ក្រុងសាន់ត្យាហ្គោ៖ លោកប្រធានាធិបតីស៊ីលី ស៊ីបាស្ទៀន ភីណឺរ៉ា បានថ្លែងកាលពីថ្ងៃអង្គារថា លោកនឹងមិនលាលែងពីតំណែងដោយសារការតវ៉ាបណ្តាលឲ្យមនុស្សស្លាប់យ៉ាងច្រើន ជុំវិញភាពមិនចុះសម្រុងគ្នានឹងលក្ខខណ្ឌសង្គមក្រីក្រ ដែលបានធ្វើឲ្យប្រជាជនចេញទៅតាមដងផ្លូវធ្វើការតវ៉ាឈានដល់សប្តាហ៍ទី ៣ ហើយនោះទេ។
ដោយត្រូវបានចោទសួរដោយទូរទស្សន៍ BBC នៅក្នុងបទសម្ភាសមួយថា តើលោកនឹងចុះចេញពីតំណែងដែរឬទេ? មេដឹកនាំមហាសេដ្ឋីអភិរក្សនិយមរូបនេះ ឆ្លើយថា «ទេ»។
លោក ស៊ីបាស្ទៀន ភីណឺរ៉ា បានថ្លែងថា៖ «បញ្ហាទាំងអស់នេះបានកើតឡើងអស់រយៈពេលជាង ៣០ ឆ្នាំមកហើយ» «ខ្ញុំទទួលខុសត្រូវចំពោះផ្នែកខ្លះនៃបញ្ហាទាំងនេះ ហើយខ្ញុំទទួលខុសត្រូវ ប៉ុន្តែមិនមែនមានតែខ្ញុំម្នាក់ឯងនោះទេ»។
ការប៉ះទង្គិចគ្នា បានផ្ទុះឡើងកាលពីថ្ងៃអង្គារ ដោយបានបន្ថែមទៅនឹងអំពើហិង្សាដែល កើតមានឡើងមួយក្នុងចំណោមក្រុមបណ្តាប្រទេសរីកចម្រើនបំផុតនៅអាមេរិកឡាទីនមួយនេះ។ ការប៉ះទង្គិចនេះបានបង្ខំឲ្យរដ្ឋាភិបាលលុបចោលជំនួបកំពូលស្តីពីការប្រែប្រួលអាកាសធាតុ និងសេដ្ឋកិច្ចអន្តរជាតិធំ ២ ហើយបានបើកកិច្ចពិភាក្សានានា ជាមួយគណបក្សប្រឆាំងឆ្វេងនិយម។
ក្រុមអ្នកតវ៉ារាប់ពាន់នាក់ បានចេញទៅតាមដងផ្លូវនៅក្នុងរដ្ឋធានីសាន់ត្យាហ្គោ និងនៅក្នុងទីក្រុងខនស៊ីបស៊ិន និងវីណា ឌែល ម៉ារ ភាគខាងត្បូង គឺនៅភាគខាងលិចនៃទីក្រុងសាន់ត្យាហ្គោ។
ប៉ូលិសបានថ្លែងថា ប៉ូលិសបានបាញ់និស្សិត ២ នាក់ ឲ្យរងរបួស នៅក្នុងចំណោមក្រុមមួយ ដែលបានព្យាយាមគ្រប់គ្រងវិទ្យាល័យសាធារណៈមួយ នៅក្នុងទីក្រុងសាន់ត្យាហ្គោ។ និស្សិតទាំង ២ នាក់នោះ ត្រូវបានព្យាបាលនៅមន្ទីរពេទ្យមួយកន្លែង ហើយពួកគេត្រូវបានដោះលែងវិញ។
ដោយមានការលើកឡើងពីការភ័យខ្លាចអំពីសណ្តាប់ធ្នាប់សាធារណៈនោះប្រធានបាល់ទាត់អាមេរិកខាងត្បូង បានប្រកាសថា ពួកគេកំពុងបើកកន្លែងសម្រាប់ការប្រកួតបាល់ទាត់ផ្តាច់ព្រ័ត្រ ទ្វីបអឺរ៉ុបទ្រង់ទ្រាយធំមួយចាប់ពីក្រុងសាន់ត្យាហ្គោនេះ។
អាជ្ញាធរបាល់ទាត់ CONMEBOL បានថ្លែងក្រោយពីកិច្ចប្រជុំនៅក្នុងប្រទេស ប៉ារ៉ាហ្គាយ ថា ការប្រកួតផ្តាច់ព្រ័ត្ររបស់ក្លិប Copa Libertadores បានបើកឲ្យចូលរួមនៅក្នុងខែនេះ បច្ចុប្បន្ននឹងត្រូវរៀបចំធ្វើឡើងនៅក្នុងរដ្ឋធានីលីម៉ា។
នៅក្នុងសេចក្តីថ្លែងការណ៍មួយអាជ្ញាធរនោះ បានថ្លែងថា៖ «ជម្រើសនោះ ត្រូវបានផ្អែកទៅលើការផ្តល់ជូនរបស់រដ្ឋាភិបាលប្រទេស ប៉េរូ និងទៅលើការធានាសន្តិសុខដែលប្រទេសនេះបានផ្តល់ឲ្យ»។
ក្រុមរដ្ឋអាជ្ញាបានថ្លែងថា មនុស្ស ២០ នាក់ បានស្លាប់នៅក្នុងចលាចលចាប់តាំងពីការតវ៉ាបានចាប់ផ្តើមនៅទីនេះ កាលពីថ្ងៃទី ២០ ខែតុលា។
គណៈប្រតិភូសិទ្ធិមនុស្សរបស់ UN កំពុងស៊ើបអង្កេតទៅលើប៉ូលិសបង្ក្រាបក្រុមអ្នកតវ៉ាទាំងនោះ៕ AFP/SK