរទេសរុស្ស៊ីលោក Sergei Lavrov បាននិយាយក្នុងសន្និសីទសារព័ត៌មានរួមគ្នា ហើយរិះគន់សហភាពអឺរ៉ុបថា ជាដៃគូដែលមិនអាចជឿទុកចិត្តបាន។
ប្រទេសរុស្ស៊ី បានប្រកាសក្នុងពេលដំណាលគ្នាថា ខ្លួននឹងបណ្តេញអ្នកការទូតចំនួន ៣ រូប ដែលមានអ្នកការទូតប្រទេសប៉ូឡូញ អាល្លឺម៉ង់ និងស៊ុយអែតប្រចាំនៅប្រទេសរុស្ស៊ី។ ការបណ្តេញចេញនេះ គឺទាក់ទងនឹងការចោទប្រកាន់អ្នកទាំង ៣ ពីការចូលរួមក្នុងការតវ៉ាប្រឆាំងនឹងការដាក់ពន្ធនាគារលោក Alexie Nalvany។
សហភាពអឺរ៉ុបបានបង្ហើបពីការដាក់ទណ្ឌកម្មថ្មីប្រឆាំងនឹងទីក្រុងម៉ូស្គូ ជុំវិញការឃុំខ្លួនមេដឹកនាំប្រឆាំងរុស្ស៊ីលោក Alexei Navalny និងការបង្ក្រាបទៅលើក្រុមបាតុករនៅប្រទេសរុស្ស៊ី។
យោងតាមរបាយការណ៍មួយចំនួនសហភាពអឺរ៉ុបគ្រោងនឹងហាមឃាត់ការធ្វើដំណើរ និងការបង្កកទ្រព្យសម្បត្តិទៅលើអ្នកដែលជាសម្ព័ន្ធមិត្តរបស់លោក Vladimir Putin។ នេះបើតាមការរាយការណ៍របស់សារព័ត៌មាន DW។
លោក Andrea Sasse រដ្ឋមន្ត្រីក្រសួងការបរទេសអាល្លឺម៉ង់បានថ្លែងនៅក្នុងសន្និសីទសារព័ត៌មានមួយដោយនិយាយថា អាល្លឺម៉ង់មានការមិនពេញចិត្តជាមួយប្រទេសរុស្ស៊ី ចំពោះករណីនេះ។ ប៉ុន្តែ លោកក៏បាននិយាយផងដែរថា អាល្លឺម៉ង់ចាប់អារម្មណ៍នឹងការធ្វើកិច្ចសហប្រតិបត្តិការជាមួយប្រទេសរុស្ស៊ី។
អ្នកជំនាញខាងគោលនយោបាយការបរទេសលោក Gernot Erler បាននិយាយថា ការលើកឡើងរបស់លោក Lavrov គឺមានន័យថា ជាកាយវិការគំរាមកំហែង។ នេះបើតាមការរាយការណ៍របស់សារព័ត៌មាន DW។
សមាជិកសភាសហភាពអឺរ៉ុបលោក Michael Gahler បាននិយាយថា ប្រទេសរុស្ស៊ី អាចនឹងជាអ្នកខាតបង់ប្រយោជន៍ បើសិនជារុស្ស៊ីផ្តាច់ទំនាក់ទំនងជាឯកតោភាគីជាមួយសហភាពអឺរ៉ុប៕