.jpg)
លោកឧត្តមសេនីយ៍ Apirat ព្រមានក្រុមសកម្មជនប្រឆាំងរដ្ឋាភិបាល។ BKP
ក្រុងបាងកកៈ ប្រមុខកងទ័ពថៃលោក ឧត្តមសេនីយ៍ Apirat Kongsompong បានព្រមានក្រុមសកម្មជនប្រឆាំងរដ្ឋាភិបាលមិនឲ្យធ្វើអ្វីមួយជ្រុលពេក ឬមិនអាចទទួលយកបាន ខណៈពួកគេគ្រោងធ្វើការរៀបចំជួបជុំគ្នាដើម្បីទាមទារឲ្យមានការបោះឆ្នោតទូទៅមួយនោះ។
ក្រុមមួយដែលហៅខ្លួនឯងថា «ប្រជាជនដែលត្រូវការការបោះឆ្នោត» កំពុងទាមទារថា ការបោះឆ្នោតទូទៅមួយគួរកើតឡើងនៅត្រឹមថ្ងៃទី ១០ ខែមីនា ដោយមាននិយាយ យោងដល់តម្រូវការតាមរដ្ឋធម្មនុញ្ញ ដែលចែងថា ការបោះឆ្នោតត្រូវតែត្រូវបានធ្វើឡើងរយៈពេល ១៥០ ថ្ងៃនៃការអនុវត្តច្បាប់ស្តីពីការបោះឆ្នោតជ្រើសរើសតំណាងរាស្រ្តដែលបាន ចូលជាធរមានហើយនោះ។
ពួកគេកំពុងគំរាមបង្កើន សម្ពាធដោយធ្វើការតវ៉ានៅវិមានលទ្ធិប្រជាធិបតេយ្យ ប្រសិនបើរាជក្រឹត្យមួយ ដែលប្រកាសការបោះឆ្នោតនោះ មិនត្រូវបានបោះពុម្ពផ្សាយនៅថ្ងៃសុក្រទេនោះ។
លោកឧត្តមសេនីយ៍ Apirat ជាអគ្គលេខាធិការនៃក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ (NCPO) បានថ្លែងថា៖ «អ្នកបានដាក់ឱសានវាទឲ្យអ្នកដទៃទៀតធ្វើតាមតម្រូវការរបស់អ្នក ដូច្នេះអ្នកក៏គួរតែគូសបន្ទាត់កំណត់សកម្មភាពរបស់អ្នក ហើយកុំដើររំលងខ្សែបន្ទាត់នោះ»។
លោកឧត្តមសេនីយ៍ Apirat ដែលដឹកនាំកងកម្លាំងរក្សាសន្តិភាពរបស់ NCPO បានថ្លែងថា ខណៈក្រុមសកម្មជនគាំទ្រការបោះឆ្នោតមានសិទ្ធិជួបជុំជាសាធារណៈពួកគេគួរតែធ្វើឲ្យស្របទៅតាមច្បាប់។
ប្រមុខកងទ័ពនោះបានថ្លែងថា លោកបានសម្តែងការព្រួយបារម្ភថាការជួបជុំដែលត្រូវបានគ្រោងធ្វើនោះនឹងធ្វើឲ្យប៉ះពាល់ដល់ក្រុមអ្នករកស៊ីនៅជុំវិញទីតាំងជួបជុំនោះ និងប៉ះពាល់ដល់ទេសចរណ៍។ យើងចាំបាច់ត្រូវដាក់ពង្រាយកម្លាំងសន្តិសុខ ដើម្បីរក្សាសណ្តាប់ធ្នាប់ និងសន្តិភាព នៅក្នុងអំឡុងពេលជួបជុំនោះ៕ BKP/PSA
