រដ្ឋាភិបាលសាធារណរដ្ឋអាហ្វ្រិកកណ្ដាល បើកការស៊ើបអង្កេតលើអតីតប្រធានាធិបតីលោក Francois Bozize ក្រោមការចោទប្រកាន់ថា កាលពីខែធ្នូលោកបានប៉ុនប៉ងធ្វើរដ្ឋប្រហារដោយមានជំនួយពីក្រុមប្រដាប់អាវុធប៉ុន្មានថ្ងៃមុនប្រទេសនេះត្រូវធ្វើការបោះឆ្នោតជ្រើសរើសប្រធានាធិបតី និងសភា។
រដ្ឋអាជ្ញាសាធារណៈបានប្រកាសក្នុងសេចក្ដីថ្លែងការណ៍កាលពីថ្ងៃចន្ទ ទី ៤ មករា ថា៖ «ការស៊ើបអង្កេតរបស់តុលាការត្រូវបានបើក [លើលោក Bozize] ទាក់ទងនឹងសកម្មភាពបង្កអស្ថិរភាព និងការបះបោរ»។
កាលពីថ្ងៃទី ១៩ ធ្នូ រដ្ឋាភិបាលបានប្រកាសថា ក្រុមប្រដាប់អាវុធចំនួន ៣ បានបង្កើតសម្ព័ន្ធភាពមួយវាយលុកទៅកាន់រដ្ឋធានី Bangui។ កម្លាំងរក្សាសន្តិភាព MINUSCA របស់អង្គការសហប្រជាជាតិបាននិយាយនៅថ្ងៃបន្ទាប់ថា ការវាយលុកត្រូវបានបញ្ឈប់ ឬដកថយវិញ។
លោក Bozize បានឡើងកាន់អំណាចតាមរយៈរដ្ឋប្រហារមួយនៅក្នុងឆ្នាំ ២០០៣ រួចមករូបលោកត្រូវបានផ្ដួលរំលំនៅឆ្នាំ ២០១៣ ដែលការដកចេញតំណែងនេះ បានធ្វើឱ្យប្រទេសនេះធ្លាក់ចូលក្នុងជម្លោះនិកាយសាសនា។ កាលពីឆ្នាំ ២០១៩ អតីតប្រធានាធិបតីរូបនេះ បានវិលត្រឡប់មកប្រទេសវិញ បន្ទាប់ពីនិរទេសខ្លួនអស់រយៈពេលជាច្រើនឆ្នាំ ធ្វើឱ្យមានការភ័យខ្លាចថា លោកមកកាន់អំណាចវិញ។
លោកត្រូវបានតុលាការហាមឃាត់មិនឱ្យឈរឈ្មោះបោះឆ្នោត ព្រោះមានដីកាចាប់ខ្លួនតាំងពីឆ្នាំ ២០១៤ ពីបទឃាតកម្ម និងការធ្វើទារុណកម្ម ហើយស្ថិតក្រោមការដាក់ទណ្ឌកម្មដោយអង្គការសហប្រជាជាតិ៕