កាលពីថ្ងៃអង្គារ ទី ១៦ មីនា ប្រទេសអូស្ត្រាលី នៅតែបន្តប្រើប្រាស់វ៉ាក់សាំង AstraZeneca ទោះបីជាបណ្តាប្រទេសនៅអឺរ៉ុបមួយចំនួនបានផ្អាកការប្រើប្រាស់ក្រោយពីមានករណីឈាមកកក្នុងសរសៃឈាមយ៉ាងណាក្ដី។
ប្រធានផ្នែកវេជ្ជសាស្ត្រអូស្ត្រាលីលោក Paul Kelly បាននិយាយថា រដ្ឋាភិបាលអូស្ត្រាលីនៅតែមានទំនុកចិត្តលើវ៉ាក់សាំង AstraZeneca។ លោកបានបន្តនិយាយថា ខណៈពេលបច្ចុប្បន្ននេះ មិនមានភ័ស្តុតាងណាមួយបង្ហាញថា វ៉ាក់សាំងប្រភេទនេះបណ្តាលឱ្យមានភាពកកឈាមនោះទេ ប៉ុន្តែគេកំពុងតែស៊ើបអង្កេតពីផលប៉ះពាល់ ដែលបានរាយការណ៍កន្លងមក។ នេះបើតាមការរាយការណ៍របស់សារព័ត៌មាន Reuters។
កាលពីថ្ងៃទី ១៤ មីនា ក្រុមហ៊ុនដែលផលិតវ៉ាក់សាំង AstraZeneca បានឲ្យដឹងថា ក្រោយពីពិនិត្យមនុស្សជាង ១៧ លាននាក់ដែលបានទទួលវ៉ាក់សាំងរួចនៅក្នុងសហភាពអឺរ៉ុប និងចក្រភពអង់គ្លេស មិនមានករណីកកឈាមក្នុងសរសៃឈាមឡើយ៕