ក្រុងសេអ៊ូល៖ នាយសេនាធិការយោធាចម្រុះនៃប្រទេស កូរ៉េខាងត្បូង (JCS) បានថ្លែងថា កូរ៉េខាងជើងបានបាញ់ទៅនឹងអ្វីដែលបានបង្ហាញឲ្យឃើញថា គឺទំនងជាមីស៊ីលបាលីស្ទិកចម្ងាយជិតចំនួន ២ គ្រាប់ ឆ្ពោះទៅសមុទ្រខាងកើតកាលពីថ្ងៃអាទិត្យ ជាការបាញ់សាកល្បងជាបន្តបន្ទាប់ថ្មីបំផុត ទោះបីជាប្រទេសនេះ កំពុងស្ថិតនៅក្នុងការប្រកាសអាសន្នក្នុងកម្រិតខ្ពស់ប្រឆាំងវីរុសកូរ៉ូណាក្តី។
នាយសេនាធិការយោធាចម្រុះរបស់ប្រទេស កូរ៉េខាងត្បូង បានថ្លែងថា មីស៊ីល ២ គ្រាប់ ត្រូវបានគេបាញ់ឆ្ពោះទៅទិសភាគឦសានចេញពីទីក្រុងឆ្នេរសមុទ្រវ៉ុនសានភាគខាងកើតនៅម៉ោង ៦ និង ១០ នាទីព្រឹក ហើយមីស៊ីលទាំងនោះ ហោះបានចម្ងាយប្រហែល ២៣០ គីឡូម៉ែត្រ ស្ថិតក្នុងរយៈកម្ពស់ប្រហែល ៣០ គីឡូម៉ែត្រ ដោយបានបន្ថែមថា អាជ្ញាធរចារកម្មកូរ៉េខាងត្បូង និងអាមេរិក កំពុងវិភាគការបាញ់សាកល្បងមីស៊ីលឲ្យបានច្បាស់លាស់ថែមទៀត។
JCS បានថ្លែងថា៖ «នៅក្នុងស្ថានការណ៍មួយដែលពិភពលោកទាំងមូល កំពុងជួបប្រទះផលវិបាកជាច្រើន ដោយសារជំងឺកូវីដ ១៩ សកម្មភាពយោធាបែបនេះរបស់ប្រទេស កូរ៉េខាងជើង គឺជាទង្វើមិនត្រឹមត្រូវយ៉ាងខ្លាំង ហើយយើងអំពាវនាវឲ្យបញ្ឈប់ជាបន្ទាន់»។
JCS បានបន្ថែមថា យោធាកូរ៉េខាងត្បូងកំពុងត្រួតពិនិត្យមើលស្ថានការណ៍នោះ យ៉ាងយកចិត្តទុកដាក់បំផុត ខណៈដែលយោធារបស់ខ្លួន បានត្រៀមលក្ខណៈប្រុងជើងការរួចជាស្រេច។
ប្រទេស កូរ៉េខាងជើង បានធ្វើសមយុទ្ធបាញ់សាកល្បងអាវុធ និងកាំភ្លើងធំជាបន្តបន្ទាប់នៅឆ្នាំនេះ លើកលែងតែការធ្វើសមយុទ្ធបាញ់កាំភ្លើងធំទ្រង់ទ្រាយតូច ការបាញ់កាលពីថ្ងៃអាទិត្យ ត្រូវបានគេជឿថាទំនងជាតេស្តអាវុធទ្រង់ទ្រាយធំលើកទី ៤ របស់កូរ៉េខាងជើងនៅឆ្នាំនេះ។
ការសាកល្បងចុងក្រោយបែបនេះ បានធ្វើឡើងកាលពីថ្ងៃទី ២១ ខែមីនា នៅពេលកូរ៉េខាងជើងបានបាញ់មីស៊ីលបាលីស្ទិកចម្ងាយជិត ២ គ្រាប់ ត្រូវបានគេជឿថា ទំនងជាអាវុធប្រភេទថ្មីរបស់ខ្លួន នៃប្រព័ន្ធមីស៊ីលយុទ្ធសាស្ត្រយោធារបស់អាមេរិក (ATACMS) ចេញពីប្រទេសលោកខាងលិច នៃតំបន់ស៊ុនចុននៅក្នុងខេត្តព្យុងហ្គាន៕ Yonhap/SK