ក្រុងហ្គាហ្សាៈ ក្រសួងសុខាភិបាលនៅតំបន់ហ្គាហ្សា បាន និយាយថា ពលរដ្ឋប៉ាឡេស្ទីនយ៉ាងតិច ៩៥ នាក់ បាន រងរបួសកាលពីល្ងាចថ្ងៃចន្ទនៅក្នុងការប៉ះទង្គិចរបស់ពួកគេជាមួយទាហានអ៊ីស្រាអែលនៅព្រំដែនរវាងតំបន់ហ្គាហ្សា ខាងជើង និងអ៊ីស្រាអែល។
អ្នកនាំពាក្យក្រសួងសុខាភិបាលលោក Ashraf al-Qedra បានថ្លែងប្រាប់ក្រុមអ្នកកាសែតថា នៅក្នុងចំណោមអ្នករងរបួសទាំង ៩៥ នាក់មាន ២៦ នាក់រងរបួសដោយគ្រាប់កាំភ្លើង ខណៈអ្នកដទៃទៀតដកដង្ហើមមិនចេញ ក្រោយពីត្រូវឧស្ម័នបង្ហូរទឹកភ្នែក។
ការតវ៉ាជាច្រើននៅតំបន់ហ្គាហ្សាភាគខាងជើង ត្រូវបានរៀបចំដោយគណៈកម្មាធិការជាន់ខ្ពស់នៃការហែក្បួនវិលត្រឡប់ទៅវិញមានមូលដ្ឋាននៅតំបន់ហ្គាហ្សា ដើម្បីប្រឆាំងនឹងការរាំងខ្ទប់របស់អ៊ីស្រាអែលនៅតំបន់ឆ្នេរសមុទ្រប៉ាឡេស្ទីន។
ក្រុមអ្នកតវ៉ា បានគប់ដុំថ្ម និងដុតកង់ឡាននៅក្បែររបង ព្រំដែន ខណៈទាហានអ៊ីស្រាអែលប្រើឧស្ម័នបង្ហូរទឹកភ្នែក និងបាញ់គ្រាប់ពិត។
យោងតាមក្រសួងសុខាភិបាលនៅតំបន់ហ្គាហ្សា បានឲ្យដឹងថា កងកម្លាំងអ៊ីស្រាអែល បានសម្លាប់ពលរដ្ឋប៉ាឡេស្ទីនយ៉ាងតិច ១៧៧ នាក់ និង ១៩០០០ នាក់ផ្សេងទៀតរងរបួស ចាប់តាំងពីខែមីនា ឆ្នាំ ២០១៨ ជាថ្ងៃទី ១ នៃការជួបជុំហែក្បួនវិលត្រឡប់មកវិញប្រឆាំងនឹងការហាមឃាត់ ១២ ឆ្នាំរបស់ប្រទេសអ៊ីស្រាអែល៕