ក្រុងសាណាៈ ប្រេសិតពិសេសរបស់អង្គការសហប្រជាជាតិប្រចាំយេម៉ែន កាលពីថ្ងៃចន្ទ បានចុះយន្តហោះនៅក្នុងក្រុងសាណាដែលជា ក្រុងគ្រប់គ្រងដោយក្រុមឧទ្ទាមដើម្បីចរចា ដែលមានគោលបំណងគាំទ្រឲ្យមានបទឈប់បាញ់មួយរវាងក្រុមឧទ្ទាម និងរដ្ឋាភិបាលចម្រុះនៅកំពង់ផែក្រុងហូដេដា។
មន្ត្រីម្នាក់នៅព្រលានយន្តហោះក្រុងសាណា បានថ្លែងប្រាប់ AFP ក្នុងលក្ខខណ្ឌអនាមិកថា អ្នកការទូត លោក Martin Griffiths បានចុះចតនៅរដ្ឋធានីយេម៉ែននៅម៉ោង ១០ និង ៣០ នាទីព្រឹកថ្ងៃចន្ទ។
ប្រភពមួយចេញពីអង្គការ សហប្រជាជាតិបានអះអាងតាមសារព័ត៌មាន នេះដោយនិយាយថា លោក Griffiths នៅក្នុងប្រទេស យេម៉ែន ដើម្បី «ការអនុវត្តនៃកិច្ចព្រមព្រៀងក្រុងហូដេដាឲ្យបានឆាប់រហ័ស»។
លោក Griffiths បានធ្វើជាម្ចាស់ផ្ទះកិច្ចចរចាសន្តិភាពដែលទទួលបានដោយលំបាក រវាងរដ្ឋាភិបាលយេម៉ែនដែលមានសម្ព័ន្ធមិត្តជាមួយយោធាក្នុងតំបន់ដឹកនាំដោយអារ៉ាប៊ីសាអ៊ូឌីត និងក្រុមឧទ្ទាមហ៊ូធីគាំទ្រដោយអ៊ីរ៉ង់៕ AFP/SK