ក្រុងសេអ៊ូល៖ ប្រព័ន្ធផ្សព្វផ្សាយរដ្ឋបានឲ្យដឹងកាលពីថ្ងៃចន្ទថា ប្រទេស កូរ៉េខាងជើង ប្រដាប់ដោយអាវុធនុយក្លេអ៊ែរនេះបានធ្វើតេស្ត «ជើងទម្របាញ់គ្រាប់រ៉ុក្កែតធុនធ្ងន់» ទទួលបានជោគជ័យ ប៉ុន្តែមេដឹកនាំកូរ៉េខាងជើង លោក គីម ជុងអ៊ុន មិនបានពិពណ៌នាថា ជាការបញ្ជាឲ្យធ្វើសមយុទ្ធដូចក្រុមអ្នកវិភាគបាននិយាយថា ក្រុងព្យុងយ៉ាងបានស្វះស្វែងរកមធ្យោបាយ ដើម្បីធ្វើទំនើបកម្មអាវុធរបស់ខ្លួននោះទេ។
ដោយពិភពលោកបានផ្តោតទៅលើការឆ្លងរីករាលដាលវីរុសកូរ៉ូណាប្រភេទថ្មី ហើយប្រទេស កូរ៉េខាងជើង បានអះអាងថា ប្រទេសរបស់ខ្លួនមិនមានករណីឆ្លងជំងឺកូវីដ ១៩ ម្នាក់នោះទេ ហើយបានដាក់ប្រទេសឲ្យនៅដាច់ដោយឡែកពីគេ បានធ្វើឡើងតាមរយៈការបាញ់មីស៊ីលបែបនេះ ៤ លើកនៅក្នុងខែនេះ។
ទីភ្នាក់ងារព័ត៌មានមជ្ឈិមកូរ៉េផ្លូវការ (KCNA) មិនបាននិយាយនៅក្នុងរបាយការណ៍របស់ខ្លួនថា លោក គីម ជុងអ៊ុន បានបញ្ជាផ្ទាល់នៅក្នុងការបាញ់សាកល្បង កាលពីថ្ងៃអាទិត្យកន្លងទៅ។
មេដឹកនាំកូរ៉េខាងជើងជានិច្ចកាលមិនសូវបង្ហាញមុខនៅក្នុងការត្រួតពិនិត្យមើលការបាញ់សាកល្បងរបស់កូរ៉េមួយនេះ ប៉ុន្តែនៅក្នុងឱកាសនេះទីភ្នាក់ងារព័ត៌មាន KCNA បាននិយាយថា ការបាញ់តេស្តមីស៊ីល ត្រូវបានដឹកនាំដោយអនុប្រធានគណបក្សដែលកំពុងគ្រប់គ្រងអំណាច គឺលោក រី យ៉ុង ចូល ហើយត្រូវបានធ្វើឡើងដោយបណ្ឌិត្យសភាវិទ្យាសាស្ត្រការពារជាតិ។
ប្រទេស កូរ៉េខាងត្បូង បានថ្លែងថា ការបាញ់មីស៊ីល ២ គ្រាប់ ត្រូវបានគេសន្និដ្ឋានថា ជាប្រភេទមីស៊ីលបាលីស្ទិក ត្រូវបានបាញ់កាលពីថ្ងៃអាទិត្យ ចេញពីកំពង់ផែទីក្រុងវ៉ុនសាន ប្រទេស កូរ៉េខាងជើង ចូលទៅក្នុងសមុទ្រជប៉ុន ត្រូវបានគេស្គាល់ថា ជាសមុទ្រខាងកើត។
រូបភាពជាច្រើនបានថតដោយកាសែតរូដុង ស៊ីនម៉ុន ផ្លូវការរបស់កូរ៉េខាងជើង បានបង្ហាញរ៉ុក្កែតជាច្រើនគ្រាប់បានផ្ទុះចេញពីជើងទម្រ ដែលមាន ៦ កាណុង ដោយបានបាញ់អ្វីដែលបង្ហាញថា ត្រូវបានកំណត់គោលដៅទៅលើកោះមួយ ហើយលោក គីម ជុងអ៊ុន មិនត្រូវបានគេមើលឃើញនៅក្នុងរូបថតនោះទេ។
លោក ហ្គូ យ៉ុង-យ៉ុន ជាអ្នកវិភាគម្នាក់នៅវិទ្យាស្ថានសម្រាប់ការសិក្សានយោបាយបានថ្លែងថា៖ «តាមរយៈការអវត្តមានរបស់លោក គីម ជុងអ៊ុន ប្រទេស កូរ៉េខាងជើង កំពុងព្យាយាមកាត់បន្ថយការបាញ់សាកល្បងដ៏សំខាន់ ហើយបានបញ្ជាក់ថា ការបាញ់តេស្តមីស៊ីលនោះ គឺគ្រាន់តែជាផ្នែកមួយនៃការធ្វើសមយុទ្ធធម្មតាតែប៉ុណ្ណោះ»។
ការបាញ់សាកល្បងលើកចុងក្រោយ លោក គីម ជុងអ៊ុន មិនត្រូវបានគេមើលឃើញនៅកន្លែងព្រឹត្តិការណ៍មួយបែបនេះនោះទេ គឺនៅពេលកូរ៉េខាងជើង បានបាញ់សាកល្បងមីស៊ីលបាលីស្ទិក ចេញពីនាវាមុជទឹកថ្មីមួយកាលពីខែតុលា បានប៉ុន្មានថ្ងៃនៅមុនមន្ត្រីមកពីក្រុងព្យុងយ៉ាង និងក្រុងវ៉ាស៊ីនតោន គ្រោងជួបប្រជុំនៅក្នុងទីក្រុងស្តុកហូលម៍ ដើម្បីបន្តដោះស្រាយបញ្ហាជាប់គាំងនោះតាមផ្លូវការទូតឡើងវិញ៕ Yonhap/SK