The Phnom Penh Post Search

Search form




Logo of Phnom Penh Post newspaper Phnom Penh Post - ប្រធានាធិបតី​អាល់់ហ្សេរី​ព្រមាន​អ្នក​គាំទ្រ​លទ្ធិប្រជាធិបតេយ្យ ​ជុំវិញ​សកម្មភាព​ក្នុង​បំណង​មិន​ល្អ




ប្រធានាធិបតី​អាល់់ហ្សេរី​ព្រមាន​អ្នក​គាំទ្រ​លទ្ធិប្រជាធិបតេយ្យ ​ជុំវិញ​សកម្មភាព​ក្នុង​បំណង​មិន​ល្អ

Content image - Phnom Penh Post
លោក​ Abdelmadjid Tebboune ប្រធានាធិបតី​អាល់ហ្សេរី។ រូបថត AFP

ប្រធានាធិបតី​អាល់់ហ្សេរី​ព្រមាន​អ្នក​គាំទ្រ​លទ្ធិប្រជាធិបតេយ្យ ​ជុំវិញ​សកម្មភាព​ក្នុង​បំណង​មិន​ល្អ

លោក​ប្រធានាធិបតី​អាល់ហ្សេរី Abdelmadjid Tebboune កាល​ពី​ថ្ងៃ​អង្គារ ​បាន​ព្រមាន​ក្រុម​អ្នក​តវ៉ា​គាំទ្រ​លទ្ធិប្រជាធិបតេយ្យ ​Hirak ជុំវិញ​សកម្មភាព​មាន​បំណង​មិន​ល្អ ខណៈ​អាជ្ញាធរ​និយាយ​ថា ចលនា​នេះ កំពុង​ត្រូវ​បាន​គេ​គ្រប់គ្រង​នៅ​មុន​ការ​បោះឆ្នោត។

លោក Tebboune បាន​ព្រមាន​ប្រឆាំង​នឹង​សកម្មភាព​មាន​បំណង​មិន​ល្អ ដែល​បាន​ព្យាយាម​បង្ក​ការ​រាំង​ស្ទះ​ដល់​ដំណើរការ​លទ្ធិប្រជាធិបតេយ្យ ក្រោយ​ពី​ជំនួប​នៃ​ក្រុម​ប្រឹក្សា​សន្តិសុខ​ជាន់​ខ្ពស់​របស់​ប្រទេស​នេះ។

លោក​ប្រធានាធិបតី​បាន​អំពាវនាវ​ឱ្យ​មាន​ការ​បោះឆ្នោត​នៅ​ថ្ងៃទី ១២ មិថុនា ជា​កិច្ច​ខិតខំ​ប្រឹងប្រែង​មួយ ដើម្បី​ឆ្លើយ​តប​ទៅ​នឹង​វិបត្តិ​នយោបាយ និង​សេដ្ឋកិច្ច សង្គម ប៉ុន្តែ​ក្រុម​អ្នក​គាំទ្រ​ចលនា Hirak បាន​ប្រកាស​ការ​បោះឆ្នោត​នោះ​ថា ​ជា​ការ​ក្លែងបន្លំ។

ចលនា​តវ៉ា ​Hirak បាន​ចាប់​ផ្តើម​ឡើង​កាល​ពី​ថ្ងៃទី ២២ ខែ កុម្ភៈ​ឆ្នាំ ២០១៩ ក្នុង​គោល​បំណង​បដិសេធ​កិច្ច​ប្រឹងប្រែង​របស់​អតីត​ប្រធានាធិបតី ​Abdelaziz Bouteflika ដើម្បី​កាន់​តំណែង​អាណត្តិ​ទី៥ របស់​លោក។

បុរស​ខ្លាំង​ដែល​កំពុង​ឈឺ​រូប​នេះ ត្រូវ​បាន​បង្ខំ​ឱ្យ​ចុះចេញេ​ពី​តំណែង​រយៈពេល​ប៉ុន្មាន​សប្តាហ៍​ក្រោយ​មក ប៉ុន្តែ​ចលនា ​Hirak នេះ​បាន​បន្ត​ធ្វើ​បាតុកម្ម ដោយ​បាន​ទាមទារ​ឱ្យ​កែប្រែ​ប្រព័ន្ធ​គ្រប់គ្រង​មួយ ដែល​មាន​តាំង​ពី​ប្រទេស​អាល់ហ្សេរី ទទួល​បាន​ឯករាជ្យ​ពី​បារាំង​នៅ​ក្នុង​ឆ្នាំ ១៩៦២ និង​ទាមទារ​ឱ្យ​កាត់​ទោស​មនុស្ស​ដែល​ជាប់​ទាក់ទិន​នឹង​អំពើ​ពុក​រលួយ។

