.jpg)
លោកប្រធានាធិបតីរុស្ស៊ី វ៉្លាឌីមៀរ ពូទីន (កណ្តាល) និងលោករដ្ឋមន្ត្រី Mikhail Mishustin មកដល់ដើម្បីជួបជាមួយសមាជិកនៃរដ្ឋាភិបាលថ្មី។ AFP
ក្រុងម៉ូស្គូ៖ ការជំរុញរបស់លោកប្រធានាធិបតី វ្លាឌីមៀរ ពូទីន ឲ្យប្រញាប់ប្រញាល់ធ្វើការកែទម្រង់ប្រព័ន្ធនយោបាយរបស់ប្រទេស រុស្ស៊ី នោះ បានធ្វើឲ្យបក្សប្រឆាំងមានភាពជ្រួលច្របល់ ដោយក្រុមអ្នករិះគន់មានការស្មុគស្មាញមិនដឹងថា ត្រូវឆ្លើយតបតាមរបៀបណា?
ក្រោយពីឈប់សម្រាកចូលឆ្នាំថ្មីយ៉ាងយូរមក លោកប្រធានាធិបតី ពូទីន បានបង្ហាញពីបញ្ហានយោបាយមួយកាលពីសប្តាហ៍មុន ដោយបានស្នើឲ្យមានការកែប្រែរដ្ឋធម្មនុញ្ញរុស្ស៊ី ដែលបានធ្វើឲ្យលោកនាយករដ្ឋមន្ត្រី មីទ្រី មេដវេដេវ និងរដ្ឋាភិបាលរបស់លោកលាលែងពីតំណែង។
រយៈពេល ៥ ថ្ងៃ ក្រោយពីជំរុញឲ្យមានការកែប្រែរដ្ឋធម្មនុញនោះ លោក វ្ល៉ាឌីមៀរ ពូទីន បានដាក់សំណើសុំធ្វើវិសោធនកម្មទៅសភារួចហើយ។
ក្រុមអ្នករិះគន់វិមានក្រឹមឡាំង បានឯកភាពជាឯកច្ឆន្ទធ្វើការប្រឆាំងចំពោះកំណែទម្រង់នោះ ដោយមេដឹកនាំប្រឆាំង អាឡិចហ្សេ ណាវ៉ាល់នី ដែលនិយាយថា លោក ពូទីន ចង់ធ្វើខ្លួនលោកក្លាយជាមេដឹកនាំមួយជីវិត ប៉ុន្តែក្រុមអ្នករិះគន់កំពុងតស៊ូស្វែងរកមធ្យោបាយវាយបកវិញ។
អ្នកវិភាគនយោបាយ និងជាអតីតវេជ្ជបណ្ឌិតនៃវិមានក្រឹមឡាំងលោក Gleb Pavlovsky បានថ្លែងប្រាប់ AFP ថា៖ «ក្រុមអ្នកប្រឆំាងក្នុងនោះមានលោក ណាវ៉ាល់នី មានការព្រួយបារម្ភយ៉ាងខ្លាំង ដោយបានបន្ថែមថា អាជ្ញាធរ នឹងខិតខំប្រឹងប្រែងពន្លឿនការងារនេះ»។
ការកែទម្រង់ទាំងនេះ នឹងផ្ទេរអំណាចខ្លះទៅឲ្យសភានៅក្នុងនោះមានអំណាចជ្រើសរើសនាយករដ្ឋមន្ត្រី និងពង្រឹងតួនាទីរបស់ស្ថាប័នទីប្រឹក្សាដែលត្រូវបានគេហៅថា ក្រុមប្រឹក្សារដ្ឋត្រូវបានដឹកនាំយ៉ាងសំខាន់ដោយលោក ពូទីន។
ការប៉ាន់ស្មានជាញឹកញាប់ គឺជាលោក ពូទីន ដែលមានវ័យ ៦៧ ឆ្នាំ អាចប្រើប្រាស់តំណែងនេះដើម្បីរៀបចំគោលនយោបាយក្នុងស្រុក និងការបរទេស ក្រោយពីអាណត្តិទី ៤ របស់លោកនៅវិមានក្រឹមឡាំងចប់នៅឆ្នាំ ២០២៤។
ប៉ុន្តែមនុស្សភាគច្រើននៅតែមិនច្បាស់ថាតើប្រព័ន្ធថ្មីនេះនឹងដំណើរការទៅមុខតាមរបៀបណា និងហេតុអ្វីបានលោកប្រធានាធិបតី ពូទីន ស្នើឲ្យធ្វើវិសោធនកម្មច្បាប់រដ្ឋធម្មនុញ្ញនៅពេលនេះ ដោយធ្វើឲ្យមានការពិបាកសម្រាប់ក្រុមអ្នកប្រឆាំងនោះ៕ AFP /PSA
