កាលពីថ្ងៃអង្គារ ទី ៩ កុម្ភៈនេះ ព្រឹទ្ធសភាអាមេរិកបោះឆ្នោតបើកការជំនុំជម្រះរឿងក្ដីអតីតប្រធានាធិបតី លោក Donald Trump បន្ទាប់ពីស្ដាប់ការតស៊ូមតិជាច្រើនម៉ោងរវាងអយ្យការសភាតំណាង និងក្រុមមេធាវីការពារក្ដីលោក Trump ថាតើការជំនុំជម្រះក្ដីអតីតប្រធានាធិបតីនៅព្រឹទ្ធសភាអនុលោមតាមរដ្ឋធម្មនុញ្ញដែរឬទេ។
សំឡេងឆ្នោតគាំទ្រការចាប់ផ្ដើមជំនុំជម្រះក្ដី គឺ ៥៦-៤៤ ដោយមានសមាជិកគណបក្សសាធារណរដ្ឋចំនួន ៦ រូប ចូលរួមគាំទ្រជាមួយសមាជិកគណបក្សប្រជាធិបតេយ្យទាំង ៥។ សមាជិកគណបក្សសាធារណរដ្ឋដែលបោះឆ្នោតគាំទ្រគឺលោកស្រី Susan Collins មកពីរដ្ឋ Maine លោកស្រី Lisa Murkowski មកពីរដ្ឋ Alaska លោក Mitt Romney មកពីរដ្ឋ Utah លោក Ben Sasse មកពីរដ្ឋ Nebraska លោក Pat Toomey មកពីរដ្ឋ Pennsylvania និងលោក Bill Cassidy មកពីរដ្ឋ Louisiana។
ការបោះឆ្នោតរបស់លោក Cassidy គឺគួរឱ្យកត់សម្គាល់ជាងគេ ដោយសារលោកគឺជាសមាជិកព្រឹទ្ធសភាតែមួយគត់ដែលបានផ្លាស់ប្ដូរជំហររបស់លោក។ កាលពីចុងខែមករា លោក Cassidy បានបោះឆ្នោតគាំទ្រការសម្រេចប្រកាសថា ការជំនុំជម្រះក្ដីអតីតប្រធានាធិបតីនៅព្រឹទ្ធសភា គឺមិនអនុលោមតាមរដ្ឋធម្មនុញ្ញទេ តែការបោះឆ្នោតកាលនោះបានបរាជ័យដោយព្រឹទ្ធសភាបានបោះឆ្នោតច្រានចោលការសម្រេចនេះក្នុងសំឡេង ៥៥-៤៥។
លោក Cassidy បាននិយាយថា លោកបានផ្លាស់ប្ដូរជំហររបស់លោកបន្ទាប់ពីបានស្ដាប់មតិរបស់អយ្យការសភាតំណាង។ ក្នុងសេចក្ដីថ្លែងការណ៍លោកបាននិយាយថា៖ «ប្រសិនបើនរណាម្នាក់មិនយល់ស្របនឹងការបោះឆ្នោតរបស់ខ្ញុំ ហើយត្រូវការការពន្យល់ ខ្ញុំសូមឱ្យពួកគេស្ដាប់បទបង្ហាញរបស់អយ្យការសភាតំណាង និងក្រុមមេធាវីប្រធានាធិបតី Trump»។
កាលពីថ្ងៃ ១៣ មករា សភាតំណាងអាមេរិកបានបោះឆ្នោតក្នុងសំឡេង ២៣២-១៩៧ ធ្វើការចោទប្រកាន់លោក Trump ពីបទញុះញង់ឱ្យមានកុបកម្ម ដោយលើកឡើងថា កាលពីថ្ងៃទី ៦ មករា លោកបានជំរុញក្រុមអ្នកគាំទ្ររបស់លោកឱ្យទៅធ្វើកុបកម្មនៅវិមានកាពីតូល (អគារសភា) ដែលឈានដល់ការវាយសម្រុកចូលបន្ទប់អង្គសភាទាំង ២។
