ក្រុងហ្ស៊ឺណែវ៖ ប្រធានអង្គការសុខភាពពិភពលោក បានថ្លែងកាលពីល្ងាចថ្ងៃអាទិត្យថា លោកបានកំពុងដាក់ខ្លួនឯងឱ្យនៅដាច់ដោយឡែកពីគេ ក្រោយពីមានមនុស្សម្នាក់ ដែលលោកបានទំនាក់ទំនងជាមួយ បានធ្វើតេស្តរកឃើញមានផ្ទុកជំងឺកូវីដ ១៩ ប៉ុន្តែបានបញ្ជាក់ថា លោកមិនមានរោគសញ្ញាជំងឺកូវីដ ១៩ ទេ។
លោក តេ្រដូស អេដហាណូម ហ្គឺប្រ៊ីយេស៊ូស បានថ្លែងនៅក្នុងគេហទំព័រធ្វីធើរថា៖ «ខ្ញុំបានស្គាល់ ខណៈខ្ញុំបានទំនាក់ទំនងជាមួយមនុស្សម្នាក់ ដែលបានធ្វើតេស្តរកឃើញមានផ្ទុកជំងឺកូវីដ ១៩»។
លោកបានបន្ថែមថា៖ «ខ្ញុំមានសុខភាពល្អទេ ហើយខ្ញុំមិនមានរោគសញ្ញាជំងឺកូវីដ ១៩ នោះទេ ប៉ុន្តែខ្ញុំនឹងដាក់ខ្លួនឯងឱ្យនៅដាច់ដោយឡែកពីគេ នៅអំឡុងពេលប៉ុន្មានថ្ងៃខាងមុខទៀត អនុលោមទៅតាមនីតិវិធីរបស់អង្គការសុខភាពពិភពលោក ហើយធ្វើការចេញពីផ្ទះវិញ»។
លោក តេដ្រូស បានស្ថិតនៅកន្លែងជួរមុខនៃកិច្ចខិតខំប្រឹងប្រែងរបស់ទីភ្នាក់ងារសុខភាពអង្គការសហប្រជាជាតិ ដើម្បីប្រយុទ្ធប្រឆាំងការឆ្លងរាលដាល វីរុសផ្លូវដង្ហើមកូរ៉ូណាប្រភេទថ្មីដ៏ចម្លែកមួយនេះ។
ជំងឺកូវីដ ១៩ ត្រូវបានគេអះអាងថា បានផ្តាច់ជីវិតមនុស្សជិត ១,២ លាននាក់ ហើយបានឆ្លងទៅមនុស្សផ្សេងទៀត នៅលើពិភពលោកជាង ៤៦ លាននាក់ ចាប់តាំងពីមេរោគផ្លូវដង្ហើមនេះបានផ្ទុះឡើងនៅក្នុងប្រទេសចិន កាលពីចុងឆ្នាំ ២០១៩។
លោក តេដ្រូស បានបញ្ជាក់នៅលើគេហទំព័រធ្វីធើរថា៖ «វាគឺមានសារៈសំខាន់យ៉ាងខ្លាំង ដែលយើងទាំងអស់គ្នាបានអនុវត្តទៅតាមការណែនាំរបស់អង្គការសុខភាពពិភពលោក»។
«បញ្ហានេះ ថាតើយើងនឹងកាត់ផ្តាច់ការឆ្លងរាលដាលជំងឺកូវីដ ១៩ ការទប់ស្កាត់វីរុសផ្លូវដង្ហើម និងការការពារប្រព័ន្ធសុខភាពដោយរបៀបណា?»។
អតីតរដ្ឋមន្ត្រីសុខាភិបាល និងការបរទេសអេត្យូពី មានវ័យ ៥៥ ឆ្នាំ អស់រយៈពេលប៉ុន្មានខែមកនេះ បានបញ្ជាក់អះអាងម្តងហើយម្តងទៀតថា មនុស្សម្នាក់ៗបានដើរតួយ៉ាងសំខាន់ នៅក្នុងការបញ្ឈប់ការឆ្លងរាលដាលវីរុសផ្លូវដង្ហើមកូរ៉ូណាប្រភេទថ្មីមួយនេះ។
អង្គការសុខភាពពិភពលោកបានស្នើឱ្យមនុស្សទាំងអស់ ត្រូវលាងដៃដោយប្រុងប្រយ័ត្ន ដោយនាំគ្នាពាក់ម៉ាស់ និងរក្សាគម្លាតនៅឆ្ងាយពីគ្នា ខណៈអង្គការសុខភាពពិភពលោកបានអំពាវនាវឱ្យអាជ្ញាធរគ្រប់កម្រិតទាំងអស់ត្រូវធ្វើការស្វែងរកអ្នកផ្ទុកមេរោគ ដាក់ឱ្យនៅដាច់ដោយឡែកពីគ្នា ការធ្វើតេស្ត និងយកចិត្តទុកដាក់សម្រាប់ករណីឆ្លងជាច្រើន បន្ទាប់មកតាមដាន និងដាក់ទំនាក់ទំនងរបស់ពួកគេឱ្យនៅដាច់ដោយឡែកពីគ្នា។
ការអត្ថាធិប្បាយរបស់លោក តេដ្រូស បានធ្វើឡើង ខណៈមានការខឹងសម្បា និងក្រេវក្រោធកាន់តែខ្លាំងឡើង ជុំវិញការទប់ស្កាត់ការឆ្លងរាលដាលវីរុសផ្លូវដង្ហើមកូរ៉ូណាថ្មី ខណៈប្រទេសអឺរ៉ុបមួយចំនួនបានប៉ះពាល់ម្តងទៀតនៅរដូវរងា ជាមួយការបិទប្រទេស និងការរឹតត្បិតជាថ្មីម្តងទៀត ដោយមានគោលបំណងចង់បញ្ឈប់ការឆ្លង និងស្លាប់យ៉ាងឆាប់រហ័ស ដោយសារជំងឺកូវីដ ១៩។
រដ្ឋាភិបាលអឺរ៉ុបមួយចំនួនបានខំប្រឹងយ៉ាងខ្លាំង ដើម្បីទប់ស្កាត់អំពីការព្រួយបារម្ភ នៃការឆ្លងរាលដាលកាន់តែខ្លាំងឡើងនៅលើពិភពលោក។
ពិភពលោកបានកត់ត្រា អំពីការស្លាប់ជាង ២៧៩ ០០០ នាក់ ចាប់តាំងពីវីរុសនេះបានចាប់ផ្តើមឆ្លងរាលដាលនៅលើពិភពលោក។
ក្រុងហ្ស៊ឺណែវ ជាទីដែលអង្គការសុខភាពពិភពលោក បានដាក់ទីស្នាក់ការបានប្រកាសថា ការដាក់ប្រទេសក្នុងគ្រាអាសន្នជាថ្មីមួយកាលពីថ្ងៃអាទិត្យ ហើយបាននិយាយថា ប្រទេសរបស់ខ្លួននឹងចាត់វិធានការដាក់ប្រទេសស្វ៊ីស ឱ្យរួចផុតពីការឆ្លងជំងឺកូវីដ ១៩ និងបិទបារ៍ទាំងអស់ ភោជនីយដ្ឋាន និងហាងមិនសំខាន់មួយចំនួនផងដែរ៕ AFP/SK