ក្រុងរីយ៉ាដ៖ ប្រទេស អារ៉ាប៊ី សាអ៊ូឌីត កាលពីថ្ងៃពុធបានអំពាវនាវឲ្យអាមេរិកដកប្រទេស ស៊ូដង់ ចេញពីបញ្ជីឈ្មោះប្រទេសឧបត្តម្ភភេរវកម្ម នៅក្នុងកិច្ចប្រជុំមួយជាមួយប្រេសិតពិសេសរបស់អាមេរិក។
អាមេរិកកាលពីខែមុនបានធ្វើការផ្លាស់ប្តូរយ៉ាងឆាប់រហ័ស ដោយបានដកប្រទេស ស៊ូដង់ ចេញពីបញ្ជីខ្មៅជុំវិញការរំលោភសិទ្ធិសេរីភាពខាងសាសនា ប៉ុន្តែក្រុងខារទុំ បានរង់ចាំរង្វាន់ធំជាងនេះអំពីការដកប្រទេសមួយនេះ ចេញពីបញ្ជីភេរវកម្ម។
ការរៀបចំដកនោះ បានបង្កឧបសគ្គយ៉ាងខ្លាំងដល់ការវិនិយោគនៅក្នុងប្រទេសមួយនេះ ដែលកំពុងបង្ហាញពីការគ្រប់គ្រងយោធា និងជម្លោះអស់ជាច្រើនទសវត្សរ៍នៅក្នុងប្រទេសនេះ។
ប្រព័ន្ធផ្សព្វផ្សាយអារ៉ាប៊ី សាអ៊ូឌីត បាននិយាយថា រដ្ឋមន្ត្រីការបរទេសរបស់ព្រះរាជាណាចក្រទទួលបន្ទុកផ្នែកកិច្ចការអាហ្វ្រិកលោក អាហ៍ម៉េដ ប៊ិនអាប់ឌុលឡាហ្ស៊ីស កាត់តាន់ បានជួបគ្នានៅក្នុងទីក្រុងរីយ៉ាដ ជាមួយប្រេសិតពិសេសអាមេរិកប្រចាំនៅប្រទេស ស៊ូដង់ លោក ដូណាល់ ប៊ូត ហើយ «បានបញ្ជាក់ប្រាប់ទៅកាន់ទីក្រុងវ៉ាស៊ីនតោន អំពីភាពចាំបាច់នៃការដកប្រទេស ស៊ូដង់ ចេញពីបញ្ជីឈ្មោះភេរវកម្ម»។
យោងតាមប្រព័ន្ធផ្សព្វផ្សាយរដ្ឋ Al-Ekhbaria បានឲ្យដឹងថា រដ្ឋមន្ត្រីរូបនោះបានសង្កត់ធ្ងន់ថា «ការគាំទ្ររបស់អារ៉ាប៊ី សាអ៊ូឌីត ជុំវិញសន្តិសុខ និងស្ថិរភាពរបស់ប្រទេស ស៊ូដង់»។
ក្រុងវ៉ាស៊ីនតោនបានដាក់ក្រុងខារទុំថា ជារដ្ឋឧបត្ថម្ភភេរវកម្មចូលក្នុងបញ្ជីខ្មៅរបស់ខ្លួនចាប់តាំងពីឆ្នាំ ១៩៩៣ ជុំវិញការចោទប្រកាន់ពីបទចូលរួមជាមួយក្រុមអ៊ិស្លាមជ្រុលនិយម ជាពិសេសក្រុមអាល់កៃដា។
នៅក្នុងឆ្នាំ ២០១៧ អាមេរិកបានដកទណ្ឌកម្មពាណិជ្ជកម្មដែលបានដាក់ទៅលើប្រទេស ស៊ូដង់ អស់ជាច្រើនទសវត្សរ៍កាលពីមុន៕ AFP/SK