ក្រុងវ៉ាស៊ីនតោនៈ ប្រមុខ FBI លោក Christopher Wray បានថ្លែងកាលពីថ្ងៃពុធថា សហគមន៍ស៊ើបអង្កេត របស់អាមេរិកផ្អែកលើការអង្កេតរបស់ខ្លួនថា ប្រទេសរុស្ស៊ី បានជ្រៀតជ្រែកនៅក្នុងការបោះឆ្នោតអាមេរិកនៅក្នុងឆ្នាំ ២០១៦ ថ្វីបើនៅសប្តាហ៍នេះ លោកវ្ល៉ាឌីមៀរ ពូទីន បានបដិសេធនៅចំពោះមុខត្រាំ ក្តី។
លោក Wray បានថ្លែងនៅពេលគេសួរអំពីការបដិសេធរបស់លោកពូទីន ចំពោះត្រាំនៅឯជំនួបកំពូលរបស់ពួកគេនៅក្នុងក្រុងហែលស៊ីនគី កាលពីថ្ងៃចន្ទ។ «ការវាយតម្លៃរបស់សហគមន៍ស៊ើបអង្កេត មិនបានផ្លាស់ប្តូរទេ។ ការយល់ឃើញរបស់ខ្ញុំ មិនបានប្រែប្រួលទេដែលថា រុស្ស៊ីបានប្រឹងប្រែងជ្រៀតជ្រែកការបោះឆ្នោតចុងក្រោយ និងថា ខ្លួនបន្តចូលរួមនៅកិច្ចប្រតិបត្តិការប្រកបដោយគ្រោះថ្នាក់នេះ រហូតមកទល់ថ្ងៃនេះ។
លោក បានបន្ថែមថា ទង្វើទាំងនោះបានមានបំណងបង្កឲ្យមានជម្លោះ និងភាពមិនចុះសម្រុងគ្នានៅក្នុងប្រទេសនេះ។
កាលពីថ្ងៃចន្ទ លោកត្រាំទំនងជាបានទទួលយកការបដិសេធរបស់លោកពូទីន នៅក្នុងសន្និសីទកាសែតមួយក្រោយពីជំនួបរបស់ពួកគេនៅក្នុងក្រុងហែលស៊ីនគី ដោយបានបង្កឲ្យមានកំហឹងនៅក្នុងក្រុងវ៉ាស៊ីនតោន និងសេចក្តីថ្លែងការណ៍ជំទាស់ដ៏កម្ររបស់ប្រមុខសហគមន៍ស៊ើបអង្កេតអាមេរិក។
កាលពីថ្ងៃអង្គារ លោកត្រាំបាននិយាយថា លោកទទួលយកទស្សនៈរបស់ក្រុមចារបុរសអាមេរិកថា ក្រុងម៉ូស្គូពិតបានជ្រៀតជ្រែកការបោះឆ្នោតនោះមែន៕