ក្រុងហាណូយៈ អគ្គលេខាធិការបក្សកុម្មុយនីស និង ជាប្រធានរដ្ឋវៀតណាម លោក Nguyen PhuTrong គ្រោងមកបំពេញទស្សនកិច្ចប្រទេសកម្ពុជាពីរយៈពេលពីរថ្ងៃ គឺពីថ្ងៃទី២៥ ដល់ ២៦ ខែកុម្ភៈ ដើម្បីរឹតចំណងទំនាក់ទំនងការទូតរវាងប្រទេសជិតខាងទាំងពីរ។ នេះបើយោងតាមសារព័ត៌មានរបស់ប្រទេសវៀតណាម Vietnam News បានចុះផ្សាយថ្ងៃនេះ។
លោក PhuTrong គ្រោងជួបជាមួយមន្ត្រីជាន់ខ្ពស់នៃរដ្ឋាភិបាលកម្ពុជា ក្នុងគោលបំណងពង្រឹងការទំនាក់ទំនងនិងមិត្តភាព រវាងប្រជាជននៃប្រទេសទាំងពីរ។
កាលពីពេលកន្លងទៅ នៅក្រោមការដឹកនាំរបស់លោកប្រធានរដ្ឋ Nguyen PhuTrong និងលោកនាយករដ្ឋមន្ត្រី ហ៊ុន សែន នោះ ប្រទេសទាំងពីរ បានសម្រេចសមិទ្ធិផលជាច្រើន ដោយបានធ្វើកិច្ចសហប្រតិបតិ្តលើវិស័យជាច្រើនដូចជាវិស័យសេដ្ឋកិច្ច នយោបាយ និងសង្គម ហើយបានរៀបចំការផ្លាស់ប្តូរគណៈប្រតិភូរវាងមេដឹកនាំ ក្រសួង និងស្ថាប័នរបស់ប្រទេសទាំងពីរ។
លើសពីនេះទៅទៀតនោះ ប្រទេសវៀតណាម និងកម្ពុជា បានធ្វើកិច្ចសហប្រតិបត្តិ ដើម្បីផលប្រយោជន៍របស់ប្រជាជននៃប្រទេសទាំងពីរ ដូចជាវិស័យការដឹកជញ្ជូន អគ្គិសនី ទេសចរណ៍ ទូរគមនាគមន៍ និងការងារសំខាន់បំផុតមួយទៀត ដែលប្រទេសជិតខាងទាំងពីរ បានធ្វើរួមគ្នានោះ គឺការបោះបង្គោលព្រំដែន ដើម្បីសន្តិភាពនិងមិត្តភាព។
អគ្គលេខាធិការបក្សកុម្មុយនីស និងជាប្រធានរដ្ឋវៀតណាមលោក Nguyen PhuTrong គ្រោងចូលគាល់ ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជានិងសម្តេចព្រះមហាក្សត្រី នរោត្តមមុនីនាថសីហនុ សម្តេចអគ្គមហាសង្ឃរាជាធិបតី ទេព វង្ស ម្តេចព្រះមហាសង្ឃរាជនៃគណៈមហានិកាយនិងសម្តេចព្រះអភិសិរីសុគន្ធាមហាសង្ឃរាជាធិបតី បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជាផងដែរ និងជួបជាមួយ ប្រធានសភា សម្តេច ហេង សំរិន ប្រធានព្រឹទ្ធសភាសម្តេច សាយ ឈុំ និងនាយករដ្ឋមន្ត្រីនៃព្រះរាជាណាចក្រកម្ពុជាសម្តេច ហ៊ុន សែន ដែលនឹងធ្វើជាសក្សីក្នុងពិធីចុះហត្ថលេខាលើកិច្ចព្រមព្រៀងនានារវាងវៀតណាម និងកម្ពុជា។
ប្រទេសទាំងពីរ ជឿជាក់ថា ទស្សនកិច្ចនេះ នឹងសម្រេចបាននូវជោគជ័យក្នុងទំនាក់ទំនងទ្វេភាគីយ៉ាងត្រចះត្រចង់៕ Vietnam News/ PSA