អយ្យការសភាតំណាងចាប់ផ្ដើមបទបង្ហាញរបស់ពួកគេដោយចាក់វីដេអូសង្ខេបព្រឹត្តិការណ៍កុបកម្ម ៦ មករា ដែលរួមមានការដកស្រង់សម្ដីលោក Trump មួយចំនួនដូចជាការនិយាយថា «យើងនឹងបញ្ឈប់ការលួច» ដែលទាក់ទងនឹងការអះអាងដោយគ្មានមូលដ្ឋានរបស់លោកថា ការបោះឆ្នោតត្រូវបាន «លួច» ដោយការក្លែងបន្លំ។
បន្ទាប់ពីការចាក់វីដេអូអយ្យការនាំមុខសមាជិកសភាតំណាងលោក Jamie Raskin ដែលជាអតីតសាស្ត្រាចារ្យច្បាប់បាននិយាយថា សកម្មភាពរបស់លោក Trump គឺជា «ឧក្រិដ្ឋកម្មខ្ពស់»។
ក្រុមមេធាវីការពារក្ដីលោក Trump បានឆ្លើយតបនឹងការចោទប្រកាន់នេះថា សម្ដីរបស់លោក Trump គឺស្ថិតក្រោមការការពាររបស់វិសោធនកម្មទី១ នៃរដ្ឋធម្មនុញ្ញអាមេរិក ហើយលោកមិនបានបង្កឱ្យមានកុបកម្មនេះទេ។ បន្ថែមពីលើនេះទៀត ក្រុមមេធាវីបាននិយាយថា ការជំនុំជម្រះក្ដីលោក Trump គឺមិនអនុលោមតាមរដ្ឋធម្មនុញ្ញទេ ដោយសារលោកបានចាកចេញពីតំណែងទៅហើយ។
លោកមេធាវី Bruce Castor បាននិយាយថា៖ «ប្រធានាធិបតី Trump លែងកាន់អំណាចទៀតហើយ។ គោលបំណងរបស់រដ្ឋធម្មនុញ្ញត្រូវបានសម្រេចរួចទៅហើយ។ លោកត្រូវបានដកចេញពីតំណែងដោយអ្នកបោះឆ្នោត»។
លោក Raskin បានច្រានចោលមតិរបស់មេធាវីលោក Trump ហើយនិយាយថា សកម្មភាពខុសច្បាប់របស់លោក Trump ក្នុងនាមជាប្រធានាធិបតី គឺមិនអាចលើកលែងបាន បើទោះបីជាលោកចាកចេញពីតំណែងក៏ដោយ។
លោកបាននិយាយថា ការលើកលែង គឺហាក់ដូចជាការអនុញ្ញាតឱ្យធ្វើសកម្មភាពខុស ច្បាប់ដោយនិទ្ទណ្ឌភាពក្នុងរយៈពេលប៉ុន្មានសប្ដាហ៍ចុងក្រោយនៃការកាន់អំណាច។
អយ្យការសភាតំណាងបានលើកឡើងអំពីករណីមុនៗ ដែលមានការជំនុំជម្រះក្ដីនៅព្រឹទ្ធសភាបានកើតឡើង បន្ទាប់ពីមន្ត្រីបានចាកចេញពីតំណែង។ ពួកគេបានលើកឡើងពីសំណុំរឿងពុករលួយមួយកាលពីឆ្នាំ ១៨៧៦ ដែលកាលនោះរដ្ឋមន្ត្រីក្រសួងការពារជាតិ William Belknap ត្រូវបានសភាតំណាងធ្វើការចោទប្រកាន់ ហើយព្រឹទ្ធសភាធ្វើការជំនុំជម្រះក្ដី បន្ទាប់ពីលោកបានចាកចេញពីតំណែង។
យ៉ាងណាមិញ ការជំនុំជម្រះក្ដីនឹងចាប់ផ្ដើមនៅថ្ងៃពុធទី ១០ កុម្ភៈ (ត្រូវនឹងថ្ងៃព្រហស្បតិ៍ ទី ១១ នៅកម្ពុជា) ដោយភាគីសងខាងនឹងមានពេលវេលារហូតដល់ ១៦ ម៉ោងសម្រាប់បញ្ចុះបញ្ចូលឱ្យសមាជិកព្រឹទ្ធសភាបោះឆ្នោតផ្ដន្ទាទោស ឬលើកលែងទោស៕