មេដឹកនាំប្រទេស Belarus គឺលោក Alexander Lukashenko បានឆ្លើយតបទៅនឹងការថ្កោលទោសរបស់សហភាពអឺរ៉ុបទាក់ទិននឹងករណីបង្វែរជើងហោះហើរចាប់អ្នកកាសែតនៅ Belarus កាលពីថ្ងៃពុធដោយថា ប្រទេសទាំងនោះ «ជាអ្នកបន់ឱ្យប្រទេសនេះអាក្រក់» និងព្យាយាម «ច្របាច់កប្រទេសបេឡារុស»។
នេះជាលើកទី១ ហើយដែលលោក Lukashenko បាននិយាយជាសាធារណៈចាប់តាំងពីករណីយន្ដហោះ Ryanair ត្រូវបានគេបង្វែរទិសដៅ កាលពីចុងសប្តាហ៍ហើយអ្នកសរសេរប្លុក Raman Pratasevich និងនិស្សិតច្បាប់ គឺ Sofia Sapega ត្រូវបានចាប់ខ្លួន។
នៅក្នុងសុន្ទរកថារបស់ លោក Lukashenko បាននិយាយថា ចំណាត់ការរបស់ប្រទេសបេឡារុស គឺដោយសារទង្វើរបស់អ្នកទាំង ២ «ហួសព្រំដែន»។
លោកបាននិយាយថា៖ «ដូចដែលយើងបានគិតទុក អ្នកដែលបន់ឱ្យប្រទេសយើងអាក្រក់ទាំងក្នុង និងក្រៅប្រទេស បានផ្លាស់ប្តូរវិធីសាស្ត្រ ដើម្បីវាយប្រហារយើង។ ពួកគេបានឆ្លងហួសបន្ទាត់ក្រហមជាច្រើនលើក និងខុសសីលធម៌មនុស្ស»។
លោកក៏បាននិយាយផងដែរថា ការគំរាមបំផ្ទុះគ្រាប់បែក (ដែលអាជ្ញាធរបេឡារុសបាននិយាយថា ស្ថិតនៅពីក្រោយការចុះចតរបស់យន្តហោះនៅទីក្រុងមីនស្ក៍ គឺជាស្នាដៃរបស់ប្រទេសស្វ៊ីស ហើយកងកម្លាំងខាងក្រៅប្រទេស កំពុងបង្កាត់ភ្លើងសង្គ្រាមប្រឆាំងនឹងប្រទេសខ្លួនផងដែរ។
លើសពីនេះទៀតលោក Lukashenko បាននិយាយថាការដែលប្រទេសមួយបង្ខំឱ្យយន្តហោះចុះចត នោះគឺជាការកុហក ហើយបាននិយាយថា ប្រទេសបេឡារុស បានធ្វើសកម្មភាព «ដើម្បីការពារប្រជាជនដោយស្របច្បាប់» ប៉ុណ្ណោះ៕