ក្រុងប៊ុយការ៉េសៈ ពលរដ្ឋរូម៉ានីរាប់ពាន់នាក់បានឡើងទៅតាមដងផ្លូវនានាកាលពីថ្ងៃពុធ ដើម្បីធ្វើការតវ៉ាប្រឆាំងនឹងការបន្ធូរបន្ថយច្បាប់ប្រឆាំងអំពើឧក្រិដ្ឋកម្ម ដែលពួកគេជឿថានឹងរារាំងដល់ការប្រយុទ្ធប្រឆាំងអំពើពុករលួយនោះ។
ក្រុមអ្នកតវ៉ានៅក្នុងរដ្ឋធានីប៊ុយការ៉េស ជាទីដែលអ្នកតវ៉ាប្រហែល ៥ ពាន់នាក់បានជួបជុំគ្នា បានស្រែកបន្ទរថា៖ «យើងនឹងមិនចុះចាញ់ទេ និងយើងមិនមែនជាចោរទេ»។
ស្របពេលដែលមានវត្តមានសន្តិសុខដ៏ច្រើនសន្ធឹកសន្ធាប់នោះ ការប្រតាយប្រតប់គ្នាបានកើតឡើងជាមួយប៉ូលិសជាច្រើនដងនៅក្នុងអំឡុងការជួបជុំតវ៉ានោះ។ ក្រុមមន្ត្រីបាននិយាយថា មនុស្ស ៨ នាក់ត្រូវបានចាប់ខ្លួន។
ការតវ៉ានោះបានកើតឡើងខណៈសភាដែលគ្របដណ្តប់ដោយក្រុមឆ្វេងនិយមរបស់ ប្រទេសនេះ កាលពីថ្ងៃចន្ទ បានអនុម័តវិសោធនកម្មក្រមនីតិវិធីព្រហ្មទណ្ឌ ដែលក្រុមបក្សប្រឆាំងនិយាយថានឹងការពារក្រុមអ្នកប្រព្រឹត្តល្មើសច្បាប់។
ការវិសោធនកម្មទាំងនោះកាត់បន្ថយចំនួនបទល្មើស សម្រាប់មនុស្សម្នាក់អាចត្រូវជាប់គុក និងរយៈពេលនៃការស៊ើបអង្កេត។
យោងតាមប្រធានាធិបតីស្តាំនិយមលោក Klaus Iohannis ដែលជារឿយៗមានការប៉ះទង្គិចជាមួយរដ្ឋាភិបាលឆ្វេងនិយមនោះ ចំណុចខ្លះដែលត្រូវបានធ្វើវិសោធនកម្មនោះបានគាំទ្រលោក Liviu Dragnea ជាប្រធានបក្សប្រជាធិបតេយ្យសង្គមនិយម (PSD)។
លោក Dragnea អាចស្នើឲ្យពិចារណាលើការព្យួរទោស ២ ឆ្នាំចំពោះការលួចបន្លំសន្លឹកឆ្នោតក្នុងឆ្នាំ ២០១៦៕