.jpg)
(ពីឆ្វេង) ស្ត្រីទី ១ លោកស្រី Melania Trump លោកត្រាំ លោកស្រី មឺរកែល លោកម៉ាក្រុង និងប្រពន្ធលោកស្រី Brigitte Macron និងពូទីន (មុខកណ្តាល)។ AFP
ក្រុងម៉ូស្គូៈ ប្រព័ន្ធផ្សព្វផ្សាយរុស្ស៊ី បានឲ្យដឹងថា លោកប្រធានាធិបតីរុស្ស៊ី វ្ល៉ាឌីមៀរ ពូទីន បានថ្លែងថា លោកបាន ថ្លែងយ៉ាងខ្លីថា លោកមានទំនាក់ទំនងល្អជាមួយមេដឹកនាំអាមេរិកលោក ដូណាល់ត្រាំនៅឯព្រឹត្តិការណ៍ប្រារព្ធខួប ១០០ ឆ្នាំនៃការបញ្ចប់សង្គ្រាមលោកលើកទី ១ នៅក្រុងប៉ារីស។
ទីភ្នាក់ងារសារព័ត៌មានរដ្ឋរុស្ស៊ី RIA Novosti បានរាយការណ៍ថា នៅពេលក្រុមអ្នកកាសែត សួរលោកពូទីនថា តើលោក ព្យាយាមនិយាយទៅកាន់លោកត្រាំមែនឬ? លោកក៏បានឆ្លើយថា «Yes»។ លោក មិនបានផ្តល់ព័ត៌មានលម្អិតបន្ថែមទេ ប៉ុន្តែការិយាល័យប្រធានាធិបតីបារាំងបានឲ្យដឹងថា លោកទាំង ២ បានធ្វើការពិភាក្សាយ៉ាងយូរនៅក្នុងអំឡុងពិធីពិសាអាហារថ្ងៃត្រង់ ក្រោយពីប្រារព្ធពិធីរួច។
ម្ចាស់ផ្ទះប្រធានាធិបតីបារាំងលោក អេម៉ានុយ អែលម៉ាក្រុង នៅទីនោះ និងអធិការបតីអាល្លឺម៉ង់លោកស្រី អេនជេឡាមឺរកែល បានចូលរួមក្នុងការពិភាក្សាដោះដូរយោបល់គ្នានោះដែរ។
ប្រធានបទជាច្រើន ដែលត្រូវបានពិភាក្សានោះ មានស្ថានការណ៍នៅតំបន់មជ្ឈិមបូព៌ាជាពិសេសនៅស៊ីរី អ៊ីរ៉ង់ អារ៉ាប៊ីសាអ៊ូឌីត និងកូរ៉េខាងជើង។
អ្នកនាំពាក្យសេតវិមានលោកស្រី Sarah Sanders បានថ្លែងថា លោក ដូណាល់ ត្រាំ បានអង្គុយជាមួយក្រុមមេដឹកនាំពិភពលោកក្នុងនោះមានលោកវ្ល៉ាំឌីមៀរ ពូទីន លោក ម៉ាក្រុង និងលោកស្រី មឺរកែល ហើយក្រុមមេដឹកនាំទាំងនោះបានធ្វើការពិភាក្សាជាមួយគ្នាបានល្អ និងទទួលបានលទ្ធផលផ្លែផ្កា។
លោកស្រី បានថ្លែងទៀតថា៖ «មេដឹកនាំពិភពលោក បានពិភាក្សាអំពីបញ្ហាជាច្រើននៅក្នុងនោះមានកិច្ចព្រមព្រៀងនុយក្លេអ៊ែរចម្ងាយមធ្យម (INF) បញ្ហាស៊ីរី ពាណិជ្ជកម្មស្ថានការណ៍នៅក្នុងប្រទេសអារ៉ាប៊ីសាអ៊ូឌីត ទណ្ឌកម្ម អាហ្វហ្គានីស្ថាន ចិន និងកូរ៉េខាងជើង៕
