ក្រសួងការបរទេសរុស្ស៊ីបាននិយាយថា អ្នកទាំង ៣ ដែលរួមមានអ្នកការទូតពីប្រទេសអាល្លឺម៉ង់ ស៊ុយអែត និងប៉ូឡូញ ដែលបានចូលរួមក្នុងបាតុកម្មខុសច្បាប់នៅថ្ងៃទី ២៣ ខែមករា។ បណ្តាប្រទេសរបស់អ្នកការទូតទាំង ៣ បានថ្កោលទោសចំពោះការបណ្តេញចេញនេះ។
គួរបញ្ជាក់ផងដែរថា កាលពីថ្ងៃទី ២៣ និង ៣១ មករា មានការធ្វើបាតុកម្មតវ៉ាក្នុងការគាំទ្រដល់លោក Navalny នៅទូទាំងប្រទេសរុស្ស៊ី ដែលមានការចូលរួមមនុស្សជាច្រើន។ មនុស្សរាប់ពាន់នាក់ត្រូវបានចាប់ខ្លួននៅក្នុងអំឡុងពេលបាតុកម្មនោះ។
ការបណ្តេញចេញអ្នកការទូតទាំង ៣ ត្រូវបានប្រកាសត្រឹមតែប៉ុន្មានម៉ោង បន្ទាប់ពីប្រធានកិច្ចការបរទេសសហភាពអឺរ៉ុបលោក Josep Borrell បានជួបជាមួយរដ្ឋមន្ត្រីការបរទេសរុស្ស៊ីលោក Sergei Lavrov នៅទីក្រុងម៉ូស្គូ។
អ្នកវិភាគមួយចំនួនបានលើកឡើងថា ប្រទេសរុស្ស៊ី អាចបណ្តេញអ្នកការទូតអឺរ៉ុបទាំងនេះនៅថ្ងៃណាមួយ។ ការតវ៉ារបស់អ្នកគាំទ្រលោក Navalny គឺត្រូវបានធ្វើឡើងកាលពី ២ សប្តាហ៍មុន។ ប៉ុន្តែក្រសួងការបរទេសរុស្ស៊ីបានធ្វើសេចក្តីប្រកាសនេះអំឡុងពេលលោក Josep Borrell នៅក្រុងម៉ូស្គូ ប្រទេសរុស្ស៊ី។
ប្រទេសអាល្លឺម៉ង់ បានប្រកាសថា ការបណ្តេញចេញនេះ គឺគ្មានហេតុផលត្រឹមត្រូវទេ ហើយបាននិយាយថា ខ្លួននឹងមិនមានចម្លើយតបទេ ប្រសិនបើប្រទេសរុស្ស៊ី មិនពិចារណាឡើងវិញ។
លោក Borrell នៅក្នុងសេចក្តីថ្លែងការណ៍កាលពីថ្ងៃទី ៥ មករា បាននិយាយថា៖ «នៅក្នុងកិច្ចប្រជុំរបស់ខ្ញុំនៅព្រឹកថ្ងៃនេះជាមួយរដ្ឋមន្ត្រីការបរទេស Sergei Lavrov នៅទីក្រុងម៉ូស្គូខ្ញុំបានដឹងថាអ្នកការទូតអឺរ៉ុប ៣ នាក់ នឹងត្រូវបណ្តេញចេញពីប្រទេសរុស្ស៊ី»។
លោកបាននិយាយបន្តថា៖ «ខ្ញុំថ្កោលទោសយ៉ាងខ្លាំងចំពោះសេចក្តីសម្រេចនេះ ហើយបានច្រានចោលការចោទប្រកាន់ដែលថា ពួកគេបានធ្វើសកម្មភាព ដែលមិនស្របនឹងតំណែងរបស់ពួកគេក្នុងនាមជាអ្នកការទូតបរទេស។ ការសម្រេចចិត្តគួរតែត្រូវបានពិចារណាឡើងវិញ។ ខ្ញុំបានសង្កត់ធ្ងន់លើសាមគ្គីភាពរបស់សហគមន៍អឺរ៉ុបជាមួយរដ្ឋជាសមាជិកដែលពាក់ព័ន្ធ»។
បន្ថែមពីនេះអធិការបតីអាល្លឺម៉ង់ Angela Merkel បាននិយាយថា ការដែលរុស្ស៊ីបណ្តេញអ្នកការទូតអាល្លឺម៉ង់នេះ នឹងមិនប៉ះពាល់ដល់គម្រោង Nordstrom 2 pipeline ទេ ប៉ុន្តែប្រទេសអាល្លឺម៉ង់ នឹងបន្តអនុវត្តការដាក់ទណ្ឌកម្មប្រឆាំងនឹងបុគ្គលនៅក្នុងប្រទេសរុស្ស៊ី។
គួរបញ្ជាក់ផងដែរថា Nordstrom 2 pipeline គឺជាប្រព័ន្ធបំពង់បង្ហូរឧស្ម័នធម្មជាតិនៅឯនាយសមុទ្រដែលកំពុងដំណើរការនៅក្រោមសមុទ្របាល់ទិកពីប្រទេសរុស្ស៊ីទៅប្រទេសអាល្លឺម៉ង់។ គម្រោង Nord Stream នេះត្រូវបានជំទាស់ដោយសហរដ្ឋអាមេរិកក៏ដូចជាបណ្តាប្រទេសអឺរ៉ុបកណ្តាល និងខាងកើតមួយចំនួនដោយសារក្តីបារម្ភថា បំពង់បង្ហូរប្រេងនឹងបង្កើនឥទ្ធិពលរបស់រុស្ស៊ីនៅក្នុងតំបន់។
រីឯប្រទេសស៊ុយអែត បាននិយាយថា មិនមានមូលដ្ឋានច្បាស់លាស់ដែលថា អ្នកការទូតរបស់ខ្លួនបានចូលរួមក្នុងការតវ៉ានៅថ្ងៃទី ២៣ ខែមករា នេះ ហើយបាននិយាយថា ស៊ុយអ៊ែតរក្សាសិទ្ធិក្នុងការឆ្លើយតបដែលសមស្របណាមួយ។ រីឯប៉ូឡូញបាននិយាយថា ការបណ្តេញចេញអាចនាំឱ្យមានវិបត្តិកាន់តែស៊ីជម្រៅថែមទៀតនៅក្នុងទំនាក់ទំនងទ្វេភាគី។
ទោះយ៉ាងណារដ្ឋមន្ត្រីការបរទេសរុស្ស៊ី Sergei Lavrov បាននិយាយថា ការដាក់ទណ្ឌកម្មណាមួយរបស់អឺរ៉ុបចំពោះករណីរបស់លោក Navalny គឺមិនស្របច្បាប់នោះទេ។
ទាំងប្រទេសអាល្លឺម៉ង់ និងប៉ូឡូញបាននិយាយថា ពួកគេបានកោះហៅឯកអគ្គរដ្ឋទូតរុស្ស៊ីរៀងៗខ្លួន ដើម្បីសម្តែងការព្រួយបារម្ភចំពោះការបណ្តេញចេញនេះ ដែលជាការផ្លាស់ប្តូរដែលអាចនាំឱ្យមានវិធានការណាមួយ ហើយអ្នកការទូតជាច្រើនបន្តទៀត នឹងត្រូវបានបណ្ដេញបន្តទៀត៕