.jpg)
លោក Patrick Shanahan (ឆ្វេង) និងលោក Jens Stoltenberg។ AFP
ក្រុងប្រ៊ុចសែលៈ ប្រមុខការពារជាតិស្តីទីថ្មីរបស់ក្រុងវ៉ាស៊ីនតោន បានចូលរួមជំនួបអង្គការ ណាតូជាលើកដំបូងកាលពីថ្ងៃពុធ ជាជំនួបមួយដែលក្រុមសម្ព័ន្ធមិត្តមិនប្រាកដអំពីឋានៈបណ្តោះអាសន្នរបស់លោក និងក្តីមន្ទិលសង្ស័យ ក្រោយពីមានការប៉ះទង្គិចជាមួយចៅហ្វាយរបស់លោក គឺលោក ដូណាល់ ត្រាំ។
អតីតអ្នកប្រតិបត្តិក្រុមហ៊ុន Boeing លោក Patrick Shanahan បានចូលមកជំនួសតំណែងមន្ទីរបញ្ចកោណក្រោយពីបម្រើការជាអនុហើយ ក៏ហក់ចូលកាន់តំណែងកំពូលនេះ នៅពេលអ្នកមុនរបស់លោក គឺលោក ជីម ម៉ាធីស បានលាលែងពីតំណែងក្រោយពីមានការខ្វែងគំនិតជាមួយលោក ត្រាំ ជាយូរណាស់មកហើយនោះ។
ការបង្ហាញខ្លួននៅមុខកាមេរ៉ាជាលើកដំបូងរបស់លោកនៅស្នាក់ការណាតូនៅក្នុងក្រុងប្រ៊ុចសែល និងការចាប់ដៃជាមួយអគ្គលេខាសម្ព័ន្ធមិត្តលោក Jens Stoltenberg បានទាក់ចំណាប់អារម្មណ៍យ៉ាងខ្លាំង ដោយពាក្យសម្តីគ្រប់ម៉ាត់ និងកាយវិការរបស់លោកត្រូវបានគេតាមដាន និងស្តាប់យ៉ាងយកចិត្តទុកដាក់។
លោក Shanahan បានថ្លែងនៅក្រោយដំណើរទស្សនកិច្ចនៅក្រុងកាប៊ុល និងក្រុងបាកដាដ រួមទាំងក្រុងប្រ៊ុចសែល ២-៣ ថ្ងៃកន្លងទៅនេះថា៖ «ខ្ញុំមានសេចក្តីសោមនស្សរីករាយណាស់ ដោយចំណាយពេលជាមួយអ្នកទាំងអស់គ្នានិងជាពិសេសការងារបានប្រព្រឹត្តិទៅយ៉ាងរលូន»។
«រឿងក្នុងចំណោមរឿងរ៉ាវជាច្រើនទៀតនោះ គឺយើងបានជួបប្រជុំគ្នាអំពីអនាគតរបស់អង្គការណាតូ»៕ AFP/PSA
