បុរីញូវយ៉ក៖ អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស បានស្នើឲ្យក្រុមប្រឹក្សាសន្តិសុខបង្កើតច្រកដឹកជញ្ជូនថ្មីមួយនៅតាមព្រំដែនប្រទេស តួកគី ដើម្បីអនុញ្ញាតឲ្យជំនួយមនុស្សធម៌ទៅដល់មនុស្សដែលរង់ចាំជំនួយនៅស៊ីរីភាគឦសាន ជាទីដែលការផ្គត់ផ្គង់ថ្នាំពេទ្យ កំពុងខ្វះខាតយ៉ាងខ្លាំងនៅទីនោះ។
អនុសាសន៍នេះ បានធ្វើឡើងនៅក្នុងរបាយការណ៍មួយ ដែលបានចេញផ្សាយកាលពីថ្ងៃសុក្រទៅកាន់ក្រុមសមាជិកក្រុមប្រឹក្សា ហើយត្រូវបានគេមើលឃើញកាលពីថ្ងៃសៅរ៍ដោយសារព័ត៌មាន AFP។
សមាជិករបស់ក្រុមប្រឹក្សាសន្តិសុខលោកខាងលិច បានស្នើសុំទៅលោក អង់តូនីញ៉ូ ហ្គុយតឺរេស កាលពីដើមខែមករា ដើម្បីផ្តល់ជូនជម្រើសថ្មីក្រោយពីក្រុមប្រឹក្សានោះ បានស្ថិតនៅក្រោមសម្ពាធពីរុស្ស៊ី ដោយបានកាត់បន្ថយយ៉ាងច្រើនអំពីចំនួននៃការឆ្លងកាត់ព្រំដែន បានអនុញ្ញាតឲ្យដឹកជញ្ជូនជំនួយមនុស្សធម៌ ទៅកាន់ប្រជាជនស៊ីរីភាគឦសានដែលត្រូវការជំនួយយ៉ាងខ្លាំងនៅទីនោះ។
ក្រុមប្រទេសលោកខាងលិចបានស្នើសុំជាពិសេសជុំវិញលទ្ធភាព ដើម្បីប៉ះប៉ូវសម្រាប់ការបិទចំណុចឆ្លងកាត់ទីក្រុង អាល់ យ៉ារុប៊ីយ៉ាហ៍ នៅតាមព្រំដែនស៊ីរីជាមួយអ៊ីរ៉ាក់។
លោក ហ្គុយតឺរេស បានថ្លែងនៅក្នុងរបាយការណ៍របស់លោកថា៖ «ជម្រើសខ្លះអាចត្រូវបានគេធ្វើឡើងទៅតាមលទ្ធភាព» «ប៉ុន្តែចាប់ពីសន្តិសុខ និងផែនការដ៏សមហេតុផលមួយនៅក្នុងបរិបទបច្ចុប្បន្ននេះ ហើយច្រកឆ្លងកាត់ព្រំដែនក្រុងតាល់ប៊ីយ៉ាដ នឹងក្លាយជាជម្រើសទៅតាមលទ្ធភាពល្អបំផុតទៅកាន់ច្រកឆ្លងកាត់ព្រំដែនទីក្រុងអាល់-យ៉ារុប៊ីយាហ៍»។
ទីក្រុងតាល់ប៊ីយ៉ាដ ដែលអាចដោះស្រាយប្រតិបត្តិការជំនួយយ៉ាងសំខាន់មួយ ត្រូវបានគ្រប់គ្រងដោយក្រុមកងកម្លាំងប្រដាប់អាវុធក្រៅរដ្ឋាភិបាលស៊ីរី៕ AFP/SK