ក្រុងអ៊ីស្លាម៉ាបាដ៖ ក្រសួងការបរទេសប៉ាគីស្ថានបានថ្លែងថា តំណាងប្រេសិតពិសេសអាមេរិកទទួលបន្ទុកផ្សះផ្សានៅអាហ្វហ្គានីស្ថាន គឺលោក ហ្សាល់មែល ហ្គាលីលហ្សាដ បានរៀបចំកិច្ចពិភាក្សាជាមួយរដ្ឋមន្ត្រីការបរទេសប៉ាគីស្ថាន គឺលោក ស្សាហ៍ ម៉ាហ៍មូដ ហ្គូរីស្ស៊ី កាលពីថ្ងៃពុធ ស្តីពីដំណើរការសន្តិភាពនៅក្នុងប្រទេសអាហ្វហ្គានីស្ថាន។
នៅក្នុងសេចក្តីថ្លែងការណ៍មួយ ក្រសួងការបរទេសបានថ្លែងថា ទស្សនកិច្ចរបស់លោក ហ្គាលីលហ្សាដ ទៅប្រទេសប៉ាគីស្ថាន ជាដំណើរទស្សនកិច្ចលើកទី២ នៅក្នុងរយៈពេល ១ ខែ គឺជាផ្នែកនៃការទំនាក់ទំនងជាប្រចាំរបស់លោក ដើម្បីធ្វើការពិភាក្សា និងការផ្លាស់ប្តូរទស្សនៈគ្នាទៅវិញទៅមក ស្តីពីដំណើរការផ្សះផ្សា និងសន្តិភាពនៅអាហ្វហ្គានីស្ថាន។
យោងតាមសេចក្តីថ្លែងការណ៍នោះ បានឲ្យដឹងថា លោក ហ្គូរីស្ស៊ី បានស្វាគមន៍ចំពោះការវិវឌ្ឍចុងក្រោយបំផុតនៅក្នុងនោះរួមមានសេចក្តីប្រកាស ស្តីពីការបង្កើតក្រុមចរចា និងការបង្កើតក្រុមប្រឹក្សាជាន់ខ្ពស់ ដើម្បីការផ្សះផ្សាជាតិរបស់រដ្ឋាភិបាលអាហ្វហ្គានីស្ថាន ដើម្បីចរចាជាមួយក្រុមតាលីបង់។
សេចក្តីថ្លែងការណ៍នោះបានឲ្យដឹងថា៖ លោក (ហ្គូរីស្ស៊ី) បានលើកឡើងថា រាល់ភាគីទាំងអស់ គួរតែបង្កើតឲ្យមានកិច្ចខិតខំប្រឹងប្រែងពិតប្រាកដ ដើម្បីកាត់បន្ថយអំពើហិង្សានៅអាហ្វហ្គានីស្ថាន។ លោក ហ្គូរីស្ស៊ី ក៏បានសង្កត់ធ្ងន់ថា វាមានសារៈសំខាន់មិនមែនធ្វើឲ្យខូចបរិយាកាស ឬរំខានដល់ដំណើរការការចរចាអន្តរអាហ្វហ្គានីស្ថាននោះទេ៕ Xinhua/SK