ចាប់​តាំង​ពី​ខួប​នៃ​ចលនា​តវ៉ា​នៅ​ថ្ងៃទី ២២ ខែ កុម្ភៈ ឆ្នាំ ២០២១ មនុស្ស​រាប់​ពាន់​នាក់ បាន​បន្ត​ផ្គើន​នឹង​បម្រាម​ទៅ​លើ​ការ​ជួបជុំ ដោយសារ​ជំងឺ​រាតត្បាត​កូវីដ ១៩ និង​បាន​ចុះ​ទៅ​តាម​ដងផ្លូវ​នានា ដើម្បី​ធ្វើ​ការ​តវ៉ា​រៀងរាល់​សប្តាហ៍ ដែល​ត្រូវ​បាន​ពន្យារ​ពេល​ជិត ១ ឆ្នាំ​ពី​ព្រោះ​តែ​វិបត្តិ​សុខភាព។

អាជ្ញាធរ​និយាយ​ថា ចលនា ​Hirak កំពុង​ត្រូវ​បាន​ជ្រៀត​ចូល​ដោយ​ក្រុម​សកម្មជន​អ៊ិស្លាម​និយម ដែល​កំពុង​ទាញ​ចលនា​នេះ​ឱ្យ​ក្លាយ​ទៅ​ជា​អំពើ​ហិង្សា។

សេចក្តី​ថ្លែងការណ៍​មួយ​បាន​ឱ្យ​ដឹង​ថា កងស​ន្តិសុខ​អាល់ហ្សេរី​កាល​ពី​ថ្ងៃ​អង្គារ​បាន​តាមដាន​ទង្វើ​វិទ្ធង្សនា ​និង​ចលនា​ខុស​ច្បាប់​នានា​អាច​ឈាន​ទៅ​រក​អំពើ​ភេរវកម្ម​ដែល​ទាញ​យក​ផលប្រយោជន៍​ពី​ការ​ហែក្បួន​ប្រចាំ​សប្តាហ៍​របស់​ចលនា ​Hirak។

សេចក្តី​ថ្លែង​ការណ៍​ដដែល​បាន​លើក​ឡើង​អំពី​ការ​ហាម​ប្រាម​ចលនា ​ដើម្បី​ស្វ័យភាព​នៃ​តំបន់ Kabylie (MAK) ជា​តំបន់​ជ្រួល​ច្របល់​ជា​យូរយារ​មក​ហើយ​នៅ​ភាគ​ឦសាន ​និង​ចលនា Rachad ជំរុញ​ទឹក​ចិត្ត​អ៊ិស្លាម​អភិរក្សនិយម ជា​គណបក្ស​មួយ​ដែល​មិន​មាន​មូលដ្ឋាន​ស្រប​ច្បាប់​នៅ​ក្នុង​ប្រទេស​អាល់ហ្សេរី។

កាល​ពី​ថ្ងៃ​អង្គារ ក្រុម​អ្នក​គាំទ្រ ​Hirak បាន​ហែ​ក្បួន​នៅ​ក្នុង​រដ្ឋធានី​អាល់ហ្សេ​នៅ​ក្នុង​បាតុកម្ម​ប្រចាំ​សប្តាហ៍ ដឹកនាំ​ដោយ​និស្សិត​ដែល​បាន​ប្រព្រឹត្ត​ទៅ​ដោយ​សន្តិវិធី។

ក្រុម​អ្នក​តវ៉ា​បាន​ស្រែក​បន្ទរ​ទាមទារ​ឱ្យ​ដោះលែង​អ្នក​ដែល​ជាប់​ឃុំឃាំង និង​បាន​គ្រវី​បដា​មាន​រូបថត​អ្នក​គាំទ្រ​នៃ​ចលនា​មិន​មាន​មេ​ដឹកនាំ និង​គ្មាន​រចនា​សម្ព័ន្ធ​នយោបាយ​នោះ។

អ្នក​ដែល​ត្រូវ​ឃុំ​ខ្លួន​នៃ​ចលនា Hirak បាន​រាប់​បញ្ចូល​មនុស្ស ២៤ នាក់ ដែល​ត្រូវ​បាន​ដាក់​គុក​កាល​ពី​ថ្ងៃ​ចន្ទ ​ជុំវិញ​ការ​ចោទ​ប្រកាន់​ពី​បទ​បំផ្លាញ​សន្តិសុខ​ជាតិ ក្រោយ​ពី​ត្រូវ​បាន​ចាប់​ខ្លួន​នៅ​ក្នុង​អំឡុង​ការ​ហែក្បួន​ចលនា Hirak នៅ​ក្នុង​ទីក្រុង​អាល់ហ្សេ។ នេះ​បើ​យោង​តាម​ក្រុម​ឃ្លាំមើល​សិទ្ធិ​មនុស្ស​របស់​គណៈកម្មាធិការ​ជាតិ ដើម្បី​រំដោះ​អ្នក​ជាប់​ឃុំឃាំង (CNLD)៕

អត្ថបទគួរចាប់អារម្មណ៍