ក្រុងគីតូ៖ ប្រធានាធិបតីអេក្វាទ័រលោក លីនីន ម៉ូរីណូ កាលពីថ្ងៃសៅរ៍បានចេញបញ្ជាឲ្យដាក់ទីក្រុងគីតូ និងតំបន់ដែលនៅជុំវិញ ឲ្យស្ថិតនៅក្រោមបម្រាមគោចរ និងការគ្រប់គ្រងរបស់យោធា ខណៈការតវ៉ាបណ្តាលឲ្យមនុស្សស្លាប់ កាលពីថ្ងៃទី ១១ ប្រឆាំងវិធានការដ៏តឹងរ៉ឹងរបស់រដ្ឋាភិបាល មិនឲ្យធ្វើការប្រមូលផ្តុំនៅក្នុងទីក្រុងមួយនេះ។
លោកបានប្រកាសនៅលើគេហទំព័រធ្វីធើរថា ការចេញបញ្ជានេះ នឹង «ជួយសម្រួលឲ្យការងាររបស់កងកម្លាំងសាធារណៈប្រឆាំងការផ្ទុះហិង្សាដែលមិនអាចអត់ឱនឲ្យបានជាដាច់ខាត» ខណៈផ្សែងខ្មៅក្រាស់ឃ្មឹក បានហុយទ្រលោមនៅពាសពេញទីក្រុងមួយនេះ។
លោក ម៉ូរីណូ បានថ្លែងសុន្ទរកថា នៅក្នុងសន្និសីទសារព័ត៌មានជាតិមួយ អមដោយអនុប្រធានាធិបតីលោក Otto Sonnenholzner និងរដ្ឋមន្ត្រីការពារជាតិលោក Oswaldo Jarrin ថា៖ «ខ្ញុំបានរៀបចំឲ្យទីបញ្ជាការរួមនៃកងកម្លាំងប្រដាប់អាវុធ ចាត់វិធានការធ្វើប្រតិបត្តិការចាំបាច់ និងជាបន្ទាន់មួយ»។
ការរឹតត្បិតនៅក្នុងទីក្រុងគីតូ ជាទីក្រុងមួយដែលមានប្រជាជនចំនួន ២,៧ លាននាក់ បានដាក់ប្រទេសមួយនេះ ឲ្យស្ថិតនៅក្នុងគ្រាអាសន្នកម្រិតខ្ពស់ ដែលលោក ម៉ូរីណូ បានប្រកាសកាលពីថ្ងៃទី ៣ ខែ តុលា ដោយបានដាក់ពង្រាយយោធា និងប៉ូលិសប្រហែល ៧៥ ០០០ នាក់ ហើយបានដាក់បម្រាមគោចរ នៅពេលយប់ នៅក្នុងសង្កាត់ដែលនៅក្បែរអគាររដ្ឋាភិបាលមួយចំនួន។
អំពើហិង្សាបានបន្តនៅក្នុងក្រុងគីតូកាលពីថ្ងៃសៅរ៍ ទោះបីជាក្រុមចលនាជនជាតិដើម ដែលបានដឹកនាំតវ៉ាជុំវិញការដំឡើងថ្លៃប្រេងខ្ពស់នោះបានឈប់ទៅវិញ ហើយបានថ្លែងថា ខ្លួនទទួលយកសំណើ ដើម្បីពិភាក្សាផ្ទាល់ជាមួយលោក ម៉ូរីណូ៕ AFP/SK